REGİONLAR
Naxçıvan şəhərinin istilik təsərrüfatı qış mövsümünə hazırdır
Naxçıvan, 27 oktyabr, AZƏRTAC
Naxçıvan şəhərinin istilik təsərrüfatı qış mövsümünə tam hazırdır. Payız-qış mövsümünə hazırlıqla əlaqədar olaraq Naxçıvan Şəhər İstilik Təsərrüfatı İdarəsinin əməkdaşları tərəfindən şəhərdəki bütün qazanxanalara və istilik şəbəkəsi obyektlərinə baxış keçirilib.
AZƏRTAC xəbər verir ki, mərkəzləşdirilmiş qazanxanalarda cari təmir işləri aparılıb, sıradan çıxmış mühərriklər yenisi ilə əvəz edilib, elektrik və qaz xətləri yoxlanılıb. İstismar müddəti başa çatan borular və siyirtmələr yeniləri ilə əvəz olunub.
Hazırda Naxçıvan şəhərində 5 mərkəzləşdirilmiş və 38 fərdi qazanxana vasitəsilə 173 ictimai yaşayış binasının 7 min 634 mənzili və 30 inzibati bina istiliklə təmin edilir.
Son günlər havaların soyuması ilə əlaqədar Naxçıvan şəhərindəki məktəb və uşaq bağçalarına aid qazanxanalar artıq işə salınıb.
Xatırladaq ki, bu il avqustun 26-da Naxçıvan Muxtar Respublikası Ali Məclisində 2016-2017-ci illərin payız-qış mövsümünə hazırlıq və qarşıda duran vəzifələrlə əlaqədar müşavirə keçirilib. Müşavirədə qarşı qoyulan vəzifələrin yerinə yetirilməsi üçün Naxçıvan şəhərinin istilik təsərrüfatında ardıcıl tədbirlər görülür.