REGİONLAR
Naxçıvan: Kəndlə şəhər arasında fərq aradan qaldırılır
Naxçıvan, 22 noyabr, Rauf Əliyev, AZƏRTAC
Bu gün qədim Naxçıvanın bütün şəhər, qəsəbə və kəndləri müasir yaşayış məntəqələrinə çevrilib. Muxtar respublikanın hətta ucqar dağ kəndlərində də möhtəşəm quruculuq işləri aparılır. Bu işlər sırasında ən çox diqqəti cəlb edən həm də kəndlərin abadlaşdırılması istiqamətində görülən kompleks tədbirlərdir. Sistemli və düşünülmüş şəkildə aparılan işlərin əsas məqsədi kənd sakinlərinin rahat, firavan yaşayışını təmin etmək, necə deyərlər, kəndlə şəhər arasındakı fərqi aradan qaldırmaqdır. Bu məqsədə doğru inamlı addımlar atılır.
Naxçıvan Muxtar Respublikasının kəndlərində inşa olunan kənd mərkəzləri bu baxımdan xüsusilə seçilir. Məzmun və mahiyyətcə yeni obyektlər olan kənd mərkəzləri yaradılmazdan əvvəl kəndlərdə fəaliyyət göstərən ayrı-ayrı dövlət qurumları müxtəlif yerlərdə, köhnə, uyğunlaşdırılmış binalarda yerləşirdi. Əhalisi çox olan kəndlərdə mövcud vəziyyət insanları çətinliyə salırdı. Sakinlər müəyyən yerli məsələlərin həlli üçün xeyli vaxt sərf etməli olurdular. Kənd mərkəzləri yaradıldıqdan sonra vəziyyət müsbətə doğru dəyişdi: bütün yerli dövlət qurumlarının hamısı bir mərkəzdə yerləşdirildi, fəaliyyətlərinin səmərəli təşkili üçün şərait yaradıldı. İndi bir binaya üz tutmaqla bir neçə məsələni yerindəcə həll etmək mümkündür.
Naxçıvan Muxtar Respublikasının kəndlərində artıq insanların saatlarla vaxt itirib rayon mərkəzlərinə getməsinə ehtiyac qalmayıb. Bu problem birmənalı şəkildə həllini tapıb. Belə ki, həlli mümkün olan bütün məsələlər kənd mərkəzlərində cəmləşmiş təşkilatlar tərəfindən yoluna qoyulur. Bununla həm insanların rahatlığı təmin olunur, həm də işin keyfiyyəti yüksəlir.
Azərbaycan Prezidenti İlham Əliyev çıxışlarında insanların həyat şəraitinin yaxşılaşdırılmasının vacibliyini dəfələrlə vurğulayaraq deyib: “Dövlət siyasətinin mərkəzində Azərbaycan vətəndaşıdır. Siyasət Azərbaycan vətəndaşının sosial rifahının, təhlükəsiz yaşayışının təmin edilməsinə xidmət etməlidir. Hər şeyi biz Azərbaycan vətəndaşı üçün edirik. Budur bizim məqsədimiz”. Naxçıvanda bu istiqamətdə görülən işlər dövlətimizin başçısının tapşırıq və tövsiyələrinin muxtar respublikada dərhal və təxirə salınmadan yerinə yetirildiyinin bariz nümunəsidir.
Əhalinin rifah halının və həyat səviyyəsinin davamlı yüksəlişi daha çox sabitliyin və inkişafın tam təmin olunduğu ölkələr üçün xarakterikdir. Təsadüfi deyil ki, özünün yüksəliş, intibah dövrünü yaşayan Azərbaycanda, onun tərkib hissəsi olan Naxçıvan Muxtar Respublikasında insanların ehtiyaclarının ödənilməsi, problemlərinin həlli istiqamətində davamlı tədbirlər həyata keçirilir, dövlət proqramları reallaşdırılır. Bu tədbirlər sırasında Naxçıvanda yeni kənd mərkəzləri ilə yanaşı, xidmət mərkəzlərinin, tibb ocaqlarının, məktəb binalarının tikintisi də xüsusi yer tutur.
Naxçıvan Muxtar Respublikası Ali Məclisinin Sədri Vasif Talıbov bu barədə danışarkən deyib: “Ölkəmizdə kəndlərin inkişafına və abadlaşmasına xüsusi diqqət göstərilir, əhalinin məskunlaşması və rahat yaşayışının təmin olunması üçün lazımi tədbirlər həyata keçirilir. Bu iş muxtar respublikada da davam etdirilir, kəndlərdə müasir infrastruktur yaradılır, yeni kənd və xidmət mərkəzləri, tibb ocaqları, məktəb binaları tikilərək istifadəyə verilir. Bu da dövlət qurumlarının fəaliyyətinin normal təşkilinə, sakinlərin müraciətlərinin vaxtlı-vaxtında həllinə, əhaliyə göstərilən xidmətin səviyyəsinin yüksəldilməsinə, şagirdlərin hərtərəfli təhsil almasına və insanların tibbi xidmətlə təmin olunmasına imkan verir. Eyni zamanda muxtar respublikanın müasirləşən kəndlərində əhalinin sosial-məişət problemlərinin həllinə də diqqət yetirilir, mənzillər telefonlaşdırılır, elektrik enerjisinin və təbii qazın fasiləsiz verilişi təmin edilir”.
Muxtar respublikanın kəndlərində yaradılan müasir xidmət mərkəzlərində bərbərxana, qadın gözəllik salonu, ət satışı yeri, ərzaq və təsərrüfat malları mağazaları fəaliyyət göstərir. Onu da xüsusi qeyd etmək lazımdır ki, yaradılan şərait gündəlik ərzaq və sənaye mallarına tələbatın kəndin özündə təmin edilməsinə imkan verir.
Naxçıvanda yüksək səviyyəli inkişaf strategiyasının mühüm elementlərindən biri kimi qiymətləndirilən kənd mərkəzləri, eyni zamanda xidmət mərkəzləri layihəsinin uğurla reallaşdırılması və əldə olunan nəticələr nümunə təşkil edir. Məsələnin mahiyyətinə varmaq üçün bəzi məqamlara diqqəti cəlb etmək istərdik. Heç kəsə sirr deyil ki, bu gün bütün dünyada kəndlərdən şəhərlərə doğru axın var. Bəzi ölkələr bu problemlə daha çox qarşılaşır və onun həllinə nail ola bilmirlər. Nəticədə şəhərlərdə əhali sıxlığı müşahidə olunur. Bu isə özü ilə bərabər bir sıra ciddi problemlər meydana gətirir, kənd təsərrüfatı sahəsi iflic vəziyyətinə düşür.
Naxçıvan Muxtar Respublikasına nəzər yetirdikdə tamamilə başqa bir mənzərənin şahidi oluruq: muxtar respublikada 5 şəhər olduğu halda, əhalinin 70 faizi kəndlərdə yaşayır. Bu onu göstərir ki, ötən illər ərzində qədim diyarın kəndlərində əhalinin məşğulluğu təmin edilib, yaşayış şəraiti yaxşılaşdırılıb, bir sıra problemlər öz həllini tapıb. Naxçıvan Muxtar Respublikası Ali Məclisi Sədrinin qeyd etdiyi kimi, kəndlə şəhər arasındakı fərqin aradan qaldırılması aparılan abadlıq-quruculuq işlərindən, yaradılan müasir infrastrukturdan asılıdır. Kəndlərin tamamilə qazlaşdırılması, elektrik enerjisinin fasiləsiz verilməsi, internetdən istifadə, televiziya yayımlarının həyata keçirilməsi insanların rahat yaşayışına və əhalinin daha sıx məskunlaşmasına səbəb olur.
Bu gün muxtar respublikanın kəndlərində təhsilin səviyyəsinin yüksəldilməsi istiqamətində də kompleks tədbirlər həyata keçirilir. Naxçıvan Muxtar Respublikasında onlarla müasir məktəb binaları tikilərək istifadəyə verilib, şagirdlərin müasir dövrün tələbləri səviyyəsində təhsil almaları üçün hər cür şərait yaradılıb. Ali Məclisin Sədri dəfələrlə qeyd edib ki, təhsil hər bir ölkənin həyatında vacib sahədir. Ona görə də ölkənin gələcəyini təmin etmək üçün vətənpərvər və təhsilli gənclik yetişdirmək lazımdır. Bu gün ölkəmizdə gənclərin təhsil alması üçün lazımi şərait yaradılır, bu sahəyə hərtərəfli dövlət qayğısı göstərilir. Yaradılan şərait isə qarşıya mühüm vəzifələr qoyur. Bu gün məktəblərin üzərinə düşən əsas vəzifə təhsil verməklə yanaşı, həm də gənclərimizə müstəqil qərarlar qəbul etməyi öyrətməkdir. Çünki hər bir gənc qabiliyyətinə və həvəsinə görə ixtisas seçir, gələcək həyatını bu ixtisaslara dərindən yiyələnməklə qurur.
Muxtar respublikanın kəndlərində istifadəyə verilən obyektlər kənd, xidmət mərkəzləri, məktəb binaları ilə yekunlaşmır. Əhalinin sağlamlığının qorunması və tibbi xidmətin keyfiyyətinin yaxşılaşdırılması üçün kəndlərdə həkim ambulatoriyaları da müasir dövrün tələbləri səviyyəsində tikilib istifadəyə verilir. Kəndlərdə səhiyyə ocaqlarının tikilməsi və əhalinin lazımi tibbi xidmətlərlə təmin olunması insanların rahat həyat şəraitinin təmin olunması istiqamətində görülən işlərin tərkib hissəsidir.
Bu gün Naxçıvan Muxtar Respublikasının şəhər və rayon mərkəzləri ilə yanaşı, kəndlərində də müasir binaların inşa olunması, abad yolların istifadəyə verilməsi Azərbaycan Respublikasının sürətli iqtisadi inkişafının nəticəsi, bariz nümunəsidir. Görülən genişmiqyaslı işlər kənd sakinlərinin torpağa bağlılığını, onların qurub-yaratmaq əzmini daha da artırır, insanların firavan yaşayışını təmin edir.
Rauf Əliyev
AZƏRTAC-ın Naxçıvan Muxtar Respublikasındakı
bürosunun rəhbəri