CƏMİYYƏT
Ombudsman Aparatının nümayəndələri Yunanıstanda təcrübə mübadiləsi keçiblər
Bakı, 10 oktyabr, AZƏRTAC
Azərbaycan Respublikasının Ombudsman Aparatının bir qrup əməkdaşı Avropa İttifaqının Tvinninq layihəsi çərçivəsində oktyabr 3-7-də Yunanıstanda təcrübə mübadiləsi keçiblər.
Ombudsman Aparatından AZƏRTAC-a bildirilib ki, səfər zamanı tərtib olunmuş proqram üzrə müxtəlif qurumlarda, səhiyyə və penitensiar müəssisələrdə görüşlər keçirilib, Yunanıstan Ombudsmanının fəaliyyət istiqamətləri, Milli Preventiv Mexanizminin strukturu və fəaliyyəti, eləcə də formalaşmış ölkə təcrübəsi barədə fikir mübadiləsi aparılıb.
Yunanıstanın Ombudsmanı Andreas Pottakislə keçirilən görüşdə qurumun fəaliyyət istiqamətlərinə dair geniş fikir mübadiləsi aparılıb.
Azərbaycanın Ombudsman Aparatının rəhbəri Aydın Səfixanlı ölkəmizdə insan hüquqlarının müdafiəsi sahəsində həyata keçirilən islahatlar, o cümlədən qurumun yaranma tarixi, fəaliyyəti, Avropa İttifaqı və digər beynəlxalq təşkilatlarla əlaqələri haqqında geniş məlumat verib.
A.Səfixanlı, həmçinin Ermənistanın təcavüzkar siyasəti nəticəsində Dağlıq Qarabağ və ona bitişik yeddi rayonun işğal edildiyini, bir milyondan çox azərbaycanlının qaçqın və məcburi köçkünə çevrildiyini, dinc əhalinin hüquqlarının kobud şəkildə pozulduğunu, Azərbaycanın işğal olunmuş ərazilərində tarixi, dini, mədəni abidələrin, sosial obyektlərin, bütün infrastrukturun dağıdıldığını, münaqişənin həlli ilə bağlı Azərbaycan dövlətinin irəli sürdüyü sülh təşəbbüslərinin rəsmi Yerevan tərəfindən dəstəklənmədiyini diqqətə çatdırıb.
Görüşdə, həmçinin Azərbaycan Ombudsmanının dövlət orqanları və parlamentlə əməkdaşlığı, insan hüquqlarının daha səmərəli müdafiəsi istiqamətində irəli sürülən təkliflər və onların təmini, Konstitusiya Məhkəməsinə göndərilən sorğular barədə ətraflı məlumat verilib, insan hüquqlarına dair mövzular üzrə geniş fikir mübadiləsi aparılıb.
Ombudsman Aparatının əməkdaşları, həmçinin Yunanıstanın Ədliyyə Nazirliyində cəza-islah üzrə baş katib Eftikis Fitrakislə görüşüblər. E. Fitrakis Yunanıstan dövlətinin cəza və islah sahəsində gördüyü işlər, əməkdaşların peşə-hüquq mədəniyyətinin artırılması təcrübəsi və mövcud çətinliklərlə bağlı məlumat verib.
Nümayəndə heyətinin üzvləri Yunanıstanın cəza islah sistemində xüsusi yeri olan və nümunəvi model kimi götürülən azadlıqdan məhrum edilmiş məhkumların islah olunduğu Kənd təsərrüfatı cəzaçəkmə müəssisəsinə, Avropa İctimai Hüquq Təşkilatının bu ölkədəki ofisinə və psixiatriya müəssisəsinə baş çəkiblər, həyata keçirilən hüquq proqramları və hüquqi islahatlara dəstək məqsədi daşıyan layihələrlə tanış olub, müzakirələr aparıblar.
Səfər çərçivəsində Ombudsman Aparatının əməkdaşları ölkəmizin Yunanıstandakı səfirliyində də olub, səfir Rəhman Mustafayevlə görüşüblər.