CƏMİYYƏT
Nizami rayonunda Beynəlxalq Daun Sindromu Günü münasibətilə tədbir keçirilib
Bakı, 27 mart, AZƏRTAC
Nizami rayonunda yerləşən Daun Sindromlu Şəxslərin Reabilitasiya Mərkəzində Beynəlxalq Daun Sindromu Gününə həsr olunmuş tədbir keçirilib.
AZƏRTAC xəbər verir ki, Yeni Azərbaycan Partiyası Nizami rayon təşkilatının Gənclər Birliyi və “Qayğı - Sağlam Nəsil Naminə” İctimai Birliyinin təşkilatçılığı ilə baş tutan tədbirdə əvvəlcə Beynəlxalq Daun Sindromu Gününün tarixi və sindromla bağlı məlumat verilib. Qeyd olunub ki, dünyada hər 700-1000 uşaqdan biri Daun sindromu ilə doğulur və bunun əsas səbəbi insanda normal 46 xromosom əvəzinə 47 xromosomun olmasıdır. Heç bir valideyn dünyaya Daun sindromlu uşaq gətirməkdən sığortalanmayıb və bu, əslində xəstəlik deyil, genetik fərqlilikdir.
Sonra Daun sindromu haqqında çəkilmiş “Biz də hamı kimiyik!” adlı videoçarx təqdim olunub. Azərbaycan Respublikasının İnsan Hüquqları üzrə müvəkkili Elmira Süleymanova, Nizami rayon İcra Hakimiyyətinin başçısı Arif Qasımov, Yeni Azərbaycan Partiyası Siyasi Şurasının üzvü, partiyanın Gənclər Birliyinin sədri Seymur Orucov, YAP Nizami rayon təşkilatının sədri, Milli Məclisin deputatı Sədaqət Vəliyeva, “Qayğı – Sağlam Nəsil Naminə” İctimai birliyinin və YAP Nizami rayon təşkilatı Gənclər Birliyinin sədri Sevinc Abdullayeva çıxış edərək Daun sindromlu şəxslərin cəmiyyətimiz üçün əhəmiyyətindən və dövlətimizin bu sahəyə göstərdiyi qayğıdan söz açıblar.
Vurğulanıb ki, “Qayğı - Sağlam Nəsil Naminə" İctimai Birliyi Heydər Əliyev Fondunun təşəbbüsü ilə təsis edilib. İctimai Birliyə 3-7 yaş arası serebral iflicli uşaqlar üçün nəzərdə tutulan "Qayğı Uşaq Reabilitasiya Mərkəzi" və 5 yaşdan yuxarı Daun sindromlu şəxslər üçün nəzərdə tutulan "Daun Sindromlu Şəxslərin Reabilitasiya Mərkəzi" daxildir. Birliyin məqsədi həmin kateqoriyalara aid olanların reabilitasiyası və sosial həyata inteqrasiyasını təmin etməkdən ibarətdir.
Natiqlər “Günəş Uşaqlar”ın bacarıq və iradəsinin hər kəs üçün nümunə olduğunu qeyd edərək bildiriblər ki, Daun Sindromlu Şəxslərin Reabilitasiya Mərkəzi bu kateqoriyadan olan şəxslərin reabilitasiyası və inkişafı istiqamətində ölkəmizdə yeni bir yolun başlanğıcını qoyub. Daun sindromlu şəxslər onlara yaradılan şərait və qayğıya görə Prezident İlham Əliyevə, Azərbaycanın Birinci vitse-prezidenti, Heydər Əliyev Fondunun prezidenti Mehriban xanım Əliyevaya və həmişə onları yada salan, problemləri ilə maraqlanan fondun vitse-prezidenti Leyla Əliyevaya minnətdarlıqlarını bildiriblər.
Qonaqlar Daun sindromlu şəxslərin çıxışlarına tamaşa ediblər. Tamaşadan sonra Daun sindromlu şəxslərə dəstək göstərənlərə mükafatlar verilib.
Tədbirin sonunda Daun sindromlu şəxslərə hədiyyələr təqdim olunub və xatirə şəkli çəkdirilib.