İQTİSADİYYAT


Neft Fondunun aktivləri ilin əvvəlinə nisbətən 6,7 faiz artaraq 35 milyard 822,1 milyon dollar olub

A+ A

Bakı, 12 oktyabr, Nihad Budaqov, AZƏRTAC

Bu il oktyabrın 1-nə Azərbaycan Respublikası Dövlət Neft Fondunun (ARDNF) aktivləri cari ilin əvvəlinə (33 milyard 574,1 milyon ABŞ dolları) nisbətən 6,7 faiz artaraq 35 milyard 822,1 milyon ABŞ dollarına bərabər olub.

AZƏRTAC xəbər verir ki, bu barədə ARDNF-də keçirilən mətbuat konfransında fondun icraçı direktoru, Mədən Hasilatı üzrə Şəffaflıq Təşəbbüsü (MHŞT) üzrə hökumət Komissiyasının və Çoxtərəfli Qrupun (ÇQ) sədri Şahmar Mövsümov məlumat verib. O qeyd edib ki, bu vəsaitin valyuta ifadəsində 33 milyard 949,6 milyon ABŞ dolları investisiya portfelinin, 1 milyard 872,5 milyon ABŞ dolları isə manat hesabının payına düşür.

“Bu ilin yanvar-sentyabr aylarında Dövlət Neft Fondunun büdcə gəlirləri 6 milyard 618,6 milyon manat, büdcə xərcləri isə 3 milyard 823,1 milyon manat təşkil edib. Yanvar-sentyabr aylarında ARDNF-in neft və qaz sazişlərinin həyata keçirilməsi ilə bağlı gəlirləri 5 milyard 883,8 milyon manat, o cümlədən mənfəət neftinin və qazın satışından 5 milyard 867 milyon manat, bonus ödənişləri 0,1 milyon manat, tranzit gəlirləri 13,4 milyon manat, akrhesabı ödənişlər isə 3,3 milyon manat olub. Fondun vəsaitinin idarə olunmasından əldə edilən gəlirlər 734,8 milyon manata bərabər olub. Valyuta məzənnələrinin dəyişməsindən yaranan fərq ilə bağlı ARDNF-in büdcədənkənar gəliri 2 milyard 612,3 milyon manat təşkil edib”, - deyə Ş.Mövsümov əlavə edib.

Neft Fondunun icraçı direktoru bildirib ki, hesabat dövrü ərzində ARDNF-in 2016-cı il büdcəsinin icrası çərçivəsində 3 milyard 260 milyon manat vəsait dövlət büdcəsinə transfert edilib. Qaçqın və məcburi köçkün ailələrinin məskunlaşdırılması və sosial-məişət vəziyyətinin yaxşılaşdırılması üzrə tədbirlərin həyata keçirilməsinə 73,8 milyon manat, Samur-Abşeron suvarma sisteminin yenidən qurulmasına 39,1 milyon manat, Bakı-Tbilisi-Qars yeni dəmir yolu layihəsinin maliyyələşdirilməsinə 48,6 milyon manat vəsait ayrılıb.

Ş.Mövsümov deyib ki, 20,8 milyon manat vəsait “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın maliyyələşdirilməsinə yönəldilib. Bildirib ki, “Cənub Qaz Dəhlizi” layihəsi üzrə 241,9 milyon manat, “Star” neft emalı kompleksinin tikintisi layihəsində Azərbaycan Respublikasının iştirak payının maliyyələşdirilməsinə isə 127 milyon manat vəsait ayrılıb.

Fondun icraçı direktoru əlavə edib ki, bu il ərzində ARDNF-in idarə edilməsi ilə bağlı xərcləri 11,9 milyon manat təşkil edib.

Daha sonra 2013 və 2014-cü illəri əhatə edən Mədən Hasilatı üzrə Şəffaflıq Təşəbbüsü hesabatlarının, 2014-cü il MHŞT Hesabatına dair MHŞT üzrə QHT Koalisiyasının Rəyinin və www.eitireport.org  internet səhifəsinin təqdimatları keçirilib. Həmçinin MHŞT-nin Azərbaycanda tətbiqi və bu istiqamətdə həyata keçirilən tədbirlər barədə məlumat verilib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.