REGİONLAR
Naxçıvanda tanınmış dövlət xadimi Sadıq Rəhimovun 100 illik yubileyi qeyd edildi
AZƏRTAC xəbər verir ki, tədbiri giriş sözü ilə açan AMEA Naxçıvan Bölməsinin sədri, akademik İsmayıl Hacıyev uzun illər dövlət idarəçiliyi sahəsində müxtəlif məsul vəzifələrdə çalışmış, Azərbaycan hökumətinə rəhbərlik etdiyi dövr ərzində respublikanın ictimai-siyasi həyatına, sosial-iqtisadi inkişafına mühüm töhfələr vermiş Sadıq Rəhimovun anadan olmasının 100 illik yubileyinin Azərbaycan Respublikasının Prezidenti İlham Əliyevin 2014-cü il 8 avqust tarixli Sərəncamına əsasən qeyd olunduğunu bildirdi.
Naxçıvan Muxtar Respublikası Ali Məclisi Aparatının humanitar siyasət məsələləri və ictimai təşkilatlarla iş şöbəsinin müdiri Rəhman Məmmədov Sadıq Rəhimovun həyat və fəaliyyəti barədə danışaraq qeyd etdi ki, tanınmış dövlət xadimi cəmiyyətimizə, xalqımıza yalnız şərəf gətirən mənalı bir ömür yaşayıb. 1914-cü ildə Bakının Balaxanı kəndində neftçi – fəhlə ailəsində anadan olan Sadıq Rəhimov 1929-1931-ci illərdə Bakı Neft Texnikumunda təhsil alıb. 1941-ci ildə Moskvaya Ali Partiya Məktəbində oxumağa göndərilən Sadıq Rəhimov təhsilini yarımçıq qoyaraq 1941-ci ildə cəbhəyə yollanıb və ağır yaralanması ilə əlaqədar hərbi qulluqdan tərxis edilərək Bakıya qayıdıb. Bundan sonra ona Azərbaycanın toxuculuq sənayesi nazirinin müavini vəzifəsi tapşırılıb. Toxuculuq Sənayesi Nazirliyi ilə Yüngül Sənaye Nazirliyi birləşdirildikdən sonra nazir vəzifəsinə təyin edilib. Bir müddət sonra isə Sadıq Rəhimov Azərbaycan SSR kommunal təsərrüfatı və mülki tikinti naziri, daha sonra sənaye malları naziri olub.
Bildirildi ki, Sadıq Rəhimovun dərin biliyi, böyük səriştəsi, zəngin təcrübəsi və ən əsası işgüzarlığı onun bu çətin və məsul vəzifələri layiqincə yerinə yetirməsinə imkan verib. Çünki o, yeniyetmə yaşlarından zavod-fabrikdə istehsalatı öyrənib, idarəetmə təcrübəsi toplayıb. Görünür, onun tez-tez bir vəzifədən digərinə göndərilməsi də təsadüfi deyildi. Çünki Sadıq Rəhimov hər yeni sahəni qaydaya salıb, işi qurmağı gözəl bacarırdı.
Bütün bunlar nəzərə alınaraq o, 1954-cü ildə daha yüksək vəzifəyə irəli çəkilib, Azərbaycan SSR Nazirlər Sovetinin sədri seçilib. 1958-ci ilədək respublika hökumətinə rəhbərlik edir. Bu illərdə S. Rəhimov respublika iqtisadiyyatının təkcə bir sahəsinin rəhbəri deyildi, artıq Azərbaycanı idarə edənlərdən biri idi. Həmin dövrdə respublikanın sənayesində, kənd təsərrüfatında, mədəni həyatında baş verən bütün hadisələr, yeniliklər birbaşa olaraq Nazirlər Soveti sədrinin adı, iş fəaliyyəti ilə bağlı idi. Tutduğu vəzifələrlə əlaqədar Sadıq Rəhimov tez-tez Moskvaya gedir, işlə bağlı SSRİ Nazirlər Sovetində, Dövlət Plan Komitəsində, ayrı-ayrı nazirlik və idarələrdə olurdu. Moskvadakı yüksək vəzifəli şəxslər onu hörmətlə qarşılayar, diqqətlə dinləyər, fikirləri ilə hesablaşar və qaldırdığı məsələləri həll etməyə çalışardılar.
Rəhman Məmmədov qeyd etdi ki, ötən əsrin 70-ci illərində xalqımızın ümummilli lideri Heydər Əliyev Mərkəzi Komitənin plenumlarından birində paytaxtda mənzil tikintisinin vəziyyətini təhlil edərkən vaxtilə Bakının Baş Tikinti İdarəsinin rəisi işləyən Sadıq Rəhimovun işgüzarlığını, təşkilatçılıq bacarığını və prinsipiallığını yüksək qiymətləndirib, mənzil tikintisinin sürətləndirilməsində onun əməyini xüsusi olaraq qeyd edib. Bu da təsadüfi deyildi, çünki S. Rəhimov həm Vətənini, millətini sevən fədakar insan, həm də işgüzarlığı ilə seçilən milli kadr idi. Məhz bacarıqlı milli kadrlara xüsusi diqqət yetirən Ulu Öndərimiz onu yüngül sənaye naziri təyin edib və beləliklə, Sadıq Rəhimov ömrünün son 10 ildən çoxunu həmin vəzifədə çalışıb.
“Onu yaxından tanıyanlar, müasirləri xatırlayırlar ki, Sadıq Rəhimov nüfuzlu bir şəxsiyyət idi. Xarakterindəki qürur, ciddilik, dönməzlik, qətiyyət və digər bu kimi keyfiyyətlər onun hər zaman nəzərə çarpan xarici görkəmini tamamlayırdı”, – deyən Rəhman Məmmədov əlavə etdi ki, tanınmış dövlət xadimi, vətənpərvər insan, Azərbaycanın sosial-iqtisadi inkişafında xidmətləri olmuş Sadıq Rəhimovun səmərəli fəaliyyəti, sənayenin inkişafındakı xidmətləri bu gün də ehtiramla xatırlanır. Təsadüfi deyildir ki, Azərbaycan Respublikasının Prezidenti İlham Əliyev Sadıq Rəhimovun uzun illər müxtəlif vəzifələrdə səmərəli xidmətlərini nəzərə alaraq 100 illik yubileyinin keçirilməsi haqqında Sərəncam imzalayıb. Bu, dövlət xadiminin xatirəsinə göstərilən ehtiram, onun əməyinə verilən yüksək qiymətdir.
AMEA Naxçıvan Bölməsi Tarix, Etnoqrafiya və Arxeologiya İnstitutunun direktoru, AMEA-nın müxbir üzvü Fəxrəddin Səfərli Sadıq Rəhimovun dövlət idarəçiliyi sahəsindəki səmərəli xidmətlərindən ətraflı söhbət açdı. Bildirdi ki, hər zaman işinə məsuliyyətlə yanaşan S. Rəhimovun işgüzarlığı və təşəbbüskarlığı onu tutduğu vəzifələrdə pillə-pillə yüksəldib.
Daha sonra çıxış edən AMEA-nın Bioresurslar İnstitutunun direktoru, akademik Tariyel Talıbov, AMEA-nın müxbir üzvləri Vəli Baxşəliyev, Əbülfəz Quliyev, Qadir Qədirzadə S. Rəhimovun Vətəninə, xalqına sədaqətlə xidmət etməsindən, Azərbaycan xalqına, onun dilinə, mədəniyyətinə verdiyi böyük dəyərdən, insani keyfiyyətindən söz açdılar.
Tədbirə AMEA Naxçıvan Bölməsinin sədri, akademik İsmayıl Hacıyev yekun vurdu.