Bakı, 31 mart, AZƏRTAC 

Martın 31-də Azərbaycan Respublikası Dövlət Neft Şirkətinin (SOCAR) baş ofisində “Neftçi” Peşəkar Futbol Klubunun Müşahidə Şurasının iclası keçirilib.

AZƏRTAC şirkətin saytına istinadla xəbər verir ki, “Neftçi” Peşəkar Futbol Klubunun baş sponsoru olan SOCAR-ın prezidenti Rövnəq Abdullayev iclası giriş sözü ilə açaraq Azərbaycanda fəaliyyət göstərən futbol klublarının idarəçilik sistemini müasir tələblər səviyyəsində qurmaq məqsədilə həmin klubların ictimai idarəçilik sisteminə keçirilməsinin məqsədəuyğun hesab edildiyini və bu barədə AFFA İcraiyyə Komitəsinin qərarının olduğunu bildirib. Respublikada futbolun kütləviliyinin artırılması və klubların davamlı inkişafına xidmət edən bu qərar ardıcıl islahatların aparılmasını zərurətə çevirir. SOCAR tarixən Azərbaycan neftçilərinin futbol klubu olmuş “Neftçi”nin idarəçiliyini ictimailəşdirməklə bu sahədə də birinci olduğunu futbol ictimaiyyətinə nümayiş etdirir. İlk addım kimi “Neftçi” Peşəkar Futbol Klubu “Neftçi İdman Klubu” İctimai Birliyinin tərkibinə verilib. İctimai Birlik futbol klubuna dəstək verməkdə davam edəcək. Klubun idarəçiliyini isə yeni yaradılmış Müşahidə Şurası həyata keçirəcək.

Müşahidə Şurasına Azərbaycan Yazıçılar Birliyinin katibi, xalq yazıçısı Çingiz Abdullayev rəhbərlik edəcək. Şurada “Neftçi İdman Klubu” İctimai Birliyinin rəhbəri Sadıq Sadıqov, veteran futbolçulardan Mübariz Zeynalov və Səməd Qurbanov, SOCAR-ın vitse-prezidentinin müavini Cəbrayıl Cəbrayılov və Sərmayələr İdarəsinin rəis müavini Zaur Qəhrəmanov, habelə rejissor-aktyor Bəhram Bağırzadə təmsil olunurlar.

İclasda bildirilib ki, Müşahidə Şurasının ayda bir dəfədən az olmayaraq toplanması və futbol klubunun idarəçiliyinin Avropa sisteminə uyğunlaşdırılması istiqamətində məqsədyönlü iş aparması nəzərdə tutulur. Şuranın qərarına əsasən, klubun yeni təsis edilən icraçı direktoru vəzifəsinə Elnur Məmmədov seçilib. İcraçı direktora bir ay müddətinə klubun yeni strukturunun hazırlanması və Müşahidə Şurasına təqdim edilməsi tapşırılıb.

“Neftçi” Peşəkar Futbol Klubunun Müşahidə Şurasının sədri Ç.Abdullayev göstərilən etimada görə təşəkkürünü bildirib, Şuranın qarşısında duran vəzifələrdən danışıb.

Müşahidə Şurasının üzvü B.Bağırzadə həmkarları adından yeni qurumun futbolun kütləviliyinin artırılması istiqamətində məqsədyönlü tədbirlər görəcəyini və bu sahədə mövcud təcrübədən, eyni zamanda, Türkiyə və digər ölkələrin futbol klublarının praktikasından istifadə edəcəklərini söyləyib.

Rövnəq Abdullayev iclasa yekun vuraraq Müşahidə Şurasının işinə uğurlar arzulayıb və “Neftçi” Peşəkar Futbol Klubunun yeni idarəçilik sistemi ilə daha böyük uğurlar qazanacağına əminliyini bildirib.