Bakı, 29 iyul, AZƏRTAC

İyulun 29-da Nizami Rayon İcra Hakimiyyətində cari ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan hesabat yığıncağı keçirilib.

AZƏRTAC xəbər verir ki, rayon icra hakimiyyətinin başçısı Tahir Budaqov respublikamızda dinamik inkişafın təmin edilməsində Nizami rayonunun da öz payı olduğunu deyib. Bildirib ki, aparılan uğurlu yenidənqurma işləri nəticəsində rayondakı sənaye müəssisələrinin fəaliyyəti daha da canlanıb.

Sonra rayon icra hakimiyyəti başçısının müavini İldırım Mehdiyev cari ilin birinci yarısında Nizami rayonunun sosial-iqtisadi inkişafının yekunları və qarşıda duran vəzifələr haqqında məruzəsi dinlənildi.

Bildirildi ki, yanvar-iyun aylarında rayonda fəaliyyət göstərən müəssisələr tərəfindən 250,7 milyon manat dəyərində sənaye məhsulu istehsal edilib və xidmətlər göstərilib, bu da ötən ilin müvafiq dövrünə nisbətən 18,1 faiz çoxdur. Sənayedə istehsalın 26,6 faizi qeyri-dövlət sektoruna aiddir. Sənayenin dövlət sektorunda isə 184,1 milyon manatlıq və ya ümumi istehsalın 73,4 faizi qədər məhsul istehsal edilib, xidmətlər göstərilib.

Məlumat verildi ki, müəssisələr tərəfindən ötən altı ayda ümumi dəyəri 268,5 milyon manatlıq hazır məhsul istehlakçılara göndərilib. Bu rəqəm də yarımillik istehsal həcminin 107,1 faizini təşkil edir. İyulun 1-i vəziyyətinə müəssisələrin anbarlarında hazır məhsul qalığının həcmi 2,5 milyon manatlıq olub. Hesabat dövründə öz gücləri ilə yerinə yetirilən podrat işlərinin həcmi isə 143,9 milyon manat olmaqla, ötən ilin müvafiq dövrünə nisbətən 80,1 faiz təşkil edib.

Qeyd edildi ki, bu ilin 6 ayı ərzində rayonda iqtisadiyyatın və sosial sahələrin inkişafı üçün bütün maliyyə mənbələri hesabına əsas kapitala 151,6 milyon manat həcmində investisiya yönəldilib və bu da ötən ilin müvafiq dövrünə nisbətən 4,8 faiz çoxdur. Əsas kapitala yönəldilən investisiyaların 100 faizi qeyri-dövlət müəssisələrinin payına düşür. Adambaşına düşən investisiyaların həcmi isə 841,8 manat olub.

Bildirildi ki, altı ayda rayondakı iaşə müəssisələrində 27,7 milyon manatlıq xidmət göstərilib və bu da keçən ilin müvafiq dövrünə nisbətən 25,5 faiz çoxdur. Yanvar-iyun aylarında əhaliyə göstərilən pullu xidmətlərin həcmi isə 49,5 faiz artaraq 304,4 milyon manat olub. Pullu xidmətlərin 112,3 milyon manatı və ya 36,9 faizi hüquqi şəxslərin, 192,1 milyon manatı və ya 63,1 faizi fiziki şəxslərin fəaliyyəti hesabına yaranıb. Hesabat dövründə məişət xidməti obyektlərində 48,7 milyon manatlıq müxtəlif xidmətlər göstərilib ki, bu da əhaliyə göstərilən pullu xidmətlərin 16 faizini təşkil edib.

Həmçinin, hesabat dövründə rayonda 817 yeni iş yeri açılıb ki, ondan 261-i yeni açılan, 140-ı mövcud müəssisə və təşkilatlara, 416-sı isə fiziki şəxslərə aiddir. Ümumilikdə son on ildə rayonda 24 min 960 yeni iş yeri açılıb ki, bunun da 24 min 863-ü daimi iş yerləridir.

Bildirildi ki, bu ilin birinci yarısında rayonun təhsil, səhiyyə və mədəniyyət müəssisələrinin əsaslı təmiri, yenidən qurulması və maddi-texniki bazasının möhkəmləndirilməsi istiqamətində də müvafiq işlər həyata keçirilib, 103 nömrəli uşaq bağçası əsaslı təmirdən sonra istifadəyə verilib.

Hesabat dövründə qazanılan digər nailiyyətlərdən də danışan Tahir Budaqov məlumat verdi ki, “2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”na əsasən rayondakı 12 nömrəli orta məktəbdə 200 yerlik (10 sinif), 32 nömrəli orta məktəbdə 640 yerlik (32 sinif) və 238 nömrəli orta məktəbdə 320 yerlik (16 sinif) əlavə korpusların tikintisi, Bakı Texniki Kollecinin əsaslı təmiri və yenidənqurulması işləri davam etdirilir. Kimya-biologiya təmayüllü respublika liseyində isə qazanxananın təmiri və yenidənqurulması başa çatdırılıb, hazırda əsas korpusun əsaslı təmirinə başlanılıb.

T.Budaqov vurğuladı ki, Heydər Əliyev Fondunun “Məktəbəqədər təhsil müəssisələrinin inkişafı proqramı”na töhfə vermək məqsədilə Rayon İcra Hakimiyyəti tərəfindən daxili resurslar hesabına 110 və 172 nömrəli uşaq bağçalarının hər birində 80 yerlik əlavə korpus tikilib, Keşlə qəsəbəsi, Babək prospekti, 2269-cu məhəllədə 100 yerlik, T.Abbasov küçəsi 28 ünvanında isə 120 yerlik yeni özəl uşaq bağçalarının inşası isə davam etdirilir.

Yığıncaqda əldə edilən nailiyyətlərlə yanaşı, həllini gözləyən problemlər və onların aradan qaldırılması yolları, nəzərdə tutulan abadlıq işləri və vətəndaşların müraciətləri ilə bağlı görülən tədbirlər də müzakirə olunub.