Naxçıvan, 6 may, AZƏRTAC

Naxçıvan Dövlət Universitetində (NDU) “Müasir arıçılıq: nəzəriyyə və praktika” mövzusunda beynəlxalq elmi-praktik konfransda əhəmiyyətli elmi məruzələr dinlənilib, bu sahədə olan problemlərin aradan qaldırılması yolları müzakirə olunub, iştirakçıları maraqlandıran suallara aydınlıq gətirilib.

NDU-nun mətbuat şöbəsindən AZƏRTAC-a bildirilib ki, Naxçıvan Muxtar Respublikası Ali Məclisinin Sədri Vasif Talıbovun təşəbbüsü ilə keçirilən beynəlxalq konfransda universitetin müəllim və tələbələri ilə yanaşı, muxtar respublikanın müvafiq dövlət orqanlarından nümayəndələr, ölkəmizin ali təhsil ocaqlarından, həmçinin Türkiyənin İğdır Universitetindən dəvət olunan alimlər, arıçı sahibkarlar iştirak ediblər.

Beynəlxalq elmi-praktik konfransı universitetin rektoru, AMEA-nın müxbir üzvü Saleh Məhərrəmov açaraq, Azərbaycanda qədim tarixə malik arıçılığın X-XII əsrlərdə daha da inkişaf etdiyini, arıçılığın halallıq və zəhmət sevən əsas aqrar sahələrdən biri olduğunu bildirib.

Qeyd edilib ki, regionda kənd təsərrüfatının digər sahələri kimi, arıçılığın da inkişafı dövlət qayğısı ilə əhatə olunub. Bu sahə ilə məşğul olan sahibkarlara dövlət tərəfindən güzəştli kreditlər verilir, arıçılıq məhsullarının idxal və ixracına əlverişli şərait yaradılıb.

Konfransda çıxış edən Naxçıvan Muxtar Respublikasının kənd təsərrüfatı naziri Elşad Əliyev Naxçıvan Muxtar Respublikasında arıçılığın inkişafından və bu sahəyə göstərilən dövlət qayğısından danışıb. Nazir bildirib ki, aqrar islahatların aparılması, yeni mülkiyyət münasibətlərinə əsaslanan təsərrüfat qurumlarının inkişafı istiqamətində görülən işlər kənd təsərrüfatında dinamik inkişafın əsasını qoyub. Naxçıvan Muxtar Respublikasında arı ailələrinin artırılması, eləcə də məhsuldarlığının yüksəldilməsi üçün davamlı tədbirlər görülür. Bu sahənin inkişaf etdirilməsi üçün son beş ildə banklar tərəfindən arıçılıqla məşğul olan sahibkarlara 2 milyon 313 min manat həcmində kreditlər verilib. Bütövlükdə, 2000-2015-ci illər ərzində dövlətin maliyyə dəstəyi ilə 103 arıçılıq layihəsi həyata keçirilib, muxtar respublikanın Sahibkarlığa Kömək Fondunun güzəştli kreditləri hesabına 16 mindən artıq arı ailəsi alınıb.

Elşad Əliyev qeyd edib ki, 2016-cı il 1 yanvar tarixinə arı ailələrinin sayı 70 min 396-ya çatdırılaraq, bir il öncəki göstəricini 1,4 faiz üstələyib.

“Naxçıvan Muxtar Respublikasında bütün sahələrdə olduğu kimi, arıçılığın da inkişafı ön plana çəkilir, eyni zamanda, bölgənin əlverişli iqlimi arıçılığın inkişaf etdirilməsinə böyük təsir göstərir”, - bu fikirləri Azərbaycan Dövlət Pedaqoji Universitetinin ekologiya kafedrasının professoru Rauf Sultanov “Naxçıvan Muxtar Respublikasında arıçılığın yetişdirmə istiqamətində inkişaf perspektivləri” mövzusundakı məruzəsində səsləndirib.

Naxçıvan Muxtar Respublikasının Dövlət Baytarlıq Xidmətinin rəisi Əbil Əbilov “Arı xəstəlikləri ilə mübarizə tədbirləri” mövzusundakı məruzəsində arıçılığın gəlirli sahəyə çevrilməsi üçün arı ailələrinin bəslənməsi, çoxaldılması, məhsuldarlığının artırılması məqsədilə arı xəstəliklərinin vaxtında aşkarlanması, yaranma səbəblərinin aydınlaşdırılması və onlara qarşı mübarizə tədbirlərindən bəhs edib.

NDU-nun təməl tibb fənləri kafedrasının müdiri, biologiya üzrə fəlsəfə doktoru, dosent Elsevər Əsədov “Arıçılıqda mövsümi işlər” haqqında məruzə edib. Qeyd edib ki, respublikamızda arı xəstəlikləri haqqında bir neçə ədəbiyyat nəşr olunsa da, yeni arı xəstəliklərinin aşkar edilməsi, onlara qarşı mübarizə vasitələrinin daim yenilənməsi, profilaktik tədbirlərin müasirləşməsi baxımından bu sahə daha çox yeni elmi ədəbiyyatların yazılmasını və arıçıların məlumatlandırılmasını tələb edir. Naxçıvan Dövlət Universitetinin ixtisaslı mütəxəssislərinin də bu istiqamətdə əməklərinin olduğu diqqətə çatdırılıb.

Beynəlxalq konfransda arıçılığa aid Naxçıvan Dövlət Televiziya və Radio Verilişləri Komitəsinin hazırladığı film, eyni zamanda, universitet əməkdaşlarının arıçılıq sahəsinə aid kitablarından ibarət sərgisi nümayiş etdirilib.

Konfrans iştirakçıları Naxçıvan Muxtar Respublikasının Ordubad rayonunun Dırnıs, Culfa rayonunun Gülüstan kəndlərində şəxsi arıçılıq təsərrüfatına baxıb, arıçılıq məhsullarının emalı prosesi ilə tanış olublar.

Beynəlxalq konfransda Naxçıvan Muxtar Respublikası Ali Məclisi Aparatının iqtisadiyyat şöbəsinin müdiri Rəfael Babayev də iştirak edib.