Naxçıvan, 28 iyul, Rauf Əliyev, AZƏRTAC

İyulun 28-də Naxçıvan Şəhər İcra Hakimiyyətində 2015-ci ilin birinci yarısının yekunlarına və dördüncü çağırış Naxçıvan Muxtar Respublikası Ali Məclisinin on birinci sessiyasında qarşıya qoyulan vəzifələrin icrasına həsr olunmuş yığıncaq keçirilib.

AZƏRTAC xəbər verir ki, Naxçıvan Şəhər İcra Hakimiyyətinin başçısı Vüqar Səfərov tədbiri açaraq qarşıya qoyulan vəzifələrdən danışıb.

Naxçıvan Şəhər İcra Hakimiyyəti başçısının müavini Səyahət İmanov çıxış edərək bildirib ki, ümummilli liderimiz Heydər Əliyevin əsasını qoyduğu sosial-iqtisadi inkişaf strategiyası bu gün Azərbaycan Respublikasının Prezidenti İlham Əliyev tərəfindən uğurla davam etdirilir, ölkəmizin regionlarında bütün sahələrdə inkişafa nail olunur. Naxçıvan Muxtar Respublikası da Ali Məclisin Sədri Vasif Talıbovun rəhbərliyi ilə son 20 ildə iqtisadiyyatın, sosial-mədəni həyatın bütün sahələrində yüksək nailiyyətlər əldə edib, özünün dinamik inkişaf mərhələsinə qədəm qoyub.

Qeyd olunub ki, əvvəlki illərdə olduğu kimi, 2015-ci ilin ilk 6 ayında da Naxçıvan şəhərinin ictimai və təsərrüfat həyatında abadlıq-quruculuq işlərinin geniş vüsət alması sosial-iqtisadi sahədə əldə olunan uğurlara rəvac verib. Naxçıvan Şəhər İcra Hakimiyyəti bu dövr ərzində iqtisadiyyatın, sənayenin, sosial-mədəni və infrastruktur sahələrinin inkişafı, məşğulluğun səviyyəsinin artırılması istiqamətində bir sıra işlər görüb. Ötən dövrdə Naxçıvan şəhərində abadlıq, bərpa, tikinti-quraşdırma işləri ön plana çəkilərək müxtəlif istiqamətli obyektlərin tikintisi və yenidən qurulması, İslam Səfərli, Nizami küçələrində asfalt beton örtüyünün salınması başa çatdırılıb. Hazırda bir neçə obyektdə və Naxçıvan şəhərinin küçələrində tikinti və yenidənqurma işləri davam etdirilir. Ötən dövr ərzində iqtisadiyyatın və sosial sahələrin inkişafı üçün bütün maliyyə mənbələrindən əsas kapitala 370 milyon 677 min 900 manat investisiya qoyulub. Tikinti-quraşdırma işlərində istifadə olunmuş investisiyanın həcmi keçən ilin müvafiq dövrü ilə müqayisədə 3 faiz artaraq 322 milyon 683 min 300 manat təşkil edib.

Diqqətə çatdırılıb ki, Naxçıvan şəhərinin keyfiyyətli içməli su ilə təmin edilməsi, kanalizasiya sistemlərinin yenidən qurulması istiqamətində bir sıra işlər görülüb, yeni çəkilmiş xətlər əhalinin istifadəsinə verilib. 1 iyul 2015-ci ilə 224,8 kilometr məsafədə su, 218,9 kilometr məsafədə kanalizasiya xətləri çəkilib. 21 min 134 sayğac quraşdırılıb, 20 min 771 evə kanalizasiya xətti çəkilib. Sahibkarlığın dəstəklənməsi, yeni istehsal sahələrinin yaradılması icra hakimiyyətinin diqqətdə saxladığı sahələrdən biri olub. 2015-ci ilin yanvar-iyun aylarında 360 milyon 331 min 400 manatlıq sənaye məhsulu istehsal edilib ki, bu da keçən ilin müvafiq dövrü ilə müqayisədə 3,4 faiz çoxdur.

Səyahət İmanov bildirib ki, Naxçıvan şəhərində qeyri-məşğul əhalinin məşğulluğuna nail olunması üçün ötən dövrdə bir sıra işlər görülüb. Bu ilin 6 ayı ərzində işsiz kimi qeydə alınmış 391 nəfərdən 291-i işlə təmin edilib, bunlardan 86 nəfəri qadındır. 30 nəfər isə ictimai işə cəlb olunub, 2 nəfər kvota (norma) yerlərinə göndərilib, 52 nəfər peşə hazırlığı kursları keçib.

Vurğulanıb ki, ötən dövrdə Naxçıvan Şəhər İcra Hakimiyyətində vətəndaşların ərizə və şikayətlərinə baxılması, onların qəbulu işinə də xüsusi diqqət yetirilib.

Daha sonra Naxçıvan Şəhər Maliyyə Şöbəsinin müdiri Aqil Nəsirovun, Naxçıvan Şəhər Statistika İdarəsinin müdiri Vahid Həsənovun çıxışları dinlənilib.

Yığıncağa Naxçıvan Şəhər İcra Hakimiyyətinin başçısı Vüqar Səfərov yekun vurub.