MƏDƏNİYYƏT
“Nizami” Kino Mərkəzində Xalq Yazıçısı Elçinin Türkiyədə istehsal edilmiş “Mahmud və Məryəm”filminin premyerası olmuşdur
Tədbirdə “Azərbaycan qadını" jurnalının yay buraxılışı təqdim edilmişdir VİDEO
Bakı, 26 sentyabr (AZƏRTAC). Sentyabrın 26-da “Nizami” Kino Mərkəzində Xalq Yazıçısı Elçinin “Mahmud və Məryəm” filminin premyerası olmuşdur.
Tədbirdə, həmçinin “Azərbaycan qadını" jurnalının yay buraxılışı təqdim edilmişdir.
AZƏRTAC xəbər verir ki, təqdimat mərasimində dövlət və hökumət nümayəndələri, Milli Məclisin deputatları və KİV təmsilçiləri iştirak etmişlər.
“Mahmud və Məryəm” filmi romantik, dram janrında çəkilmişdir. Filmin rejissoru Mehmet Ada Öztəkin, prodüseri isə Sevda Kayğısızdır. Ekran əsəri Azərbaycan və Türkiyə arasında ilk müştərək kino layihəsidir. Türkiyənin “24 Kare” şirkəti tərəfindən ekranlaşdırılan film Mahmud və Məryəmin sevgisindən bəhs edir. Mahmud Gəncəli Ziyad xanın oğlu, Məryəm isə Keşişin qızıdır. Hadisələrin mərkəzində Mahmud ilə Məryəmin bir-birinə olan məhəbbəti dayanır. İki gəncin sevgisinə mane olan isə mürtəce fikirli Qara Keşişdir.
Yeni ekran əsərində Mahmud rolunu Aras Bulut İynemli, Məryəm obrazını isə Eva Dedova canlandırmışlar.
Çəkilişlərinə Azərbaycanın Şəki şəhərində başlanılan ekran əsərində Fəxrəddin Manafov, Məlahət Abbasova, Şamil Süleymanov, Mehmet Çevik, Tomris İncer, Kristina Krapela və digər tanınmış aktyorlar rol almışlar.
Təqdimat mərasimində filmdə rol alan aktyorlar və yaradıcı heyət səhnəyə dəvət olunmuşlar.
Filmin prodüseri Sevda Kayğısız, aktyorlardan Məlahət Abbasova, Fəxrəddin Manafov və başqaları çıxışlarında seçilən mövzunun çox aktual olduğunu və ekran əsərinin tamaşaçılar tərəfindən maraqla qarşılandığını bildirmişlər. Qeyd olunmuşdur ki, “Mahmud və Məryəm” səkkiz Avropa ölkəsində nümayiş etdiriləcəkdir. Bu filmin özəlliyi ilk dəfə olaraq Azərbaycan və Türkiyə kinematoqrafları tərəfindən çəkilmiş müştərək ekran əsəri olmasındadır.
Fatma Abdullazadənin baş redaktorluğu ilə nəşr olunan "Azərbaycan qadını"nın yay buraxılışı mərasim iştirakçıları tərəfindən maraqla qarşılanmışdır.
Jurnalda Heydər Əliyev Fondu tərəfindən həyata keçirilən müxtəlif mədəniyyət layihələrindən söhbət açılmışdır. Son vaxtlar uğurla inkişaf edən mədəni əməkdaşlıq sayəsində Parisin ardınca Vyanada Azərbaycan Mədəniyyət Mərkəzinin təsis olunması, beynəlxalq təsviri incəsənət sərgisində – Venesiya Biennalesində Azərbaycan pavilyonunun açılması, Kannda Azərbaycan mədəniyyəti günlərinin keçirilməsi ilə bağlı geniş materiallar oxuculara təqdim olunmuşdur.
“Azərbaycan İlə UNESCO arasında tarixi əməkdaşlıq” sərlövhəli yazıda ölkəmizin bu nüfuzlu beynəlxalq təşkilata üzv qəbul olunmasının 20 illiyi münasibətilə Parisdə keçirilən təntənəli mərasimdən söz açılmışdır.
Oxuculara təqdim olunan növbəti materialda Moskvada keçirilən “AMOR–Fashion Day” dəb müsabiqəsinin yaddaqalan anlarından bəhs edilmişdir. Müsabiqədə Rusiyanın Azərbaycanlı Gənclər Birliyinin və “Baku” Beynəlxalq jurnalının təşkilatçılığı ilə iki ölkənin gənc dizaynerlərinin ən yeni geyim kolleksiyaları təqdim olunmuşdur.
Şəhərimizin qonaqları olan “Səyyar incəsənət akademiyası” proqramının iştirakçılarının təəssüratlarına jurnalın səhifələrində geniş yer ayrılmışdır.
“Azərbaycan qadını” jurnalının yay buraxılışında bu nəşrin oxucularını Xalq Yazıçısı Elçin ilə maraqlı görüş, Azərbaycan Respublikasının Dövlət mükafatı - “Dostluq” ordeni ilə təltif olunan Tamara Sinyavskayanın sevgi dolu xatirələri, Azərbaycan qadınlarının IV qurultayı ilə bağlı maraqlı material, 140 yaşlı Azərbaycan teatrının səkkiz gənc simasının səmimi düşüncələri, həmçinin “Küləklər məkanı”na səyahət gözləyir.
Jurnalın səhifələrində sənətsevərlər gənc rəssam Məryəm Ələkbərlinin könül pıçıltıları, Ülviyyə Şabanovanın təzadlı dünyası, Ülvi Pepinovanın qeyri-adi buta kolleksiyası ilə yaxından tanış ola bilərlər.