CƏMİYYƏT
Ötən altı ayda Suraxanıda 2466 yeni iş yeri açılıb
Bakı, 3 avqust, AZƏRTAC
Suraxanı Rayon İcra Hakimiyyətində 2016-cı ilin birinci yarısının sosial-iqtisadi inkişafının yekunları və Nazirlər Kabinetinin son iclasında Azərbaycan Prezidenti İlham Əliyevin qarşıya qoyduğu vəzifələrə həsr olunan hesabat yığıncağı keçirilib.
Rayon icra hakimiyyətinin başçısı İlqar Abbasov ötən 6 ayda Suraxanıda görülən işlər, həyata keçirilən və nəzərdə tutulan layihələr barədə danışıb. Bildirilib ki, 2016-cı ilin 6 ayı ərzində Suraxanı rayonunda sənaye məhsulunun istehsalı 132,1 milyon manat, tikinti-quraşdırma işləri 20,9 milyon manat, nəqliyyat xidmətləri 2,7 milyon manat, əsas kapitala yönəldilən investisiyalar 14,1 milyon manat, kənd təsərrüfatı 1,9 milyon manat, pərakəndə ticarət dövriyyəsi 176,3 milyon manat, orta aylıq əməkhaqqı 555 manat təşkil edib, əhaliyə 99,8 milyon manat məbləğində pullu xidmətlər göstərilib, 2466 yeni iş yeri açılıb.
Cari il yanvar ayının 11-də Azərbaycan Prezidenti İlham Əliyevin iştirakı ilə ATEF şirkətlər qrupunun Qaraçuxur qəsəbəsində iriqabaritli transformatorlar zavodu istifadəyə verilib, yeni yüksəkgərginlikli avadanlıqlar zavodunun təməli qoyulub. Hazırda rayon əhalisinin 100 faizi elektrik enerjisi ilə, 98 faizdən çoxu məişət qazı ilə, 38 faizi fasiləsiz içməli su ilə, 58 faizi isə qrafiklə təmin olunur.
Rayonun əməliyyat şirkətləri tərəfindən lay suları və neftlə çirklənmiş 1 hektar torpaq sahəsi təmizlənərək texniki rekultivasiya olunub, ümumi sahəsi 540 kvadratmetr olan müxtəlif ölçülü 13 gölməçə qurudulub, 25 quyunun işçi meydançası və quyuətrafı sahələri neft tullantılarından təmizlənib, neft kollektorları təmir olunub.
Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə 2014-cü il noyabrın 5-dən başlayan birinci Ümumrespublika Yaşıllaşdırma Marafonu çərçivəsində Suraxanı Rayon İcra Hakimiyyətinin təşkilatçılığı ilə 13980, o cümlədən 2016-cı ilin 6 ayı ərzində 3080 ağac əkilib və yaşıllaşdırma işləri davam etdirilir.
Azərbaycan Prezidentinin tapşırıq və tövsiyəsi əsasında ölkəmizdə 15 fevral-15 may tarixlərində həyata keçirilən əhalinin pulsuz tibbi müayinəsi Suraxanı rayonunda da uğurla başa çatıb, 172 min 789 vətəndaş və 139 kollektiv, yəni, tibbi müayinədən keçməsi nəzərdə tutulanların 86,2 faizi müayinədən keçib.
2016-cı ilin 6 ayı ərzində rayonun aidiyyəti idarələri tərəfindən 8248 nəfərə 3 milyon 600 min manatdan artıq sosial müavinət ödənilib, 2400 ailəyə 1 milyon 138 min manatdan artıq ünvanlı dövlət sosial yardımı göstərilib, 208 nəfər tənha, əlil vətəndaşa evlərdə sosial xidmət göstərilib, 41 nəfər imtiyazlı və əlil vətəndaş reabilitasiya mərkəzinə, pansionat və sanatoriyalara göndərilib, Rayon Məşğulluq Mərkəzinə 4870 nəfər işaxtaran vətəndaş müraciət edib, müraciət edənlərdən 853 nəfəri işlə təmin edilib, 374 nəfərə işsiz statusu, 392 nəfərə isə işsizlik müavinəti verilib.
Hesabat yığıncağında əldə olunmuş nailiyyətlərlə yanaşı, həllini gözləyən problemlər, çatışmazlıqlar və onların aradan qaldırılması yolları də müzakirə olunub. Hesabat yığıncağında Milli Məclisin deputatı Ağacan Abıyev də çıxış edib.
Sonda Azərbaycan Prezidenti İlham Əliyevə yığıncaq iştirakçıları adından müraciət qəbul olunub.