REGİONLAR


Naxçıvan Muxtar Respublikası Mərkəzi Seçki Komissiyasında seminar-treninq keçirilib

Naxçıvan, 22 sentyabr, AZƏRTAC

Naxçıvan Muxtar Respublikası Mərkəzi Seçki Komissiyasında seminar-treninq keçirilib.

Naxçıvan Muxtar Respublikası Mərkəzi Seçki Komissiyasının mətbuat xidmətindən AZƏRTAC-a bildirilib ki, seminar-treninqdə muxtar respublikada fəaliyyət göstərən 7 seçki dairəsinin dairə seçki komissiyalarının sədrləri, veb-kameralı seçki məntəqələrinin məntəqə seçki komissiyalarının sədr və katibləri, həmçinin seçkilərə 5 gün qalmışadək yaradılan 24 qapalı seçki məntəqəsinin məntəqə seçki komissiyalarının sədr, katib və üzvləri iştirak ediblər.

Tədbiri açan Naxçıvan Muxtar Respublikası Mərkəzi Seçki Komissiyasının sədri Məhərrəm Qasımov qeyd edib ki, sentyabrın 26-da keçiriləcək referenduma hazırlıq prosesi davam edir. Ölkəmizdə keçirilən seçkilərdə şəffaflığın yüksək səviyyədə təmin olunması üçün bütün digər vasitələrlə yanaşı, informasiya-kommunikasiya texnologiyaları sahəsində əldə olunmuş nailiyyətlərdən geniş istifadə edilir ki, bu da seçki prosesini əvvəldən axıradək izləməyə, geniş və hərtərəfli müşahidə aparmağa və beləliklə, aşkarlığın daha dolğun təminatına şərait yaradır.

Bildirilib ki, muxtar respublikada fəaliyyət göstərən hər bir seçki dairəsinin 5 məntəqəsində olmaqla, 35 seçki məntəqəsində müşahidə kameraları quraşdırılıb, sınaqdan keçirilərək hazır vəziyyətə gətirilib. Səsvermə günü həmin seçki məntəqələrində səsvermənin gedişini internet vasitəsilə izləmək mümkün olacaq. Seçki məntəqələrində veb-kameraların quraşdırılması Azərbaycan Respublikası Mərkəzi Seçki Komissiyasının “Seçki məntəqələrində veb-kameraların quraşdırılması və istifadəsinə dair Qaydalar”a uyğun olaraq təşkil edilib.

Mərkəzi Seçki Komissiyasının sədri referendum günü məntəqə seçki komissiyaları üzvlərinin vəzifələri barədə məlumat verib.

Referendum günü məntəqə seçki komissiyalarının fəaliyyəti, referendum bülleteninin doldurulması qaydaları barədə danışan Mərkəzi Seçki Komissiyasının katibi Elnur Eyvazov bildirib ki, sentyabrın 26-da səsvermə saat 8:00-dan 19:00-a kimi keçiriləcək. Referendum bülleteni digər seçkilərdə tərtib olunan səsvermə bülletenlərindən fərqlənir. Konstitusiyada referenduma çıxarılan 29 maddə üzrə təklif olunan dəyişikliklər səsvermə bülletenində ayrı-ayrılıqda əks olunub. Bu 29 maddə bülletendə alt-alta sıralanıb və hər bir maddənin qarşısında da “hə” və “yox” cavablarının altında boş kvadratlar qoyulub. Seçici bülleteni aldıqdan sonra boş səsvermə kabinəsinə keçir. Seçici oxuduğu hər maddənin qarşısındakı cavab variantlarından, yəni “hə” və ya “yox” cavablarından birinin altındakı boş kvadrata qələmlə müəyyən bir işarə qoyur və yaxud kvadratın kənarına çıxmayacaq şəkildə içərisini qələmlə qaralayır. Seçici bülleteni doldurarkən səsinin etibarsız sayılmasını istəmirsə, hər maddənin qarşısındakı “hə” və ya “yox” cavablarından yalnız birini işarələməlidir. Əgər seçici “hə” və ya “yox” cavablarının hər ikisinə işarə qoyarsa və ya heç bir cavaba işarə qoymazsa, o zaman o maddə üzrə səsi etibarsız hesab olunur.

7 saylı Ordubad-Culfa dairə seçki komissiyasının aparıcı məsləhətçisi Hüseyn Qasımov çıxışında qeyd edib ki, məntəqə seçki komissiyasının protokolu Azərbaycan Respublikası Mərkəzi Seçki Komissiyası tərəfindən hazırlanmış üç nüsxədən ibarət xüsusi dövlət sənədidir. Nüsxələrdən birincisi Azərbaycan Respublikası Mərkəzi Seçki Komissiyasına, ikincisi müvafiq dairə seçki komissiyasına təhvil verilir. Üçüncüsü isə məntəqədə məlumat lövhəsindən asılır. Protokolu son dərəcə səliqəli tərtib etmək, həddindən artıq diqqətli olmaq vacibdir. Protokol 8 bənddən ibarətdir. Protokol tərtib olunan zaman dairənin nömrəsi, məntəqənin nömrə və ünvanı dəqiq və səliqəli şəkildə başlıqda qeyd edilir. Bundan sonra protokolun bəndləri doldurulur. Protokolun yeddinci bəndi doldurulana qədər lazım olan rəqəmlərin yazılması üçün səsvermə qutularının açılması tələb olunmur.

Tədbirdə dairə seçki komissiyalarının sədrləri veb-kameralı seçki məntəqələrinin və seçkilərə 5 gün qalmışadək yaradılan 24 seçki məntəqəsinin referenduma hazırlıqlarının vəziyyəti barədə məlumat veriblər.

Sonra seçki komissiyaları üzvlərini maraqlandıran suallar cavablandırılıb.

Tədbirə Naxçıvan Muxtar Respublikası Mərkəzi Seçki Komissiyasının sədri Məhərrəm Qasımov yekun vurub.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.