İQTİSADİYYAT


OPEC və qeyri-OPEC ölkələrinin birgə komitəsi neftin hasilatının həcmində dəyişiklik etməməyi tövsiyə edib

Vyana, 24 may, AZƏRTAC

Vyanada Neft İxrac edən Ölkələr Təşkilatı (OPEC) Nazirlər Şurasının mayın 25-də keçiriləcək 172-ci iclası ərəfəsində növbəti aylar üçün neft hasilatının həcmi ilə bağlı mühüm tövsiyə verilib. OPEC və qeyri-OPEC ölkələrinin birgə komitəsi bu gün keçirilən məsləhətləşmələrdən sonra neft hasilatının limitlənməsinə dair qərarı daha doqquz ay müddətinə - 2018-ci ilin mart ayının sonunadək uzatmağı tövsiyə edib. Komitə adından verilən açıqlamada hasilatın cari vəziyyətə uyğunlaşdırılmasına riayət olunmasından məmnunluq ifadə edilib.

Qeyd edək ki, bu ilin yanvar ayından etibarən 13 OPEC ölkəsi və 11 qeyri-OPEC ölkəsi neft hasilatının həcmini ümumilikdə 1,8 milyon barrel azaldıb. Hasilatın azaldılması dünya bazarlarında xam neftin qiymətinə müsbət təsirini göstərib.

Sabah isə Vyanada növbəti aylar üçün neft hasilatı üzrə strategiya müzakirə olunacaq. Agentliklərin verdiyi məlumatlarda hasilatının həcminin hazırkı vəziyyətdə saxlanması barədə qərar qəbul olunacağı ehtimal edilir.

Elgün Niftəli

AZƏRTAC-ın xüsusi müxbiri

Vyana

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.