Bakı, 19 sentyabr, AZƏRTAC

Azərbaycan Respublikasının insan hüquqları üzrə müvəkkilinin (ombudsmanın) fəaliyyətində qaçqınların və məcburi köçkünlərin, o cümlədən uşaq və gənclərin hüquqlarının müdafiəsi və təbliğinə mühüm diqqət yetirilir və bu hüquqların daha etibarlı təmin edilməsi istiqamətində davamlı tədbirlər həyata keçirilir.

Ombudsman Aparatından AZƏRTAC-a bildiriblər ki, insan hüquqları üzrə müvəkkil UNICEF-in və BMT-nin Qaçqınlar üzrə Ali Komissarlığının ölkəmizdəki müvafiq nümayəndəliklərinə yeni təyin olunmuş rəhbərlərlə birgə ölkə ərazisində məcburi köçkün ailələri üçün salınmış yeni qəsəbələrdə inşa edilmiş orta məktəblərin şagird və müəllimləri üçün BMT-nin Uşaq Hüquqları Konvensiyası üzrə maarifləndirici təlimlərə başlayıb.

İlk təlim Füzuli rayonunun Qayıdış, Zobucuq qəsəbələrində və Horadiz şəhərində yerləşən 16 orta məktəbin 7-11-ci sinif şagirdləri üçün Horadiz şəhər 3 saylı tam orta məktəbdə keçirilib.

Tədbirdə Füzuli Rayon İcra Hakimiyyətinin başçısı Alı Alıyev ümummilli lider Heydər Əliyevin siyasətini uğurla davam etdirən Prezident İlham Əliyev tərəfindən ölkəmizdə uşaqların inkişafına prioritet məsələlərdən biri kimi yanaşıldığını, bu istiqamətdə ardıcıl tədbirlərin həyata keçirildiyini bildirib. O, hazırda rayonda aparılan quruculuq-abadlıq işlərinin sürətlə davam etdirildiyini, həmçinin təhsil müəssisələrinin maddi-texniki bazasının möhkəmləndirilməsi, kompyuterləşməsi istiqamətində görülən işlər barədə ətraflı məlumat verib.

UNICEF-in Azərbaycandakı nümayəndəliyinin rəhbəri Edvard Karvardin BMT-nin Uşaq Hüquqları Konvensiyasında uşaqların heç bir ayrı-seçkiliyə yol verilmədən təhsil, iştirak, azad fikir, sağlamlıq, asudə vaxt, zorakılığa qarşı müdafiə və digər hüquqlarının təsbit edildiyini söyləyib, bu hüquqların uşaqlar tərəfindən öyrənilməsinin vacibliyini vurğulayıb və ölkənin gələcəyinin uşaqların təhsil, sağlamlıq və müdafiə hüquqlarının təmin edilməsi ilə bağlı olduğunu diqqətə çatdırıb.

BMT QAK-ın Azərbaycandakı nümayəndəliyinin rəhbəri Furio de Angelis dünyada məcburi köçkün uşaqların vəziyyəti, onların qarşılaşdıqları problemlər, rəhbərlik etdiyi qurumun mandatına uyğun olaraq uşaqlara yönəlik fəaliyyətləri, uşaq hüquqlarının təmin olunmasının və tədris proqramlarına daxil edilməsinin vacibliyini qeyd edib və Azərbaycan ombudsmanı ilə əməkdaşlığı yüksək qiymətləndirib.

İnsan hüquqları üzrə müvəkkil Elmira Süleymanova uşaqları müstəqilliyimizin 25 illiyi, habelə Bilik günü münasibətilə təbrik edib, uşaq hüquqlarına dövlət qurumları ilə yanaşı, beynəlxalq təşkilatların da diqqətinin artırılmasının, bu sahədə bilik və bacarıqların təkmilləşdirilməsi məqsədilə uşaqlarla asan anlaşılan dildə hüquqlarının tədrisi işinin aparılmasının vacibliyini vurğulayıb.

Müvəkkil 2009-2010-cu tədris ilindən ombudsmanın Təhsil Nazirliyi ilə əməkdaşlığı çərçivəsində paytaxtda və regionlarda 130-dan çox orta ümumtəhsil məktəbində, o cümlədən Füzulinin Horadiz şəhərinin, Kərimbəyli kəndinin və Qayıdış qəsəbəsinin hər birindən bir məktəb olmaqla 3 məktəbdə uşaq hüquqları üzrə pilləli tədris proqramının uğurla həyata keçirildiyini və bu təşəbbüsün davam etdiriləcəyini bildirib.

Sonda Ombudsman təsisatı tərəfindən uşaq hüquqları ilə bağlı hazırlanmış vəsaitlər, həmçinin UNICEF və BMT QAK-ın dəstəyi ilə Azərbaycan dilində çap edilmiş Uşaq Hüquqları Konvensiyası nəşri müəllimlərə və şagirdlərə paylanılıb.