REGİONLAR


Naxçıvan İslam dünyasının mədəniyyət nümunələri ilə zəngin şəhərdir

Naxçıvan, 5 iyun, AZƏRTAC

Naxçıvan şəhərinin 2018-ci il üçün İslam mədəniyyətinin paytaxtı seçilməsi, ölkəmizin, o cümlədən qədim Naxçıvanın İslam dünyasındakı yerinin və nüfuzunun göstəricisidir. Naxçıvan İslam dünyasının mədəniyyət nümunələri ilə zəngin olan bir şəhərdir. Bunu şəhərin qədim tarixi və çoxsaylı mədəniyyət abidələri bir daha sübut edir.

AZƏRTAC xəbər verir ki, bu fikirlər Naxçıvan şəhərinin 2018-ci il üçün İslam mədəniyyətinin paytaxtı elan edilməsi münasibətilə keçirilən “Naxçıvanda İslam mədəniyyəti və gənclərdə tolerantlığın inkişaf etdirilməsi” mövzusunda seminar-treninqdə səsləndirilib.

“Naxçıvan” Universitetində keçirilən seminar-treninqdə çıxış edən ali təhsil ocağının tərbiyə işləri üzrə prorektoru Əli Yusifov bildirib ki, Azərbaycan Respublikası Prezidentinin 2016-cı il iyunun 2-də imzaladığı Sərəncam ilə Naxçıvan şəhərinin 2018-ci il üçün İslam mədəniyyətinin paytaxtı elan edilməsi ilə əlaqədar Təşkilat Komitəsi yaradılıb. Ötən il noyabrın 25-də Təşkilat Komitəsinin ilk iclası keçirilib, hazırlıq işləri ilə bağlı müvafiq tapşırıqlar verilib.

Seminar-treninqdə “Təmiz Dünya” İctimai Birliyinin sədri Fizzə Məmmədovanın “Gənclərdə tolerantlığın formalaşdırılması”, AMEA-nın müxbir üzvü Fəxrəddin Səfərlinin “Naxçıvanda İslam mədəniyyəti tarixi”, Naxçıvan Muxtar Respublikası Dini Qurumlarla İş üzrə İdarənin əməkdaşı Bəhruz Gülmalıyevin “Naxçıvanda dini tolerantlıq və İslamda tolerantlıq məsələləri”, Naxçıvan “Biznes Təlim Akademiyası” Məhdud Məsuliyyətli Cəmiyyətinin təlimçisi, layihə rəhbəri Sevinc Cabbarovanın “Gənclərdə tolerantlığın inkişafı və təkmilləşdirilməsi” mövzularında məruzələri dinlənilib.

Məruzələrdə vurğulanıb ki, Naxçıvan qədimliyinə, mədəni zənginliyinə, yerləşdiyi coğrafi mövqeyinə görə seçilir. Məhz bu səbəbdən Naxçıvan hər zaman diqqət mərkəzində olub. Bəşəriyyətin yenidən yaranış tarixini simvolizə edən Nuh Peyğəmbərin məzarüstü abidəsi, Möminə xatın türbəsi və bir çox abidələr məhz bu şəhərin qədimliyini göstərir. Bu siyahıya ulu əcdadlarımızın yaşam fəlsəfəsini özündə əks etdirən Gəmiqaya abidələrini, dünya arxeologiya elminə mühüm töhfələr vermək qüdrətində olan Qazma, Oğlanqala, Gilançay, Kültəpə arxeoloji abidələrini, saysız-hesabsız təbiət möcüzələrini əlavə etsək, dünya xəritəsində həcmcə kiçik bir ərazidə necə böyük bir potensialın toplandığının şahidi olarıq. Qeyd edək ki, müxtəlif tarixi dövrlərdəki ictimai-siyasi şərait Naxçıvanın kifayət qədər tanıdılmasına imkan verməyib. Yalnız Azərbaycan ikinci dəfə müstəqillik əldə etdikdən sonra, daha dəqiqi, ümummilli liderimiz Heydər Əliyevin siyasi hakimiyyətə qayıdışından sonra Naxçıvanın yenidən öyrənilməsinə, tədqiq olunmasına, tanıdılmasına başlanılıb.

Bildirilib ki, milli ornamentləri və yüksək memarlıq xüsusiyyətləri ilə Naxçıvan abidələri bu gün nəinki İslam ölkələrindən, dünyanın dörd bir yanından gələn turistləri heyran etməkdədir. 1200-dən artıq tarixi abidəyə malik olan Naxçıvan 57 dünya əhəmiyyətli abidəni qorumaqla bəşər mədəniyyətini zənginləşdirir.

Multikulturalizmin əhəmiyyətindən danışan məruzəçilər diqqətə çatdırıblar ki, multikulturalizmin Azərbaycan modelinin dünya ölkələrinə nümunə kimi təqdimatı, milli dəyərlərinin gənclərə aşılanması və tolerantlığın əhəmiyyətinin təbliğ olunması vacib məsələlərdən biri kimi qarşıda durur.

Seminar-treninqin sonunda sertifikatlar təqdim olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.