REGİONLAR


Ölkəmizin aparıcı media nümayəndələri Naxçıvanın təhsil və mədəniyyət müəssisələri ilə tanış olublar

Naxçıvan, 2 iyun, AZƏRTAC

Xəbər verdiyimiz kimi, mayın 31-də Azərbaycan Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun təşkilatçılığı ilə ölkəmizin aparıcı media nümayəndələri muxtar respublikaya səfərə gəliblər. Səfər çərçivəsində onlar Naxçıvanın tarix-memarlıq, dini-mədəni abidələri ilə tanış olublar.

AZƏRTAC xəbər verir ki, gəzinti “Xan Sarayı” Dövlət Tarix-Memarlıq, Möminə Xatın və Açıq Səma Altında Muzey Kompleksi ilə tanışlıqla başlayıb.

Qonaqlar Naxçıvan xanlığının tarixini özündə yaşadan Xan sarayında olublar. Bildirilib ki, muzey Naxçıvan xanlığının dövlətçilik tariximizdəki rolu, Azərbaycanın bu ərazisindəki torpaqlarının qorunub saxlanılmasındakı xidmətləri nəzərə alınaraq Naxçıvan Muxtar Respublikası Ali Məclisi Sədrinin 2010-cu il 23 oktyabr tarixli Sərəncamı ilə yaradılıb. Hazırda 8 ekspozisiya zalından ibarət olan muzeydə Naxçıvan xanlığının dövlət və döyüş bayraqları, arxiv sənədləri, fotoşəkillər, Naxçıvan xanlığının və Kəngərli nəslinin tarixi ilə bağlı nəşr olunmuş kitablar, Naxçıvan xanlarının şəcərəsi, xanlığın xəritəsi nümayiş etdirilir. Qonaqlara bu torpağın yetirməsi olan görkəmli generalların həyat və fəaliyyəti barədə ətraflı məlumat verilib.

Media nümayəndələri Möminə xatın türbəsi və Açıq Səma Altında Muzeyə maraqla baxıblar.

“Naxçıvanqala” Tarix-Memarlıq Muzey Kompleksini və Nuh Peyğəmbərin məzarüstü türbəsini ziyarət edən qonaqlara bu qədim tarixi məkanlar haqqında ətraflı məlumat verilib.

Media nümayəndələri Naxçıvan Avtomobil Zavodunun istehsal potensialı ilə maraqlanıb, “Əshabi-Kəhf Ziyarətgahı” Dini-Mədəni Abidə Kompleksində, Duzdağ Fizioterapiya Mərkəzində olublar.

Sədərək rayonunun Heydərabad qəsəbəsinə gələn qonaqlara məlumat verilib ki, qəsəbə düşmənlə sərhəddə yerləşir. Ötən əsrin 90-cı illərində döyüş meydanına çevrilən qəsəbədə bu gün genişmiqyaslı quruculuq işləri aparılıb, müasir binalar inşa olunub, yeni istehsal müəssisələri yaradılıb.

Qonaqlar Sədərək Rayon Tarix-Diyarşünaslıq Muzeyi, qəsəbədə yeni inşa olunan 48 mənzilli çoxmərtəbəli yaşayış binası və burada yerləşən hərbi hissə ilə tanış olublar.

Şərur və Kəngərli rayonlarının gəzməli-görməli yerləri, idman və təhsil müəssisələri, tarixi abidələri, Şahtaxtı gömrük-keçid məntəqəsi ilə də tanış olan media nümayəndələrinə bölgənin tarixi və turizm potensialı barədə ətraflı məlumat verilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.