MƏDƏNİYYƏT
Oqtay Rəcəbovun yubileyinə həsr olunan tədbir keçiriləcək
Bakı, 1 oktyabr, AZƏRTAC
Oktyabrın 7-də M.Maqomayev adına Azərbaycan Dövlət Filarmoniyasında görkəmli bəstəkar, Əməkdar Müəllim, professor Oqtay Rəcəbovun 75 illik yubileyinə həsr olunan tədbir keçiriləcək.
AZƏRTAC xəbər verir ki, Mədəniyyət və Turizm Nazirliyi və Azərbaycan Bəstəkarlar İttifaqının təşkilatçılığı ilə keçiriləcək tədbirdə respublikanın tanınmış elm, mədəniyyət və incəsənət xadimləri iştirak edəcəklər. Gecədə sənətkarın həyat və yaradıcılığı ilə yanaşı, Azərbaycan musiqi mədəniyyətinin inkişafındakı xidmətlərindən, sənət fəaliyyətindən danışılacaq.
Musiqi mədəniyyəti tarixində müstəsna xidmətləri olan bəstəkar “Göyçək Fatma” cizgi film-operası, “Xeyir və Şər” uşaq operası, 4 saylı simfoniya, simli orkestr üçün 5 saylı simfoniya, “Əlin cibində olsun” musiqili komediyalarının müəllifidir. O, həmçinin “Ağ atlı oğlan”, “Vüsal günləri” filmlərinə bəstələnmiş musiqinin müəllifi kimi də tanınır. Bundan əlavə, O. Rəcəbov “Musiqi və mənəvi tərbiyə”, rus dilində birinci və ikinci siniflər üçün yazılmış “Musiqi” dərsliklərinin və digər məqalə və kitabların müəllifidir.