Bakı, 14 avqust, AZƏRTAC 

Düzgün nəfəs alıb vermək sağlam insan üçün çox asandır. Tənəffüs bizim həyatda qalmağımızı təmin edən ən vacib haldır. Qida, su, yuxu kimi amillər olmadan bir neçə gün yaşamaq mümkündür. Lakin nəfəs almadan bir neçə dəqiqə belə həyatda qalmaq imkansızdır. Bu səbəbdən həyat üçün çox vacib mövzulardan biri də düzgün nəfəs alıb verməyi öyrənməkdir. Qeyri-kafi və ya nizamsız nəfəs aldığımızda ilk növbədə orqanlarımıza oksigen daşınmasına kömək edən ürəyimiz çətinliyə düşən ilk orqan ola bilər. Belə ki, bu vəziyyətdə infarkt keçirmə ehtimalının artması ilə yanaşı bir sıra ciddi problemlər yarana bilər.

AZƏRTAC Azərbaycan Tibb Universitetinin Tədris Terapevtik Klinikasına istinadla xəbər verir ki, yanlış nəfəs aldığımızın bir sıra göstəriciləri var. Bu göstəricilər nəfəs alarkən diafraqmanı deyil, döş qəfəsini şişirmək, burunla deyil, ağızla, çiyinlər düşmüş, qamətin dik olmadığı vəziyyətdə oturaraq nəfəs almaqdır. Yanlış nəfəs aldığınızda ürək infarktı riski artır, qan təzyiqi balansı pozulur, stress səviyyəsi və bədənin turşuluq səviyyəsi artır, gün ərzində əzginlik, yorğunluq, yuxululuq və bir sıra digər hallar yarana bilər. Yəni toxumalara kifayət qədər oksigenin getməməsi bir çox problemin əsas səbəbi halına gələr.

Ümumdünya Səhiyyə Təşkilatının tövsiyəsinə görə ən doğru nəfəs alıb vermənin standartı sadəcə burundan nəfəs alıb verməkdir.

Səbəb olaraq isə havanın burunda isidilməsi, təmizlənməsi olaraq göstərilir.

Nəfəs alarkən ilk və ən başlıcası burun tənəffüsü edilməsinə, diafraqmanı istifadə edərək nəfəs almağa çalışmağa diqqət yetirməliyik.