MƏDƏNİYYƏT
O taylı şairin kitabı Bakıda
Bakı, 22 fevral, Zərəngiz Mansurova, AZƏRTAC
“Elm və Təhsil” nəşriyyatında Tehran Mişov Mədəniyyət Dərnəyinin rəhbəri, Tehran Universitetinin Azərbaycan dili və tarixi kafedrasının müəllimi, şair Aqşin Ağkəmərlinin “Öpdüm Arazı” kitabı çapdan çıxıb.
AZƏRTAC xəbər verir ki, “Dənizdən bir damla”, “Dondurmaçı”, “Bizi yaşadan tarix”, “Söyüd ağacı”, “Şəngül, Məngül”, “Kibritçi qız” kitablarından sonra müəllifin oxucularla yeddinci görüşü olan bu topluda son dövrlərdə yazdığı şeirləri toplanıb.
Kitabda şairin yurd, Vətən eşqi, xalqının mənəvi dəyərlərinə hörmət, taleyinə, millətinə, dilinə ehtiramı əks olunub.
Müasir ədəbi məkanda özünəməxsus mövqeyi olan şairin “Öpdüm Arazı” kitabının fevralın 28-də Azərbaycan Yazıçılar Birliyinin “Natəvan” klubunda təqdimatı keçiriləcək.