Naxçıvan, 12 iyun, AZƏRTAC

Naxçıvan Muxtar Respublikasında strateji əhəmiyyətli məhsula - taxıla olan tələbatın daxili imkanlar hesabına ödənilməsi istiqamətində həyata keçirilən ardıcıl və məqsədyönlü tədbirlər öz bəhrəsini verir. Taxılçılıqda yeni, səmərəli toxum materialının tədarükü, becərmənin yüz faiz mexanikləşdirilməsi, gübrə normalarının tətbiqi, növbəli əkin, suvarmaların şırım üsuluna keçirilməsi məhsul istehsalının artımına səbəb olub.

Muxtar respublikada 2017-ci ilin bol məhsulunun əsası ötən ilin payızında qoyulub. Belə ki, 17 min 465 hektar sahədə buğda, 5035 hektar sahədə arpa olmaqla, ümumilikdə, 22 min 500 hektar payızlıq taxıl əkini keçirilib, suvarma suyuna olan tələbat vaxtlı-vaxtında ödənilib.

Son illər Naxçıvanda 27 min ton tutuma malik uzunmüddətli və 20 min ton tutuma malik qısamüddətli taxıl ehtiyatı anbarlarının istifadəyə verilməsi bu strateji məhsulun tədarükündə mühüm rol oynayır. Qeyd edək ki, uzunmüddətli taxıl anbarı hər biri 3 min ton tutumu olan 9 bunkerdən ibarətdir. Burada yüksək texniki göstəricilərə malik müasir texnoloji avadanlıqlar quraşdırılıb. Həmçinin işçilərə normal iş şəraiti yaradılıb, 8 iş otağı, yeməkxana, laboratoriya və digər yardımçı otaqlardan ibarət inzibati bina tikilib istifadəyə verilib. Müəssisə strateji əhəmiyyət daşıdığından ildırımötürücü qurğu və yanğından mühafizə sistemi də quraşdırılıb.

Hər il olduğu kimi, bu mövsümdə də Naxçıvan Muxtar Respublikası “Bərəkət Buğda Məhsulları” Məhdud Məsuliyyətli Cəmiyyətində əsas diqqət sahələrdən tədarük olunacaq taxılın qəbuluna yönəldilib. Taxıl ehtiyatları anbarının müdiri Elşən Mirzəyev bildirib ki, anbarlarda mövsümə hazırlıqla əlaqədar kompleks tədbirlər görülüb, havalandırma sistemində, ayrı-ayrı anbarlarda cari təmir işləri aparılıb, avadanlıqlar yağlanıb, rəqəmsal tərəzi mütəxəssislər tərəfindən yoxlanılıb. Laboratoriyaya baxış keçirilib, anbarlarda ziyanvericilərə qarşı dərmanlama işləri aparılıb. Müsahibimizin sözlərinə görə, əvvəlki illərdə olduğu kimi, bu il də taxıl qəbulu yüksək səviyyədə həyata keçiriləcək: “Hazırda görülmüş tədbirlər nəticəsində torpaq mülkiyyətçilərindən taxıl qəbulu üçün lazımi imkanlarımız var. Müəssisədə yeni quraşdırılmış avadanlıqlar beynəlxalq standartlara uyğun bütün dənli bitkilərin nəmliyini kondisiya halına salmağa şərait yaradır. Türkiyə istehsalı olan avadanlıqlar saatda 12 ton çəkidə bütün dənli bitkilərin qurudulmasına imkan verir. Bu avadanlıq vasitəsilə taxılı qurudur və ehtiyat anbarlara yığırıq”.

Məhsulun vaxtında toplanılması və münasib qiymətə satılması da diqqət mərkəzində saxlanılır. Naxçıvan Muxtar Respublikası “Bərəkət Buğda Məhsulları” Məhdud Məsuliyyətli Cəmiyyətindən verilən məlumata görə, cəmiyyətdə qəbul olunan 1 kiloqram buğda və qarğıdalı 30 qəpikdən, arpa isə 25 qəpikdən təhvil götürüləcək və dəyəri də yerində ödəniləcək.

Qeyd edək ki, muxtar respublikada 2016-cı ildə 31 min 579 hektar sahədən 94 min 117 ton taxıl tədarük edilib, hektardan məhsuldarlıq 29,8 sentner olub.

AZƏRTAC-ın Naxçıvan Muxtar Respublika bürosu