CƏMİYYƏT
Ombudsman Aparatında istehlakçıların hüquqlarının müdafiəsi məsələləri müzakirə edilib
Bakı, 28 mart, AZƏRTAC
Martın 28-də Azərbaycan Respublikasının İnsan Hüquqları üzrə Müvəkkili Aparatında istehlakçıların hüquqlarının müdafiəsi məsələləri müzakirə edilib.
AZƏRTAC xəbər verir ki, Ombudsman yanında biznes və insan hüquqları üzrə işçi qrupunun “İstehlakçıların hüquqlarının müdafiəsi biznes və insan hüquqları kontekstində” mövzusunda keçirilən növbəti iclasında aidiyyəti dövlət qurumlarının, vətəndaş cəmiyyəti institutlarının və KİV-lərin nümayəndələri iştirak ediblər.
İnsan hüquqları üzrə müvəkkil Elmira Süleymanova ölkədə sahibkarlığın inkişafının iqtisadi siyasətin prioritet istiqamətlərindən danışıb. Qeyd edilib ki, bu sahədə ardıcıl olaraq dövlət-sahibkar münasibətlərinin inkişaf etdirilməsi, biznes mühitinə dair qanunvericiliyin və inzibati prosedurların təkmilləşdirilməsi, sahibkarlığa dövlət dəstəyi mexanizmlərinin genişləndirilməsi, maarifləndirmə, sahibkarların işgüzar əlaqələrinin inkişafı və müxtəlif növ xidmətlərin göstərilməsi kimi kompleks tədbirlər həyata keçirilir. İnsan hüquqlarının müdafiəsi sahəsində həyata keçirilən tədbirlərin səmərəliliyinin artırılmasında və daha mütəşəkkil həyata keçirilməsində dövlət proqramları, strategiyalar, milli fəaliyyət planlarının qəbul edilməsinin böyük əhəmiyyəti var. Prezident İlham Əliyev tərəfindən təsdiq edilmiş “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”nda, “Azərbaycan 2020: gələcəyə baxış” İnkişaf Konsepsiyasında, o cümlədən milli iqtisadiyyat və iqtisadiyyatın əsas sektorları üzrə “Strateji Yol Xəritələri”ndə konstitusion hüquq və azadlıqların, o cümlədən sahibkarların və istehlakçıların hüquqlarının möhkəmləndirilməsi, biznes mühitinin davamlı olaraq təkmilləşdirilməsinin təmin olunması, bu sahədə maarifləndirmə işinin gücləndirilməsi istiqamətində zəruri tədbirlərin həyata keçirilməsi kimi mühüm müddəaların əks olunub.
Hər bir insanın hansı sosial qrupa mənsub olmasından asılı olmayaraq gündəlik həyatında bu və ya digər formada istehlakçı qismində çıxış etdiyini, daim öz yaşayışını təmin etmək üçün müxtəlif mallar aldığını və xidmətlərdən istifadə etdiyini, bu səbəbdən istehlak prosesinin istənilən şəxsin gündəlik həyatının ayrılmaz hissəsi olduğunu qeyd edən müvəkkil bildirib ki, istehlakçıların hüquqlarının müdafiəsi bir sıra konstitusion hüquqların təmin olunması ilə sıx bağlıdır. Məhz bu sahənin xüsusiyyəti və əhəmiyyəti nəzərə alınmaqla, BMT-nin “İstehlakçıların maraqlarını müdafiə etmək üçün rəhbər prinsiplər” əsasında “İstehlakçıların hüquqlarının müdafiəsi haqqında” Azərbaycan Respublikasının Qanunu qəbul edilib, bununla da ölkəmizdə müvafiq münasibətlərin dünya təcrübəsinə uyğunlaşdırılması istiqamətində ilkin addımlar atılıb. Ombudsman sahibkarlıq fəaliyyətinin həyata keçirilməsi zamanı insan hüquqlarının qorunması vəziyyətini daim diqqət mərkəzində saxladığını, aşkar olunan nöqsanların aradan qaldırılması ilə əlaqədar təklif və tövsiyələr verdiyini, aidiyyəti qurumlar qarşısında məsələlər qaldırdığını və qanunamüvafiq tədbirlər görüldüyünü bildirib.
Milli Məclisin iqtisadi siyasət, sənaye və sahibkarlıq komitəsinin sədri Ziyad Səmədzadə ümummilli lider Heydər Əliyevin təşəbbüsü ilə yaradılan Ombudsman təsisatının fəaliyyətini, parlamentlə əməkdaşlığını yüksək dəyərləndirib, onun insan hüquqları sahəsində böyük işlər gördüyünü vurğulayıb. O, mövzu üzrə fikir və mülahizələrini diqqətə çatdırıb, bu istiqamətdə fəaliyyətin perspektivləri barədə məlumat verib.
Tədbirdə Azərbaycan Respublikasının İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin rəis müavini Araz Əliyevin, Standartlaşdırma, Metrologiya və Patent üzrə Dövlət Komitəsinin əməkdaşı Elmar Rzayevin, Azad İstehlakçılar Birliyinin (AİB) sədri Eyyub Hüseynovun antiinhisar siyasəti, istehlakçıların hüquq və mənafelərinin müdafiəsində müasir yanaşma, idxal və istehsal olunan məhsulların təhlükəsizliyinə nəzarət məsələləri, problemlər və həlli perspektivləri, istehlakçıların hüquqlarının qorunmasında ictimai nəzarətin əhəmiyyəti və xüsusiyyətləri haqqında məruzələri dinlənilib.
Sonra mövzu ətrafında fikir mübadiləsi aparılıb.