REGİONLAR
“Naxçıvan: dünən və bu gün” yaradıcılıq müsabiqəsi qaliblərinin mükafatlandırılması mərasimi keçirilib VİDEO
Naxçıvan, 16 dekabr, AZƏRTAC
Dekabrın 16-da Naxçıvan şəhərindəki Gənclər Mərkəzində Naxçıvan Muxtar Respublikası Ali Məclisinin Sədri yanında Bilik Fondu və Naxçıvan Muxtar Respublikası Ali Məclisinin Sədri yanında Gənclər Fondu tərəfindən keçirilən “Naxçıvan: dünən və bu gün” yaradıcılıq müsabiqəsi qaliblərinin mükafatlandırma mərasimi keçirilib.
Əvvəlcə tədbirin aparıcıları Azərbaycan xalqının ümummilli lideri Heydər Əliyevin ölkəmizin, o cümlədən Naxçıvan Muxtar Respublikasının çoxşaxəli inkişafı, təhlükəsizliyinin təmin olunması istiqamətində gördüyü işlərdən, müstəqillik illərində Naxçıvanda həyata keçirilən genişmiqyaslı quruculuq tədbirlərindən danışıblar. Qeyd olunub ki, bu gün muxtar respublika sosial-iqtisadi baxımdan sürətlə inkişaf edir. Naxçıvanda ictimai həyatın bütün sahələrinin yeniləşdirilməsi yaradıcılıq təşkilatlarını, kütləvi informasiya vasitələrini də əhatə edib.
Naxçıvan Muxtar Respublikası Ali Məclisinin Sədri yanında Gənclər Fondunun icraçı direktoru Məmməd Babayev çıxışında bildirib ki, dövlət gənclər siyasəti bu gün Naxçıvan Muxtar Respublikasında uğurla həyata keçirilir. Son illər gənclərimizin muxtar respublikanın ictimai-siyasi, iqtisadi və mədəni həyatında fəal iştirakı, gənclər siyasətinin bütün istiqamətləri üzrə müvafiq dövlət proqramlarının uğurla reallaşdırılması, gənc istedadların dövlət qayğısı ilə əhatə olunması gənclər siyasətinin həyata keçirilməsi istiqamətində görülən tədbirlərdir.
Qeyd olunub ki, teleradio verilişi, qəzet məqaləsi, rəsm əsəri, ədəbi yaradıcılıq, musiqi və elmi məqalə kateqoriyaları üzrə keçirilən müsabiqəyə 81 iştirakçı tərəfindən 21 teleradio verilişi və videoçarx, 28 qəzet məqaləsi, 21 rəsm əsəri, 15 ədəbi yaradıcılıq və 12 elmi məqalə olmaqla, ümumilikdə, 97 material təqdim olunub. Naxçıvan Muxtar Respublikası Ali Məclisinin Sədri yanında Bilik Fondu və Gənclər Fondu tərəfindən keçirilən müsabiqənin Naxçıvan Muxtar Respublikası Yazıçılar Birliyi, Naxçıvan Muxtar Respublikası Rəssamlar Birliyi və Naxçıvan Mətbuat Şurasının nümayəndələrindən təşkil olunmuş münsiflər heyəti formalaşdırılıb. Müsabiqəyə təqdim olunan işlər bədii səviyyəsi və keyfiyyəti, ideyanın orijinallığı, savadlı kompozisiya həlli, işin təsiredici qüvvəyə malik olması, mövzunun asan qavranılması, yaradıcı yanaşma və digər meyarlar əsasında qiymətləndirilərək qaliblər müəyyənləşdirilib. Müsabiqənin əsasnaməsinə uyğun olaraq, 1 birinci, 2 ikinci, 3 üçüncü və 4 həvəsləndirici yer müəyyənləşdirilib.
Naxçıvan Muxtar Respublikası Ali Məclisi Aparatının humanitar siyasət məsələləri və ictimai təşkilatlarla iş şöbəsinin müdiri Rəhman Məmmədov çıxışında deyib ki, Naxçıvan Muxtar Respublikası ötən müddət ərzində böyük inkişaf yolu keçib. Muxtar respublikada genişmiqyaslı tikinti və quruculuq işləri aparılıb, yollar, körpülər, müasir binalar salınıb və ya yenidən qurulub, istehsal müəssisələri yaradılıb, on minlərlə yeni iş yeri açılıb, iqtisadiyyatın sürətli inkişafı təmin olunub. Məktəblər, xəstəxanalar, idman kompleksləri inşa edilib, elektrik, qaz və su təminatı yaxşılaşdırılıb, bir sözlə, bütün sahələrdə əsaslı inkişaf əldə olunub. Muxtar respublikanın şəhər mərkəzləri ilə yanaşı, kənd yaşayış məntəqələrində də infrastruktur yenilənib, müasir məktəb binaları, həkim ambulatoriyaları, kənd və xidmət mərkəzləri istifadəyə verilib, kənd əhalisinin sosial rifah halı yaxşılaşdırılıb.
“Naxçıvan Muxtar Respublikasının sürətli sosial-iqtisadi inkişafı ilə yanaşı, tarixi abidələrə, mədəniyyətə, incəsənətə qayğı da yüksək səviyyədə olmuş, tarixi abidələrin qorunması, bərpası, tədqiqi və təbliği sahəsində mühüm işlər görülmüşdür. İkinci ömrünü yaşayan tarix-mədəniyyət abidələri heç vaxt indiki qədər diqqət və qayğı ilə əhatə olunmamış, xalqımıza tanıdılmamış, təbliğ edilməmişdir”, - deyən Rəhman Məmmədov bildirib ki, görülən işlər sayəsində Naxçıvan Muxtar Respublikası tarixi simasını saxlamaqla, günü-gündən dəyişir, yeniləşir, müasirləşir, inkişaf edir. Naxçıvanda inkişafın, müasirliyin, birliyin və həmrəyliyin nümunəsi formalaşır. Bu nümunənin işığında isə yaradıcı, fəal gənclik yetişir. Müasir gənclik intellektual və yaradıcılıq potensiallarını daim artırır, təhsildə və idmanda uğurlar qazanır, müxtəlif dövlət orqanlarında, icra strukturlarında, özəl bölmədə geniş təmsil olunur.
Vurğulanıb ki, muxtar respublikanın bu gününü dünənindən fərqləndirən əsas xüsusiyyətlərdən biri də söz, fikir və mətbuat azadlığının təmin olunması, kütləvi informasiya vasitələrinin və digər yaradıcılıq təşkilatlarının fəaliyyətinin gücləndirilməsidir. Ötən müddət ərzində muxtar respublikada gənc alim, jurnalist və rəssamların yetişməsi, ədəbi mühitin inkişafı diqqət mərkəzində saxlanılıb, onların yaradıcılıq imkanları xeyli genişləndirilib. Yaradıcılıq təşkilatlarının maddi-texniki bazasının gücləndirilməsi ilə yanaşı, həm də bu sahədə çalışanlara daim mənəvi dəstək verilib, onların fəaliyyəti yüksək qiymətləndirilib. Artıq muxtar respublikadakı mövcud yaradıcılıq mühiti hər kəsə istənilən mövzuda sərbəst material hazırlamağa, araşdırma aparmağa imkan verir. Bunun da nəticəsində muxtar respublika reallıqları televiziya və mətbuat orqanlarında, rəsm və ədəbi yaradıcılıq nümunələrində olduğu kimi əksini tapır.
Rəhman Məmmədov deyib: “Naxçıvan Muxtar Respublikası Ali Məclisinin Sədri yanında Bilik Fondunun təşkilatçılığı ilə keçirilən “Naxçıvan: dünən və bu gün” yaradıcılıq müsabiqəsinin əsas məqsədi də muxtar respublikanın inkişaf tarixinə nəzər salmaq, bu sahədəki yaradıcılıq fəaliyyətinə dəstək vermək, iştirakçıların bacarıqlarını və ideyalarını üzə çıxarmaqdan ibarət olmuşdur. Müsabiqəyə 81 iştirakçı tərəfindən 97 material daxil olmuşdur. Sevindirici haldır ki, müsabiqədə gənclər fəallıq göstərmiş, Naxçıvanın dünəni ilə bu gününü təqdim etdikləri materiallarda geniş müqayisə etmişlər”.
Naxçıvan Muxtar Respublikası Ali Məclisi Aparatının Humanitar siyasət məsələləri və ictimai təşkilatlarla iş şöbəsinin müdiri “Naxçıvan: dünən və bu gün” yaradıcılıq müsabiqəsinin qaliblərini təbrik edib, müsabiqə iştirakçılarına uğurlar arzulayıb.
Sonra Naxçıvan Muxtar Respublikası Ali Məclisinin Sədri yanında Bilik Fondunun Himayəçilik Şurasının üzvü, Naxçıvan Muxtar Respublikası Yazıçılar Birliyinin sədri Asim Əliyev, Naxçıvan Muxtar Respublikası Dövlət Televiziya və Radio Verilişləri Komitəsinin sədri Sahil Tahirli, “Şərq qapısı” qəzetinin baş redaktoru Tural Səfərov çıxış ediblər.
Çıxışlarda bildirilib ki, Naxçıvanın dünəni ilə bu günü arasında müqayisəolunmaz fərqlər var. Blokadadan yüksək inkişafa, tərəqqiyə doğru addımlayan muxtar respublikamız nümunəvi bir regiona çevrilib. İqtisadi və nəqliyyat əlaqələrinin məhdud olduğu şəraitdə yüksək iqtisadi fəallığa nail olunması, istehsal potensialının hərəkətə gətirilməsi, davamlı quruculuq işləri, sosial problemlərin həlli və ən əsası əhalinin rifah halının yaxşılaşdırılması inkişafın Naxçıvan modelinin xarakterik xüsusiyyətləridir. Blokadanın çətinliklərinə baxmayaraq, muxtar respublikada böyük quruculuq proqramı gerçəkləşdirilib, bütün sahələrdə mühüm nailiyyətlər əldə olunub. Müasir Naxçıvan ümummilli liderimiz Heydər Əliyevin görmək istədiyi kimi qurulur, inkişaf edir və müasirləşir.
Diqqətə çatdırılıb ki, muxtar respublika mediası da bu gün inkişaf dövrünü yaşayır. Naxçıvan teleradiosu son illər əsl inkişafa qovuşub, onun maddi-texniki bazası xeyli gücləndirilib, binası əsaslı yenidənqurmadan sonra istifadəyə verilib, ən müasir texniki avadanlıqlarla təchiz edilib. Muxtar respublikada yeni yayım avadanlıqlarının tətbiqi nəticəsində analoq yayım yüksəkkeyfiyyətli rəqəmsal yayımla əvəzlənib, Naxçıvan televiziyasının yüksəkkeyfiyyətli HD formatda yayımına başlanıb. Bu il noyabrın 17-dən isə televiziya internet üzərindən yayımlamır. Muxtar respublikanın mətbuatı da diqqət və qayğı ilə əhatə olunub. Naxçıvan Muxtar Respublikası Ali Məclisi Sədrinin “Naxçıvan Muxtar Respublikasında dövlət mətbuat orqanlarının maddi-texniki vəziyyətini yaxşılaşdırmaq tədbirləri haqqında” 2000-ci il 29 mart tarixli Sərəncamından sonra mətbuat orqanlarının maddi-texniki bazası daha da gücləndirilib. Milli mətbuatımızın 135 illik yubileyində “Şərq qapısı” qəzeti redaksiyası və “Əcəmi” Nəşriyyat-Poliqrafiya Birliyi üçün yeni redaksiya-nəşriyyat kompleksi istifadəyə verilib, əməkdaşlara müasir iş şəraiti yaradılıb, qəzetlərin rəngli nəşrinə başlanıb.
Çıxış edənlər qalibləri təbrik edib, onlara yeni-yeni uğurlar arzulayıblar.
Müsabiqənin nəticələrinə əsasən Azərbaycan Milli Elmlər Akademiyası Naxçıvan Bölməsinin folklorşünaslıq şöbəsinin müdiri şair Elxan Məmmədov birinci, AZƏRTAC-ın Naxçıvan Muxtar Respublikasındakı bürosunun rəhbəri Rauf Əliyev və Naxçıvan Muxtar Respublikası Dövlət Televiziya və Radio Verilişləri Komitəsinin əməkdaşları Fərhad Zamanbəyov və Elçin Məmmədov ikinci, “Şərq qapısı” qəzetinin müxbiri Səbuhi Hüseynov, Naxçıvan Dövlət Universitetinin mətbuat şöbəsinin müdiri Mehriban Sultan və rəssam Mirilqar Seyidov üçüncü yerə layiq görülüblər. Qaliblərə pul mükafatı və diplomlar təqdim olunub.
“Oğuz səsi” qəzetinin baş redaktoru Şəhla Nəbiyevaya, Naxçıvan Muxtar Respublikası Dövlət Televiziya və Radio Verilişləri Komitəsinin müəllif proqramları və xüsusi layihələr redaksiyasının baş redaktoru Ruhiyyə Rəsulovaya, rəssam Gülçöhrə Bağırovaya, Naxçıvan Dövlət Radiosunun əməkdaşı Türkanə Ağayevaya həvəsləndirici mükafatlar verilib.
Müsabiqənin bütün iştirakçılarına xüsusi diplomlar təqdim olunub.
Tədbirdə Naxçıvan Musiqi Kollecinin “Gənclik” instrumental ansamblının müşayiəti ilə kollecin müəllimi Samir İsmayılovun ifasında səsləndirilən “Xalq Heydər söyləyəcək”, “Naxçıvan”, kollecin tələbəsi Əfsanə Babayevanın ifa etdiyi “Dinlə məni, sevgilim” mahnıları, kollecin tələbələrinin “Yallı” rəqsi iştirakçılar tərəfindən alqışlarla qarşılanıb.
AZƏRTAC-ın Naxçıvan Muxtar Respublikasındakı bürosu