Naxçıvan, 18 dekabr, Rauf Əliyev, AZƏRTAC 

Dekabrın 18-də Məmməd Səid Ordubadi adına Naxçıvan Muxtar Respublika Kitabxanasında Azərbaycan Miniatür Kitab Muzeyinin filialının təqdimatı olub.

AZƏRTAC xəbər verir ki, bu münasibətlə keçirilən tədbirdə Naxçıvan Muxtar Respublikası Ali Məclisi Aparatının rəhbəri Əli Həsənov çıxış edərək deyib ki, bu gün Məmməd Səid Ordubadi adına Naxçıvan Muxtar Respublika Kitabxanasında qədim tarixə malik diyarın həyatında əlamətdar hadisə münasibətilə toplaşmışıq.

Bildirilib ki, muxtar respublikada bütün sahələr kimi, kitabxanalar da qayğı ilə əhatə olunub. Kitabxanalar yeni kitablarla zənginləşdirilir, onların maddi-texniki bazaları yaxşılaşdırılır, yeni elektron kitabxanalar yaradılır.

Naxçıvan Muxtar Respublikası Ali Məclisi Sədrinin “Naxçıvan Muxtar Respublikası Ali Məclisinin Naxçıvanşünaslıq Mərkəzinin yaradılması haqqında” 2011-ci il 17 fevral, “Məmməd Səid Ordubadi adına Naxçıvan Muxtar Respublika Kitabxanasının 90 illik yubileyinin keçirilməsi haqqında” 2012-ci il 19 aprel tarixli sərəncamları, eləcə də Naxçıvan Muxtar Respublika Kitabxanasında, Ali Məclisin Naxçıvanşünaslıq Mərkəzində, Naxçıvan Dövlət Universitetində, Azərbaycan Milli Elmlər Akademiyasının Naxçıvan Bölməsində, Naxçıvan Muxtar Respublikası Ali Məclisinin Sədri yanında Gənclər Fondunda elektron kitabxanaların, həmçinin Naxçıvan Regional İnformasiya Mərkəzində məhdud fiziki imkanlılar üçün audio və elektron kitabxana xidmətinin yaradılması muxtar respublikada kitabxanalara, kitab mütaliəsinə göstərilən diqqət və qayğının əyani ifadəsidir.

Qeyd edilib ki, kitabxanaların maddi bazasının gücləndirilməsi, elektron kitabxanaların yaradılması milli-mədəni irsimizin qorunaraq gələcək nəsillərə çatdırılmasına, kitabxana xidmətinin forma və məzmunca yeniləşməsinə səbəb olub. Artıq yaradılan elektron kataloq sistemi və internet saytı vasitəsilə kitabxana fondunun qeydiyyatını aparmaq, oxucuların statistikasını və maraq dairəsini müəyyənləşdirmək, ədəbiyyat fondunu oxucu sorğusuna uyğun komplektləşdirmək və yeniləşdirmək mümkündür.

Diqqətə çatdırılıb ki, 150 minə yaxın kitab fondu olan Naxçıvan Muxtar Respublika Kitabxanasında 4 bölmə və 10 şöbə fəaliyyət göstərir. Bu gün burada Azərbaycan Miniatür Kitab Muzeyinin filialı açılır. Naxçıvan Muxtar Respublikası Ali Məclisi Sədrinin tapşırığı ilə yaradılan bu filial öz tərtibatı ilə fərqlənir. Filialın yerləşdiyi otaqda miniatür kitablar üçün 11 şkaf qoyulub və bu şkaflarda işıqlandırma sistemi yaradılıb. Bu da 1000-dən çox miniatür kitabın sərgilənməsinə imkan verəcəkdir. Burada elektron kartotekanın aparılması məqsədilə zəruri şərait yaradılıb. Bundan əlavə, filialda miniatür kitabların asanlıqla oxunması üçün şriftləri verilən rejimdə böyüdən xüsusi aparat da qoyulub.

Bildirilib ki, müasir dövrdə mədəniyyət nümunəsi kimi dəyərləndirilən miniatür kitablar geniş yayılıb və populyarlıq qazanıb. Bu nəşrlər təkcə məlumat və bilik vermək, mütərəqqi ideyalar yaymaq vəzifəsini daşımır. Həcmcə kiçik olsalar da, böyük dəyərə malik miniatür kitablar kütləvi satış üçün nəzərdə tutulmur, onlar xüsusi kitabxanalarda, muzeylərdə, sərgilərdə nümayiş etdirilir. İnanırıq ki, filialda toplanan kitablar tədqiqatçılar və oxucular üçün faydalı olacaqdır.

Naxçıvan Muxtar Respublikası Ali Məclisi Aparatının rəhbəri Əli Həsənov filialın ərsəyə gəlməsində Azərbaycan Respublikasının Əməkdar Mədəniyyət İşçisi, Azərbaycan Miniatür Kitab Muzeyinin yaradıcısı Zərifə Salahovanın xüsusi xidmətləri olduğunu vurğulayıb, buna görə də Zərifə xanıma muxtar respublikanın bütün oxucuları adından minnətdarlığını bildirib.

Naxçıvan Muxtar Respublikası Yazıçılar Birliyinin sədri Asim Əliyev qeyd edib ki, muxtar respublikada başqa sahələr kimi, mədəni həyatımız da intibah dövrünü yaşayır. Qədim diyarımızın tarixi keçmişi ilə bağlı kitabların nəşr olunması, Naxçıvanda beynəlxalq səviyyəli elmi konfransların, simpoziumların keçirilməsi, görkəmli şəxsiyyətlərin yubileylərinin qeyd edilməsi, şair və yazıçılarımızın, elm, maarif xadimlərinin ev-muzeylərinin yaradılması bir daha təsdiq edir ki, Naxçıvan Muxtar Respublikası bu gün öz inkişafının yeni mərhələsinə qədəm qoyub. Naxçıvan Muxtar Respublikası Ali Məclisi Sədrinin tapşırığı ilə Məmməd Səid Ordubadi adına Naxçıvan Muxtar Respublika Kitabxanasında Azərbaycan Miniatür Kitab Muzeyinin filialının yaradılması həyata keçirilən tədbirlərin davamı kimi hamımızda böyük qürur və sevinc hissi yaradıb.

Tədbirdə çıxış edən Azərbaycan Respublikası Prezidenti Katibliyinin rəisi – Prezidentin köməkçisi Dilarə Seyidzadə bildirib ki, Naxçıvan çox müqəddəs torpaqdır. 1969-cu ildən etibarən Naxçıvanda da böyük işlər görülməyə başlanılıb. Bu gün hər bir naxçıvanlı Ulu Öndərin yolunu böyük məhəbbətlə davam etdirir. Bu torpağı qoruyan da, xilas edən də ümummilli liderimiz Heydər Əliyev olub. Heç şübhəsiz ki, Naxçıvanın bu səviyyəyə gətirilməsi ulu öndər Heydər Əliyev siyasətinə sədaqətin ifadəsidir.

“Azərbaycanda miniatür kitab nəşri, belə kitabların toplanılması Azərbaycan Respublikasının Əməkdar Mədəniyyət İşçisi, Miniatür Kitab Muzeyinin təsisçisi Zərifə Salahovanın adı ilə bağlıdır”, - deyən Dilarə Seyidzadə ulu öndər Heydər Əliyevin Zərifə Salahovanın miniatür kitab işi sahəsindəki fəaliyyətinə yüksək qiymət verdiyini tədbir iştirakçılarının diqqətinə çatdırıb.

Dilarə Seyidzadə çıxışının sonunda Naxçıvanda mədəniyyətin inkişafına göstərdiyi böyük qayğıya görə Naxçıvan Muxtar Respublikası Ali Məclisinin Sədri Vasif Talıbova dərin minnətdarlığını bildirib.

Azərbaycan Miniatür Kitab Muzeyinin təsisçisi, Respublika “Kitab” Cəmiyyətinin sədri Zərifə Salahova çıxış edərək deyib ki, bu gün miniatür kitablar dünyanın müxtəlif ölkələrində çap olunub yayılsa da, ilk dəfə Miniatür Kitab Muzeyi Azərbaycanda yaradılıb. Muzey ümummilli lider Heydər Əliyevin qayğısı ilə 2002-ci il aprel ayının 23-də Bakıda açılıb. Həmin muzeydə dünyanın 66 ölkəsində çap olunan 6 minədək miniatür kitab toplanıb. Sevindirici haldır ki, həmin kitablar içərisində ölkə nəşriyyatlarının çap etdikləri miniatür kitablar da özünə yer alıb.

Zərifə Salahova Naxçıvan Muxtar Respublikasının yaradılmasının 90 illik yubileyinə miniatür kitab hazırladığını bildirib. Diqqətə çatdırıb ki, bu il sentyabrın 29-da Naxçıvanda həmin kitabın təqdimat mərasimində iştirak etmişəm. Naxçıvanlıların elmə, mədəniyyətə böyük maraq göstərdiklərini vurğulayan Zərifə Salahova Naxçıvan Muxtar Respublikası Ali Məclisi Sədrinin bu qədim diyarda həyata keçirdiyi tədbirləri yüksək dəyərləndirib, göstərilən qonaqpərvərliyə görə minnətdarlıq edib.

Sonra Azərbaycan Miniatür Kitab Muzeyinin filialı ilə tanışlıq olub.