SİYASƏT


Naxçıvan Muxtar Respublikası Psixi və Ağciyər Xəstəlikləri dispanserlərinə, Onkoloji və Yoluxucu Xəstəliklər mərkəzlərinə bayram sovqatı aparılıb

Naxçıvan, 31 dekabr, AZƏRTAC

Muxtar respublikada xüsusi diqqətə ehtiyacı olan insanlarla bayram günlərində həmrəylik nümayiş olunur, onlara sovqatlar aparılır.

Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, dekabrın 31-də Naxçıvan Muxtar Respublikası Ali Məclisinin Sədri Vasif Talıbov Psixi Xəstəliklər Dispanserinə gəlib, səhiyyə ocağındakı xəstələri və tibb işçilərini Dünya Azərbaycanlılarının Həmrəylik Günü və Yeni il bayramı münasibətilə təbrik edərək deyib: Xəstəliklərin vaxtında aşkar olunması və qarşısının alınması cəmiyyətin hər bir üzvünün sağlamlığının qorunmasına xidmət edir. Ona görə də muxtar respublikada xəstəliklərin qarşısının alınması istiqamətində ardıcıl tədbirlər görülür. Psixi və Ağciyər Xəstəlikləri dispanserlərinin, Onkoloji və Yoluxucu Xəstəliklər mərkəzlərinin müasir binalarda fəaliyyət göstərməsi, lazımi tibbi avadanlıqlar və dərman vasitələri ilə təmin olunması da bu sahədə görülən işlərin davamıdır. Səhiyyə müəssisələrinin fəaliyyəti bundan sonra da daim diqqət mərkəzində saxlanacaq. Həkim və tibb işçiləri səhiyyə maarifi işinə diqqəti artırmalı, xəstələrə hərtərəfli tibbi xidmət göstərməli, onlar cəmiyyətin sağlam üzvünə çevrilməlidirlər.

Ali Məclisin Sədri Psixi və Ağciyər Xəstəlikləri dispanserlərinin, Onkoloji və Yoluxucu Xəstəliklər mərkəzlərinin kollektivlərinə çətin və şərəfli işlərində uğurlar arzulayıb.

Həkim və tibb işçiləri yaradılan şəraitə və göstərilən diqqətə görə minnətdarlıq ediblər.

Sonra Ali Məclisin Sədri tibbi xidmətin təşkili ilə maraqlanıb.

Məlumat verilib ki, Psixi və Ağciyər Xəstəlikləri dispanserləri, Onkoloji və Yoluxucu Xəstəliklər mərkəzləri vaxtlı-vaxtında dərman vasitələri ilə təmin olunur. Muxtar respublikada bu kateqoriyadan olan xəstələrin qeydiyyata alınması və tibbi müayinədən keçirilməsinə ciddi diqqət yetirilir. Tibbi xidmətin düzgün təşkilinin və aparılan səhiyyə maarifi işinin nəticəsidir ki, muxtar respublikada psixi, onkoloji və yoluxucu xəstəliklərin sayında azalma müşahidə olunur.

Sonra Naxçıvan Muxtar Respublikası Psixi və Ağciyər Xəstəlikləri dispanserlərində, Onkoloji və Yoluxucu Xəstəliklər mərkəzlərində müalicə alan xəstələrə və tibb işçilərinə 500-ə yaxın hədiyyə paketi paylanılıb, gətirilmiş ərzaq məhsulları anbarlara təhvil verilib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.