REGİONLAR
Naxçıvanda açıq ürək əməliyyatları keçirilib
Naxçıvan, 17 yanvar, AZƏRTAC
Mərkəzi Neftçilər Xəstəxanasının ürək-damar cərrahı, tibb üzrə elmlər doktoru, Azərbaycan Ürək və Sağlamlıq Assosiasiyası İdarə Heyətinin sədri Rəşad Mahmudov növbəti dəfə Naxçıvan Diaqnostika-Müalicə Mərkəzində ixtisaslı yerli kadrlarla birgə açıq ürək əməliyyatları keçirib.
AZƏRTAC xəbər verir ki, əvvəlcə ürək və qan-damar sistemi xəstəliklərindən əziyyət çəkən xəstələr müayinəyə cəlb ediliblər.
Yerli həkimlər tərəfindən müayinə olunaraq qeydiyyata götürülən və əməliyyatı planlaşdırılan xəstələr üzərində 5 açıq ürək-aortakoronar şuntlama əməliyyatı keçirilib. Əməliyyatlar uğurla başa çatıb.
Naxçıvanın bütün səhiyyə müəssisələrində, eləcə də Naxçıvan Diaqnostika-Müalicə Mərkəzində olan ən müasir tibbi avadanlıqlar və peşəkar yerli həkim briqadası burada ən ağır əməliyyatların, o cümlədən açıq ürək əməliyyatlarının aparılmasına imkan verir.
Qeyd edək ki, Naxçıvan Diaqnostika-Müalicə Mərkəzində təkcə ötən il 112 nəfər üzərində uğurlu açıq ürək əməliyyatı aparılıb.