REGİONLAR


Naxçıvanda Milli Mətbuat Günü qeyd olunub

A+ A

Naxçıvan, 23 iyul, AZƏRTAC

Naxçıvan şəhərində Azərbaycan milli mətbuatının yaranmasının 141-ci ildönümü münasibətilə tədbir keçirilib.

AZƏRTAC xəbər verir ki, tədbirdə “Şərq qapısı” qəzetinin baş redaktoru Tural Səfərov, “Əcəmi” Nəşriyyat-Poliqrafiya Birliyinin direktoru Məmmədrza Ələsgərov, “Nuh yurdu” qəzetinin redaktoru Qafar Qənbərov, “Şərq qapısı” qəzetinin əməkdaşı Sara Əzimova çıxış ediblər.

Bildirilib ki, görkəmli maarifçi və publisist Həsən bəy Zərdabi tərəfindən nəşr olunmağa başlayan “Əkinçi” qəzeti ilə əsası qoyulmuş Azərbaycan milli mətbuatı xalqımızın maariflənməsində mühüm rol oynayıb. Bu gün ölkəmizdə mətbuatın inkişafı ümummilli lider Heydər Əliyevin adı ilə bağlıdır. Xalqımızın böyük oğlunun respublikamıza rəhbərlik etdiyi bütün dövrlərdə mətbuat orqanlarının müstəqil fəaliyyəti və inkişafı yolunda süni maneələrin aradan qaldırılması, qanunvericilik bazasının təkmilləşdirilməsi, kütləvi informasiya vasitələrinin maddi-texniki bazasının gücləndirilməsi istiqamətində ardıcıl tədbirlər həyata keçirilib. Ulu öndər Heydər Əliyevin yolunu uğurla davam etdirən Azərbaycan Prezidenti İlham Əliyev tərəfindən kütləvi informasiya vasitələrinin inkişafı sahəsində ardıcıl tədbirlər görülür.

Vurğulanıb ki, Naxçıvan Muxtar Respublikasında da mətbuata böyük diqqət və qayğı göstərilir. Naxçıvan Muxtar Respublikası Ali Məclisi Sədrinin 2000-ci il martın 29-da “Naxçıvan Muxtar Respublikasında dövlət mətbuat orqanlarının maddi-texniki vəziyyətini yaxşılaşdırmaq tədbirləri haqqında” Sərəncamından sonra mətbuat orqanlarının maddi-texniki bazası daha da gücləndirilib. Milli mətbuatımızın 135 illik yubileyində “Şərq qapısı” qəzeti redaksiyası və “Əcəmi” Nəşriyyat-Poliqrafiya Birliyi üçün yeni redaksiya-nəşriyyat kompleksi istifadəyə verilib, müasir iş şəraiti yaradılıb, qəzetlərin rəngli nəşrinə başlanılıb. 2011-ci ilin noyabr ayında “Şərq qapısı” qəzetinin 90 illik yubileyi qeyd olunub, Naxçıvan Muxtar Respublikası Ali Məclisinin Sədri Vasif Talıbov qəzetin 90 illik yubileyi münasibətilə “Şərq qapısı” qəzetinin və “Əcəmi” Nəşriyyat-Poliqrafiya Birliyinin kollektivləri ilə görüşüb, qəzet Naxçıvan Muxtar Respublikası Ali Məclisinin Fəxri Fərmanı ilə təltif edilib.

İyulun 22-si tarixinin həm də ulu öndər Heydər Əliyevin 1990-cı ildə Naxçıvana qayıtdığı gün kimi önəmli olduğunu qeyd edən natiqlər bildiriblər ki, əgər o tarixi qayıdış olmasaydı, bu gün nə güclü, qüdrətli müstəqil Azərbaycan dövləti olacaqdı, nə də milli mətbuatımız belə yüksək inkişaf mərhələsi keçəcəkdi.

Sonda bir qrup mətbuat işçisinə hədiyyələr təqdim olunub.

Tədbir çay süfrəsi arxasında davam etdirilib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.