Bakı, 23 dekabr (AZƏRTAC). Bu gün, dekabrın 23-də Ukraynanın qocaman və nüfuzlu nəşri olan “Kiyevskiy teleqraf” qəzetində AZƏRTAC haqqında “Xəbərlər üzrə əsas agentlik” sərlövhəli analitik məqalə dərc edilmişdir. Məqalənin yarımsərlövhəsi belədir: “Azərbaycan Dövlət Teleqraf Agentliyi (AZƏRTAC) 2016-2019-cu illərdə dünya xəbər agentlikləri konqresinin sədri olacaqdır”.

Məqalənin müəllifi, bizim agentliyin Ukraynadakı xüsusi müxbiri Zeynal Ağazadə ölkəmizin həyatında əlamətdar tarixi hadisə barədə söhbət açaraq bildirir ki, xəbər agentliklərinin Səudiyyə Ərəbistanı Krallığının paytaxtı Ər-Riyadda keçirilmiş IV ümumdünya konqresində AZƏRTAC 2016-2019-cu illərdə dünya xəbər agentlikləri konqresinin sədri seçilmişdir.

Qəzet ukraynalı oxucuya xatırladır ki, bu il noyabrın 20-də Ər-Riyadda keçirilmiş konqresdə dünyanın 70-dən çox nüfuzlu xəbər agentliyinin, OANA, EANA, FANA, IINA xəbər alyanslarının, Sky News Arabia, Los Angeles Times, Guardian, ВВС kimi aparıcı media-strukturların, habelə MSN, Google, Yahoo kimi məşhur internet-korporasiyaların rəhbərləri iştirak etmişlər.

Məqalə müəllifi vurğulayır: “Bu seçim heç də təsadüfi deyildir. Bu gün Azərbaycanda planetar miqyaslı çoxsaylı möhtəşəm forumlar və tədbirlər keçirilir. Bakı beynəlxalq diskussiya klubuna çevrilir. Siyasətdən və iqtisadiyyatdan başlamış humanitar sahəyə və dünya idmanına qədər ən müxtəlif istiqamətlərin elitası və peşəkarları Bakıda görüşürlər”.

Məqalədə daha sonra deyilir ki, AZƏRTAC-ın ev sahibi kimi qonaq qəbul etməsi tamamilə qanunauyğundur: “Bu gün AZƏRTAC Asiya və Sakit Okean Ölkələrinin İnformasiya Agentlikləri Təşkilatı (OANA), Avropa xəbər agentlikləri alyansı (EANA), Beynəlxalq İslam Xəbər Agentliyi (İİNA) və başqa nüfuzlu informasiya birliklərinin üzvü, ölkənin aparıcı informasiya agentliyidir”.

Materialda qeyd olunur ki, AZƏRTAC çoxtərəfli formatla yanaşı ikitərəfli əsasda da uğurla əməkdaşlıq edir.

AZƏRTAC-ın Ukrayna Milli İnformasiya Agentliyi (Ukrinforum) ilə yaxşı işgüzar əlaqələri yaranmışdır. Yeri gəlmişkən AZƏRTAC-ın Ukraynadakı xüsusi müxbir məntəqəsi onun xarici ölkələrdə açılmış ilk müxbir məntəqələrindən biridir.

“Kiyevskiy teleqraf” qəzeti AZƏRTAC-ın Baş direktoru Aslan Aslanovun bu il sentyabrın 19-20-də Moskvada OANA-nın 15-ci Baş Assambleyasında çıxışından aşağıdakı sözləri sitat gətirir: “Bu gün informasiya agentlikləri qarşısında duran əsas məsələ texnoloji innovasiyaların tətbiqi və geniş istifadə edilməsi, cəmiyyətimizin, onun hər bir üzvünün həyatının ayrılmaz tərkib hissəsinə çevrilmiş sosial şəbəkələrlə qarşılıqlı fəaliyyət məsələsidir. Eyni zamanda xəbərlər bazarında kəskin rəqabətə davam gətirmək üçün agentliklər əsas informasiya tədarükçüsü rolunu qoruyub saxlamalıdırlar”. A.Aslanov həmin assambleyada OANA-nın vitse-prezidenti seçilmişdir.

Məqalədə vurğulanır ki, bu gün Azərbaycanda Prezident İlham Əliyevin strategiyası – bütün sahələrin modernləşməsinə, informasiya cəmiyyətinə keçidə istiqamətlənmiş strategiyası uğurla həyata keçirilir.

Materialın sonunda deyilir: “AZƏRTAC bu prosesdə özünün xüsusi rol oynamalı olduğunu bilir. Ən yeni informasiya texnologiyalarından istifadə edilməklə Azərbaycan haqqında informasiyanın yayılma sürəti, onun mötəbərliyi və yayılma coğrafiyasının genişlənməsi, habelə dünyada baş verən hadisələr haqqında Azərbaycan cəmiyyətinin hərtərəfli məlumatlandırılması agentliyin riayət etməli olduğu prioritetlərdir.

Məqalənin tam mətni və fotoşəkillərlə bu resursda tanış ola bilərsiniz: http://telegrafua.com/world/14651/.