İQTİSADİYYAT


Növbəti hərracda ən yüksək qiymətə özəlləşdirilmiş əmlak Nərimanov rayonunda olub

Bakı, 31 yanvar, AZƏRTAC

Yanvarın 31-də Əmlak Məsələləri Dövlət Komitəsi (ƏMDK) tərəfindən növbəti hərrac keçirilib. Hərraca çıxarılan dövlət əmlakları paytaxt və regionlarda yerləşir. Paytaxtda keçirilmiş hərrac komitənin İnformasiya Texnologiyaları Mərkəzində müasir hərrac zalında təşkil olunub. Hərrac zamanı monitorlar vasitəsilə regionlarda keçirilən hərraclar da onlayn əlaqə vasitəsilə canlı izlənilib. Qeyd edək ki, hərracda media və ictimaiyyət nümayəndələri sərbəst şəkildə gəlib iştirak edərək prosesi əyani müşahidə edir.

Komitədən AZƏRTAC-a bildirilib ki, hərraca çıxarılmış kiçik dövlət müəssisələri və obyektləri həm Bakıda, həm regionlarda, qeyri-yaşayış sahələrinin əksəriyyəti isə paytaxt rayonlarında yerləşir. Paytaxtda yerləşən obyektlər sırasında 86,4 kvadratmetr torpaq sahəsi və 66,8 kvadratmetr ümumi faydalı sahəsi olan birmərtəbəli ayrı tikili, Nərimanov rayonundakı 29,5, 84 və 75 kvadratmetr sahəyə malik qeyri-yaşayış obyektləri var.

Hərracda Nərimanov və Binəqədi rayonlarında yerləşən qeyri-yaşayış obyektləri özəlləşdirilib. Belə əmlaklar sırasında ən yüksək qiymətə özəlləşdirilmiş əmlak Nərimanov rayonundakı beşmərtəbəli binanın qeyri-yaşayış sahəsi olub.

Hərrac zamanı qalib olmuş şəxslər hərrac protokolunu imzalayıb. Xatırladaq ki, hərracda özəlləşdirilmiş əmlaka mülkiyyət hüququnu təsdiq edən sənədin alınması da hazırda tez və rahat şəkildə həllini tapır. Belə ki, həmin əmlaklara dair qısa müddətdə hazır çıxarışlar təqdim olunur.

Hərracda iştirak proseduru da sadədir. Belə ki, iki sənədin – şəxsiyyət vəsiqəsi və behin ödənilməsini sübut edən sənədin təqdim edilməsi kifayət edir. Bütün bunlar isə elektron qaydada komitənin Özəlləşdirmə portalı üzərindən icra olunur.

Hərracda qalib olmuş fiziki və hüquqi şəxslərlə aparılmış sorğu onu göstərir ki, qaliblərin əksəriyyəti belə daşınmaz əmlakları biznes məqsədlərinə yönəldir. Belə əmlaklar qanunla icazə verilmiş müxtəlif növ gəlir mənbələrinə çevrilir. Yaxud da əmlak sahibi hərracda əldə etdiyi qeyri-yaşayış sahəsini və ya obyekti gələcəkdə icarəyə verməklə gəlir qazana bilir. Bəzən hərracda müxtəlif növ yük maşınları da özəlləşdirilir ki, belə nəqliyyat vasitələri də sonradan gəlir əldə etmək üçün müxtəlif fəaliyyətlərdə istifadə olunur.

Bütün bunlar onu deməyə əsas verir ki, belə əmlaklar sahibkarlıq fəaliyyəti baxımından fiziki və ya hüquqi şəxslər üçün kifayət qədər faydalıdır. Bu isə öz növbəsində belə hərraclara olan marağı artırır.

Qeyd edək ki, hərrac elanları hərrac günündən 1 ay əvvəldən, nəticələr isə hərracdan sonrakı 1 həftə ərzində komitənin informasiya resurslarında açıqlanır. Belə ki, komitənin “privatization.az” Özəlləşdirmə portalında hərrac tarixinə görə müvafiq səhmdar cəmiyyətləri, kiçik müəssisələr və qeyri-yaşayış sahələri, eləcə də nəqliyyat vasitələri barədə ətraflı məlumatlar yerləşdirilir. İstifadəçi portala daxil olaraq ayda 4 dəfə keçirilən hərracların birini seçib (hərrac tarixinə görə) istədiyi əmlaka elektron sifariş verir.

ƏMDK vətəndaşları, yerli və xarici investorları bu hərraclarda iştirak etməyə və əmlak sahibi olmağa dəvət edir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.