Naxçıvan, 16 mart, AZƏRTAC

Martın 16-da “Ölkəmizi tanıyaq” maarifləndirici tur-aksiya çərçivəsində Bakı şəhərindən 162 məktəbli 18 bələdçi-müəllimin müşayiəti ilə Naxçıvan Muxtar Respublikasına gəlib.

AZƏRTAC xəbər verir ki, məktəblilər əvvəlcə ümummilli lider Heydər Əliyevin Naxçıvan şəhərinin baş meydanında əzəmətlə ucalan abidəsini ziyarət ediblər.

Sonra şagirdlər Heydər Əliyev Muzeyinə gələrək buradakı eksponatlarla tanış olublar. Məlumat verilib ki, bu gün muzeyin fondunda Ulu Öndərin həyat və fəaliyyətini əks etdirən 4600-dən çox eksponat toplanıb. Muzey Naxçıvan Muxtar Respublikası Ali Məclisi Sədrinin 1999-cu il fevralın 18-də imzaladığı Sərəncam əsasında yaradılıb və 1999-cu il mayın 10-da fəaliyyətə başlayıb.

Muzeydə ümummilli lider Heydər Əliyevin uşaqlıq və gənclik illərinə həsr olunmuş stendlər, onun Naxçıvan Muxtar Respublikası Ali Məclisinin Sədri işlədiyi dövrə aid (1991-1993) şəxsi sənəd və materiallar, imzaladığı sərəncamlar, qərarlar, Türkiyə Cümhuriyyəti və İran İslam Respublikası ilə əməkdaşlıq sahəsində imzaladığı müqavilələrin surətləri, həmin illərdə Azərbaycan Respublikasının müxtəlif bölgələrində yaşayan vətəndaşların müraciətləri toplanıb. Muzeyin kitabxanasında ümummilli lider Heydər Əliyevin həyat və fəaliyyətini əks etdirən jurnal, albom və kitablar saxlanılır.

“Xan Sarayı” Dövlət Tarix-Memarlıq, Möminə Xatın və Açıq Səma Altında Muzey Kompleksi ilə tanışlıq “Ölkəmizi tanıyaq” tur-aksiyasının iştirakçılarında böyük marağa səbəb olub.

Naxçıvan şəhərindəki Əcəmi seyrəngahında açıq səma altında nümayiş etdirilən daş abidələr şagirdlərdə xoş təəssürat yaradıb. Onlar Naxçıvan Muxtar Respublikasının ərazisindən tapılan müxtəlif dövrlərə aid 450 maddi-mədəniyyət nümunəsinə – daşdan düzəldilmiş qoç heykəllərə, daş kitabələrə, müxtəlif daş fiqurlara, qəbirüstü sənduqələrə baxıb, maddi-mədəniyyət nümunələri barədə ətraflı məlumatlar əldə ediblər.

Azərbaycan milli memarlığının möhtəşəm abidəsi, Şərq memarlığı incilərindən biri olan Möminə xatın türbəsi ilə tanışlıq da məktəblilərdə xoş təəssürat yaradıb. Burada tur-aksiya iştirakçılarına məlumat verilib ki, türbə Azərbaycanın Atabəylər dövlətinin banisi Şəmsəddin Eldənizin göstərişi ilə 1186-cı ildə tikilib. Həyat yoldaşı Möminə xatının məzarı üzərində ucaldılmış məqbərə tanınmış memar Əcəmi Əbubəkr oğlu Naxçıvani tərəfindən inşa olunub. Bəzi tədqiqatçılara görə, sərdabədə Atabəylər dövlətinin başçısı Şəmsəddin Eldəniz və oğlu Məhəmməd Cahan Pəhləvan da dəfn olunub. Abidənin baş tağında kufi xətti ilə bu sözlər həkk olunub: “Biz gedirik, ancaq qalır ruzigar. Biz ölürük, əsər qalır yadigar”.

Xan sarayında tur-aksiya iştirakçılarına məlumat verilib ki, bu muzey Naxçıvan xanlığının milli dövlətçiliyimizdəki rolu, Azərbaycanın bu ərazisindəki torpaqlarının qorunub saxlanılmasındakı xidmətləri nəzərə alınaraq yaradılıb. Hazırda 8 ekspozisiya zalından ibarət olan muzeydə minədək eksponat var. Eksponatlar içərisində arxiv sənədləri, fotoşəkillər, Naxçıvan xanlarının şəcərəsi, xanlığın xəritəsi nümayiş etdirilir.

Sonra bakılı şagirdlər “Naxçıvan” Universitetinə gəliblər. Bildirilib ki, 1999-cu ildən fəaliyyət göstərən universitetdə hazırda 4 fakültə, 9 kafedra və 5 şöbə var. 2015-ci il sentyabrın 15-də - Bilik günündə “Naxçıvan” Universiteti üçün inşa olunan yeni universitet şəhərciyi istifadəyə verilib. Universitet şəhərciyinə rektorluq binası, iki tədris korpusu, kitabxana, sosial xidmət mərkəzi, yataqxana, idman və konfrans zalları daxildir. Bu gün universitetdə təhsilin keyfiyyəti yüksəldilir, ixtisas fənləri üzrə elmi dərəcəsi olan müəllimlərə üstünlük verilir, tədris zamanı müasir təlim texnologiyalarından istifadə diqqətdə saxlanılır. “Naxçıvan” Universitetinin beynəlxalq əlaqələri də genişləndirilib. Bu gün ali təhsil ocağı dünyanın 50-dən çox tanınmış universiteti ilə əməkdaşlıq edir.

Bizimlə söhbətində tur-aksiya iştirakçıları Naxçıvana səfərlərindən məmnunluq ifadə etdilər. Bakı şəhərinin Xəzər rayonunun 136 nömrəli məktəbin 10-cu sinif şagirdi Aysel Mayılova bildirib ki, “Ölkəmizi tanıyaq” tur-aksiyası çərçivəsində Naxçıvan Muxtar Respublikasına gəlməyinə çox sevinir. O deyib: “Naxçıvanın qədim tarixi abidələri və gözəl təbiəti haqqında çox eşitmişdim. Amma bunu öz gözlərimlə görməmişdim. Naxçıvan şəhərinin təmizliyi, gözəlliyi, insanların gülərüz və qonaqpərvər olması məni valeh etdi. Bu cür tur-aksiyaların təşkil olunması hər bir məktəbli üçün əla fürsətdir. Çünki biz Azərbaycanın tarixi dövlətçiliyinin beşiyi olan muxtar respublika ilə tanış olmaqla, həm də qədim tariximizi və mədəniyyətimizi daha yaxından öyrənmək imkanı qazanırıq”.

Bakı şəhərinin Nəsimi rayonunun 111 nömrəli məktəbinin 9-cu sinif şagirdi Anar Quliyev isə qeyd edib ki, qədim Naxçıvan diyarı ilə yaxından tanış olmaq imkanı əldə etdiyi üçün sevinir: “Bu gün Naxçıvanın bir neçə qədim tarixi abidəsi, mədəniyyət və təhsil müəssisələri ilə tanışlıq məndə xoş təəssürat oyatdı. Naxçıvan torpağı mənim üçün çox əzizdir, çünki bura həm də ümummilli liderimiz Heydər Əliyevin doğulub boya-başa çatdığı diyardır. Mən çox sevinirəm ki, dahilər yurdunu görmək imkanı qazanmışam. Buna görə belə bir tur-aksiyanın təşəbbüskarı olan Azərbaycan Prezidenti İlham Əliyevə minnətdaram”.

Tur-aksiya iştirakçılarının Naxçıvan Muxtar Respublikası ilə tanışlığı davam edir.