İQTİSADİYYAT


Oleksiy Viskub: Azərbaycanla rəqəmsal sahədə əməkdaşlığın səmərəli nəticələri olacaq

A+ A

Bakı, 14 noyabr, AZƏRTAC

Azərbaycanın vergi sistemi dünyanın ən qabaqcıl ölkələrində tətbiq olunan əksər vergi xidmətlərini vergiödəyicilərinə təqdim edir.

Vergilər Nazirliyinin mətbuat xidmətindən AZƏRTAC-a bildirilib ki, bunu Vergi risklərinin təhlili və nəzarəti baş idarəsinin rəisi Zaur Fətizadə Vergilər Nazirliyində Ukraynanın Elektron İdarəçilik üzrə Dövlət Agentliyinin sədr müavini Oleksiy Viskubun rəhbərlik etdiyi nümayəndə heyəti ilə görüşdə deyib.

Z.Fətizadə qonaqlara Vergilər Nazirliyinin yaranması, milli vergi sisteminin formalaşması və inkişafı, eləcə də nazirlik tərəfindən həyata keçirilən elektron xidmətlər sistemi barədə məlumat verib.

Bildirilib ki, vergiödəyicilərinin işinin asanlaşdırılması, onlara göstərilən xidmətlərin genişləndirilməsi istiqamətində atılan addımlardan biri kimi 2007-ci ildən respublikamızda elektron bəyannamələrinin tətbiqinə başlanılıb. Sonrakı dövrdə banklarla elektron mübadilə sistemi qurulub, elektron vergi hesab-fakturaları və ƏDV depozit hesabının tətbiqinə başlanıb, fərdi sahibkarların və yerli investisiyalı hüquqi şəxslərin dövlət qeydiyyatı elektronlaşdırılıb.

Hazırda Vergilər Nazirliyi vergiödəyicilərinə 63 növ elektron xidmət göstərir və elektron xidmətlərin geniş tətbiqi prosesini fəal şəkildə davam etdirir.

Z.Fətizadə Vergilər Nazirliyinin “Asan İmza” vasitəsilə həyata keçirilən innovativ vergi xidmətləri üzrə əldə edilən nailiyyətlər barədə də məlumat verib.

Ukraynanın Elektron İdarəçilik üzrə Dövlət Agentliyinin sədr müavini Oleksiy Viskub Azərbaycanın bu sahədə nailiyyətlərinin təqdirəlayiq olduğunu diqqətə çatdırıb. Bildirilib ki, Azərbaycan və Ukrayna arasında elektron imza sahəsində əməkdaşlıq yeni müstəviyə qədəm qoyub və bu, yeni iqtisadi perspektivlər vəd edir. Oleksiy Viskub Azərbaycanla rəqəmsal sahədə əməkdaşlığın səmərəli nəticələri olacağını vurğulayıb.

“B.EST Solutions” şirkətinin rəhbəri Yana Krimpe elektron və mobil hökumət quruculuğunda mobil imzanın rolundan bəhs edib. Onun sözlərinə görə, Azərbaycanın texnologiyalarını qonşu ölkələrə ixrac etməyin zamanı yetişib və “Asan İmza” heyəti artıq bu istiqamətdə intensiv işlərə başlayıb. Ukraynada Azərbaycanın “Asan İmza” texnologiyasının bazasında mobil elektron imza xidmətinin tətbiqi ilə bağlı layihə uğurla başa çatdırılıb ki, bu da iki ölkə qarşısında sərhədlərarası elektron xidmətlərin yaradılması sahəsində yeni imkanlar açır.

Görüşdə qarşılıqlı maraq doğuran bir sıra digər məsələlər ətrafında da müzakirələr aparılıb.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.