ELM VƏ TƏHSİL
Neft və Qaz İnstitutunda Gənc Alim və Mütəxəssislər Şurası yaradılıb
Bakı, 11 fevral, AZƏRTAC
Azərbaycan Milli Elmlər Akademiyasının (AMEA) Neft və Qaz İnstitutunda Gənc Alim və Mütəxəssislər Şurası yaradılıb.
İnstitutdan AZƏRTAC-a bildiriblər ki, şura akademiyanın rəyasət heyətinin “AMEA Gənc Alim və Mütəxəssislər Şurasının yaradılması” haqqında müvafiq qərarına uyğun olaraq təsis edilib.
AMEA-nın Gənc Alim və Mütəxəssislər Şurasının sədri, dosent Famin Salmanov vurğulayıb ki, əsasnaməyə görə, elmi müəssisələrdə şuranın yaradılması, onun idarə heyətinin, sədr və müavinlərinin seçilməsi həmin institutun gənclərinin ümumi səsverməsi ilə həyata keçirilir.
Neft və Qaz İnstitutunun elmi işçisi Rəqsanə Əsgərova Gənc Alim və Mütəxəssislər Şurasının sədri seçilib.
İnstitutun gənc mütəxəssisləri çıxış edərək fikirlərini bölüşüb, rəy və təkliflərini bildiriblər.