SİYASƏT
“News from Israel”: “Ermənistan Azərbaycana “İsgəndər” raketləri ilə zərbə endirərsə, nəticələrə görə kim cavab verəcək?”
Bakı, 18 aprel, AZƏRTAC
Son vaxtlar müxtəlif dövlətlər tərəfindən ağır silahlar tətbiq edilməsi barədə hədə-qorxuların sayı get-gedə artmaqdadır. Beynəlxalq münasibətlər sahəsində israilli ekspert Mila Abramoviç İsrailin “News from Israel” informasiya-analitik portalında dərc edilmiş eksklüziv yazısında bu barədə söhbət açır (http://isp-ngo.com/?p=20289).
M.Abramoviçin fikrincə, bu günlərdə Şimali Koreyada yeni raket buraxılması üçün uğursuz cəhddən sonra fəlakətli müharibə təhlükəsi, deyəsən bir qədər azalıb. İsrailli ekspert yazır: “Düzdür, istər ABŞ, istərsə də KXDR kompromisə getmədi, amma hər halda, onların öz hədələrini həyata keçirmələri lazım gəlmədi. Siseronun təbirincə desək, “yaxşı müharibədənsə pis sülh yaxşıdır”. İndiki halda bu, bəlkə də ən yaxşı çıxış yoludur, lakin unutmaq olmaz ki, bu, problemin tam həlli deyil, yalnız müvəqqəti təsəllidir. Beləliklə, həll edilə bilməyən münaqişə aradan qalxmayıb”.
Lakin müəllifin sözlərinə görə, Şimali koreyalı general bütün düşmənləri darmadağın edəcəyi, bundan sonra hətta təslim aktını imzalamaq üçün heç kəsin qalmayacağı barədə hədə-qorxu gəldiyi bir vaxtda Ermənistanın Rusiyadakı səfiri Vardan Toqanyan Qarabağ münaqişəsinin tənzimlənməsi məsələsində Yerevanın mövqeyindən söhbət açaraq deyir: “...Bizim aldığımız “İsgəndər” silahları yalnız öz vətəndaşlarımızın təhlükəsizliyinin təmin olunmasına xidmət edir. Ermənistan prezidenti də bu yaxınlarda birmənalı şəkildə və açıq-aydın bildirib ki, əgər bizim sərhədlərimizin və vətəndaşlarımızın təhlükəsizliyinə təhdid yaranarsa, bu halda həmin silah tətbiq ediləcək”.
Abramoviç qeyd edir ki, səfirin bu cür bəyanatı çoxlu suallar doğurur. Mila Abramoviç vurğulayır: “Əvvələn, Sarkisyanın rejimi kimi təcavüzkar rejimin “İsgəndər” raketləri ilə təchiz edilməsi nə dərəcədə təhlükəsizdir? İkincisi, əgər hərəkətlərini proqnozlaşdırmaq mümkün olmayan və belə bir ciddi silahla təchiz edilmiş dövlət başçısı həmin silahı tətbiq edərsə, buna görə kim cavabdeh olacaq? Üçüncüsü, Ermənistan səfiri 1961-ci il Vyana Konvensiyası ilə nə dərəcədə tanışdır və öz işində həmin konvensiyanı rəhbər tuturmu? Diplomatiya aləmində deyirlər ki, diplomatın silahı sözdür. Görünür, Ermənistan səfiri sözə necə məharətlə yiyələnmək lazım olması elmini mənimsəyə bilməyib və şantaja əl atır”.
İsrailli ekspertin fikrincə, Sarkisyanın təcavüzkar, separatist rejiminə “İsgəndər” raketinin verilməsi bu silahın “İslam dövləti” terrorçularına təqdim edilməsi qədər təhlükəlidir. Məqalə müəllifi yazır: “Azərbaycana qarşı işğalçılıq müharibəsində Ermənistanın dəst-xətti, o cümlədən ermənilərin 1992-ci ildə Azərbaycanın Xocalı şəhərində, eləcə də azərbaycanlı əsirlərlə rəftarında yol verdiyi vəhşiliklər İŞİD-çilərin əsirlərə qarşı törətdiyi vəhşiliklərlə üst-üstə düşür. Bütün bu hadisələrdə Ermənistanın indiki prezidenti Serj Sarkisyan, sabiq naziri Seyran Ohanyanın və Ermənistanın digər vəzifəli şəxslərinin iştirak etdiklərini nəzərə alsaq, bu gün həmin raketlərin bu insanların əlində nə dərəcədə təhlükəli olması aydındır”.
Özünün qeyri-diplomatik hərəkətləri ilə ad çıxarmış Ermənistanın Rusiyadakı səfiri daha sonra deyib: “Biz sülhün qorunması və atəşkəsə riayət edilməsi barədə beynəlxalq sazişlərin tərəfdarıyıq, yoxsa hərbi potensialı artırmaq və bu məsələni hərbi yolla həll etmək siyasəti yürüdürük?”. Burada belə bir sual yaranır: əgər siz sülhün tərəfdarısınızsa, onda qonşu dövlətin işğal olunmuş ərazilərinin azad edilməsi barədə BMT Təhlükəsizlik Şurasının 4 qətnaməsini və beynəlxalq birliyin çağırışlarını nə üçün yerinə yetirmirsiniz? Əsir götürülmüş dinc sakinləri nə üçün azad etmirsiniz? Nə üçün atəşkəs rejimini pozursunuz”?
Müəllif qeyd edir ki, səfir 2016-cı ilin aprel ayındakı dördgünlük müharibəni, o vaxt Azərbaycan ordusunun qələbə qazanmasını və öz ərazilərini işğaldan azadetmə prosesinə başladığını xatırladaraq Azərbaycanı hərbiləşməkdə, İsrail və Türkiyə əməkdaşlıq etməkdə günahlandırır. Məqalə müəllif soruşur: "Sual edilir, məgər Ermənistan öz ordusunu militaristləşdirmirmi? Məgər Ermənistana “İsgəndər” raketlərinin gətirilməsi militaristləşdirmə deyilmi? Ermənistan ordusunun Azərbaycanın işğal edilmiş ərazilərində nə işi var?”
Mila Abramoviç qeyd edir ki, Şimali Koreyanın nüvə silahından istifadə etmək barədə hədələrindən sonra dünya özünə gəlməyə macal tapmamış Ermənistan ön səhnəyə çıxaraq, “İsgəndər” raketləri ilə lovğalanmağa başlayıb.
Beynəlxalq münasibətlər sahəsində israilli ekspert Mila Abramoviç İsrailin “News from Israel” informasiya-analitik portalında dərc edilmiş eksklüziv yazını belə tamamlayır: “Əgər Ermənistan Azərbaycanın Mingəçevir bəndinə “İsgəndər” raketləri ilə zərbələr endirərsə, bunun mümkün nəticələrinə görə, regionda baş verə biləcək ekoloji fəlakətə və yeni qaçqın dalğası yaranmasına görə kim cavab verəcək”?