ELM VƏ TƏHSİL
Növbəti diaqnostik qiymətləndirmə İsmayıllıda keçiriləcək
Bakı, 23 noyabr, AZƏRTAC
Noyabrın 23-də Qubada müəllimlərin diaqnostik qiymətləndirilməsinə yekun vurulacaq.
Təhsil Nazirliyindən AZƏRTAC-a bildiriblər ki, Qubada keçirilən diaqnostik qiymətləndirmədə Quba ilə yanaşı, Qusar, Şabran, Siyəzən və Xızı rayonlarının dövlət ümumi təhsil müəssisələrində çalışan müəllimlər iştirak edirlər. Xaçmaz rayonu üzrə diaqnostik qiymətləndirmədə ötən il müxtəlif səbəblərdən iştirak edə bilməyən və ya işə yeni qəbul olunan müəllimlər də bu imtahanlara cəlb ediliblər.
Növbəti diaqnostik qiymətləndirmə noyabrın 27-28-də İsmayıllı Olimpiya İdman Kompleksində keçiriləcək. İmtahanda İsmayıllı ilə yanaşı, Qobustan və Şamaxı rayonlarının dövlət ümumi təhsil müəssisələrində çalışan müəllimlər iştirak edəcəklər. Eyni zamanda, Şuşanın Qəbələ və İsmayıllı rayonlarında yerləşən ümumi təhsil müəssisələrinin müəllimləri də bu imtahanlara cəlb ediləcəklər.