DÜNYA


Nitsada baş verən terror aktı ilə əlaqədar Fransada 3 günlük matəm elan olunub

A+ A

Bakı, 15 iyul, AZƏRTAC

Fransa hökuməti Nitsa şəhərində baş verən terror aktı ilə əlaqədar 3 günlük matəm elan edib.

AZƏRTAC xarici KİV-lərə istinadla xəbər verir ki, Fransa Prezidenti Fransua Olland və Baş nazir Manuel Vals faciənin baş verdiyi Nitsa şəhərinə gəlib.

Bundan başqa, Fransa parlamenti ölkədə iyulun 26-da bitəcək fövqəladə vəziyyət rejimi vaxtının 3 ay uzadılması barədə qanun layihəsini müzakirə edəcək. Ötən gecə Prezident Fransua Olland artıq onun uzadılması barədə qərar qəbul etdiyini bildirib.

Bu arada polis hadisəni törədənin şəxsiyyətini müəyyən edə bilib. O, Tunis əsilli Nitsa sakini Məhəmməd Laxuayec Buhleldir (Mohamed Lahouaiej Bouhlel). Hazırda evində axtarışın aparıldığı cinayətkarın qonşularının sözlərinə görə, o, həyat yoldaşı ilə boşanması və maddi cəhətdən sıxıntı çəkməsi ilə bağlı depressiya vəziyyətində olub. Eyni zamanda 3 uşaq atası olan Məhəmməd Laxuayec Buhlel inanclı insan deyilmiş və ibadət etmirmiş. iTele telekanalı isə onun Fransa vətəndaşı olmadığını qeyd edir.

Xatırladaq ki, iyunun 14-də axşam saatlarında Fransanın Nitsa şəhərində sürücü yük avtomobilini küçədə bayram şənliyi ilə əlaqədar gəzintiyə çıxan insanların üzərinə sürüb. Şahidlərin ifadəsinə görə, yük maşını dayanmadan ziqzaqvarı hərəkət edərək təxminən 2 kilometr məsafədə insanları əzib. Bundan sonra terrorçu polis əməkdaşları ilə atışmağa başlayıb və öldürülüb.

İnsident nəticəsində 84 nəfər həlak olub, 18 nəfərin vəziyyəti isə ağır qiymətləndirilir. Xəsarət alan ən azı 54 uşaq xəstəxanalara yerləşdirilib. Son məlumata əsasən həyatını itirənlərin arasında Ermənistan, Estoniya, Ukrayna, ABŞ və Rusiyadan olan çox sayda xarici ölkə vətəndaşı da var.

 

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.