İQTİSADİYYAT
Nizami rayonunda bu ilin birinci rübünün sosial-iqtisadi inkişafının yekunları müzakirə edilib
Bakı, 18 aprel, AZƏRTAC
Aprelin 18-də Nizami Rayon İcra Hakimiyyətində 2015-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan hesabat yığıncağı keçirilib.
AZƏRTAC xəbər verir ki, rayon icra hakimiyyətinin başçısı Tahir Budaqov respublikamızda dinamik inkişafın təmin edilməsində Nizami rayonunun da öz yerinin və payının olduğunu deyib. Qeyd edilib ki, aparılan uğurlu yenidənqurma işlərinin nəticəsində rayonun sənaye müəssisələrinin fəaliyyəti daha da canlanıb, sakinlərin qarşılaşdığı sosial problemlərin həlli istiqamətində konkret işlər görülüb.
Bildirilib ki, “Bakı-2015” birinci Avropa Oyunlarına hazırlıq çərçivəsində rayonun ərazisində yerləşən Atletlər və Media Kəndlərini Olimpiya Stadionu ilə birləşdirən yeni salınan yolun ətrafında hazırlıq işləri yekunlaşmaq üzrədir. Hazırda səkilərin üzlənməsi, yaşıllıqların salınması işləri görülür. Atletlər Kəndinin ətrafındakı mövcud hasarda təmir-bərpa işləri başa çatdırılıb, Media Kəndinin ətrafına isə 500 metr uzunluğunda yeni hasar çəkilib.
Həmçinin “2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”na əsasən rayondakı 12, 32, 238 nömrəli orta məktəblərinin, Bakı Texniki Kollecinin əsaslı təmiri və yenidən qurulması işləri davam etdirilir. Milli Sağlamlıq Mərkəzinin tikintisində isə son tamamlama işləri görülür. Özbəkistan küçəsində isə yeni idman kompleksinin tikintisinə başlanılıb.
Sonra rayon icra hakimiyyətinin başçısının müavini İldırım Mehdiyev 2015-cü ilin birinci rübündə rayonun sosial-iqtisadi inkişafının yekunları və qarşıda duran vəzifələr haqqında hesabat məruzəsi ilə çıxış edib.
Məlumat verilib ki, yanvar-mart aylarında rayonda fəaliyyət göstərən müəssisələr tərəfindən 133,7 milyon manat dəyərində sənaye məhsulu istehsal edilib və xidmətlər göstərilib. Bu da ötən ilin müvafiq dövrü ilə müqayisədə 12,5 faiz çox olub. Sənayedə istehsalın 26,9 faizi qeyri-dövlət sektoruna aiddir. Dövlət sektorunda isə 97,8 milyon manatlıq və ya ümumi istehsalın 73,1 faizi qədər məhsul istehsal edilib və xidmətlər göstərilib.
Qeyd olunub ki, müəssisələr tərəfindən bu ilin birinci rübündə ümumi dəyəri 133,4 milyon manatlıq hazır məhsul istehlakçılara göndərilib ki, bu da rüblük istehsal həcminin 99,8 faizini təşkil edir. Aprelin 1-nə olan məlumata əsasən rayondakı müəssisələrin anbarlarında hazır məhsul qalığının həcmi 2 milyon manatlıq olub.
Cari ilin ötən dövründə rayonda iqtisadiyyatın və sosial sahələrin inkişafı üçün bütün maliyyə mənbələri hesabına əsas kapitala 50,7 milyon manat həcmində investisiya yönəldilib ki, bu vəsaitin də hamısı tikinti-quraşdırma işlərinə sərf edilib. Pərakəndə ticarət dövriyyəsinin həcmi 1,4 faiz artaraq 497,2 milyon manat olub. Hesabat dövrü ərzində bütün maliyyə mənbələri hesabına 13,4 milyon manatlıq əsas fondlar istifadəyə verilib.
Bildirilib ki, yanvar-mart aylarında əhaliyə göstərilən pullu xidmətlərin həcmi 47,7 faiz artaraq 192,2 milyon manat olub. Pullu xidmətlərin 142,3 milyon manatı və ya 74 faizi hüquqi şəxslərin, 49,9 milyon manatı və ya 26 faizi isə fiziki şəxslərin fəaliyyəti hesabına yaranıb. Hesabat dövründə rayonda 495 yeni iş yeri açılıb ki, onların da 15-i yeni, 18-i mövcud müəssisə və təşkilatlara, 462-si isə fiziki şəxslərə aiddir.
Yığıncaqda Yeni Azərbaycan Partiyasının (YAP) Nizami rayon təşkilatının sədri, Milli Məclisin deputatı Sədaqət Vəliyeva və başqaları çıxış edərək 2015-cü ilin birinci rübündə respublikamızda ictimai-siyasi, sosial-iqtisadi və mədəni sahələrdə əldə olunan uğurlar barədə danışıb, qarşıda duran vəzifələrdən söhbət açıblar.