Bakı, 7 oktyabr, AZƏRTAC

Azərbaycan Respublikasının İnsan Hüquqları üzrə Müvəkkili Aparatı ölkə Prezidentinin 2011-ci il 27 dekabr tarixli Sərəncamı ilə təsdiq edilmiş “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”nın (MFP) icrası, təbliği və tətbiqi vəziyyətinin öyrənilməsi, həmçinin seçki hüququ ilə bağlı əhalinin maarifləndirilməsi məqsədilə Mərkəzi Seçki Komissiyası (MSK) ilə birgə silsilə regional ictimai dinləmələr təşkil edir. Bu qəbildən növbəti tədbir Gəncədə keçirilib.

Ombudsman Aparatından AZƏRTAC-a bildiriblər ki, ictimai dinləmədə MSK-nın əməkdaşı, Gəncə və regiondakı ətraf şəhər və rayonların icra hakimiyyətləri və bələdiyyələrinin, dairə seçki komissiyalarının, yerli qeyri-hökumət təşkilatlarının, KİV-lərin, habelə icmaların nümayəndələri iştirak ediblər.

Tədbirdə Gəncə Şəhər İcra Hakimiyyəti başçısının müavini Rafiq Şəfiyev çıxış edərək icra hakimiyyəti tərəfindən insan hüquqlarının təmini və MFP-nin icrası istiqamətində görülən işlər barədə məlumat verib. O, həmçinin MFP ilə bağlı müvafiq tədbirlər planının qəbul olunduğunu söyləyib, vətəndaşların qəbulu və müraciətlərinə baxılması, onların həllinə yönəlmiş tədbirlər haqqında danışıb.

Ombudsman Aparatının rəhbəri Aydın Səfixanlı “Azərbaycan Respublikasında insan hüquq və azadlıqlarının müdafiəsinin səmərəliliyini artırılması sahəsində həyata keçirilən islahatlar: nəticələr və qarşıda duran vəzifələr” mövzusunda məruzə ilə çıxış edib. O, ulu öndər Heydər Əliyevin 1998-ci il 18 iyun tarixli Sərəncamı ilə təsdiq edilmiş və ölkəmizdə insan hüquqları sahəsində ilk mühüm sənəd olan “İnsan hüquqlarının müdafiəsinə dair Dövlət Proqramı” barədə məlumat verib. Habelə 2011-ci ildə təsdiq olunmuş MFP-nin 2006-cı ildən uğurla həyata keçirilən İnsan Hüquqlarının Müdafiəsi üzrə Milli Fəaliyyət Planının məntiqi davamı olaraq, yeni prioritetlərə uyğun konkret istiqamətlər və tədbirlər müəyyən etdiyini vurğulayıb.

Məruzəçi bildirib ki, parlament seçkiləri ərəfəsində seçki hüquqları xüsusi əhəmiyyət kəsb edir. Seçmək və seçilmək hüquqları prioritet məsələdir. Seçkilər xalqımızın və demokratik, hüquqi dövlət quruculuğu yolunu seçmiş müstəqil dövlətimizin həyatında mühüm əhəmiyyətə malikdir. Ölkə Konstitusiyasının 56-cı maddəsinə əsasən, Azərbaycan Respublikası vətəndaşlarının dövlət orqanlarına seçmək və seçilmək, habelə referendumda iştirak etmək hüququ var. Beynəlxalq standartlara uyğun olaraq, respublikamızda seçki hüquqları sahəsində qanunvericilik, Seçki Məcəlləsi daha da təkmilləşdirilib, bu sənədə zəruri əlavə və dəyişikliklər edilib. Ölkə Prezidentinin 2005-ci il 11 may tarixli və 2005-ci il 25 oktyabr tarixli müvafiq sərəncamları mühüm əhəmiyyət kəsb edir. Bu sərəncamların əsas müddəaları Seçki Məcəlləsində nəzərə alınıb.

Aparatın rəhbəri maarifləndirmə işinin, o cümlədən seçki komissiyası üzvləri və müşahidəçilər üçün təlimlərin artırılmasını təklif edib.

MSK-nın nümayəndəsi Faiq Bəşirov “Azərbaycanda seçki qanunvericiliyinin təkmilləşdirilməsi və seçki hüququnun daha səmərəli təmini” mövzusunda çıxış edib. O, təmsil etdiyi qurumun fəaliyyəti, Seçki Məcəlləsinin müvafiq müddəaları, seçki sistemi, səsvermə qaydaları, müşahidəçilik institutu və müşahidə aparılmasının prinsipləri, müşahidəçilərin hüquq və vəzifələri, seçki komissiyalarının üzvləri üçün maarifləndirmə tədbirləri və digər məsələlər haqqında məlumat verib.

Müzakirələr zamanı region üzrə yerli icra hakimiyyətlərinin nümayəndələri, dairə və məntəqə seçki komissiyalarının üzvləri, bələdiyyələrin təmsilçiləri çıxış edərək MFP-nin icrasında maraqlı olduqlarını, bu sənədin həyata keçirilməsini dəstəklədiklərini, müvafiq tədbirlər planlarına əsasən, əhalinin bu prosesdə fəal iştirak etdiyini vurğulayıblar. Habelə onlar bu sahədə regionda aparılan işlər, seçkilərə hazırlıq, DSK və məntəqə seçki komissiyalarının, bələdiyyələrin fəaliyyəti, seçki məntəqələrinin texniki təchizatının vəziyyəti barədə məlumat verib, seçki hüquqları sahəsində maariflənmənin vacibliyini qeyd ediblər.