REGİONLAR
Ötən il Lənkəranda sosial-iqtisadi inkişaf sahəsində uğurlu nəticələr qazanılıb
Lənkəran, 9 fevral, Bağır Əliyev, AZƏRTAC
Fevralın 9-da Lənkəran şəhərindəki Heydər Əliyev Mərkəzində 2015-ci ilin yekunlarına həsr olunmuş yığıncaqda rayonda sosial-iqtisadi inkişaf sahəsində görülmüş işlər və qarşıda duran vəzifələr müzakirə edilib.
AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad edib, Mərkəzin foyesində rayonda istehsal olunan kənd təsərrüfatı və sənaye məhsullarının sərgisi ilə tanış olublar.
Rayonun idarə, müəssisə və təşkilatlarının rəhbərlərinin, ərazi icra nümayəndələrinin, bələdiyyə sədrlərinin və ictimaiyyətin təmsilçilərinin iştirak etdiyi toplantıda hesabat məruzəsi ilə çıxış edən Lənkəran Şəhər İcra Hakimiyyətinin başçısı Taleh Qaraşov bildirib ki, ötən il rayonda sosial-iqtisadi inkişaf sahəsində uğurlu nəticələr qazanılıb.
Ötən il aprelin 11-də Prezident İlham Əliyevin Lənkərana növbəti səfərini rayonun ictimai-siyasi həyatında mühüm hadisə kimi dəyərləndirən T.Qaraşov səfər zamanı dövlətimizin başçısının yeni obyektlərin açılış mərasimlərində iştirakının hər bir lənkəranlıya böyük sevinc və fərəh hissi bəxş etdiyini diqqətə çatdırıb.
Qeyd edilib ki, ötən il rayonda ümumi məhsul buraxılışının həcmi 350,3 milyon manat olub. Bu, əvvəlki illə müqayisədə 0,6 faiz çoxdur. Bu dövrdə rayonda 2825 yeni iş yeri açılıb ki, onun 2212-si daimi iş yeridir.
“Kənd təsərrüfatı ili”ndə rayonda əkilmiş 8112 hektar sahənin 5138 hektarını tərəvəz, 1480 hektarını dənli bitkilər, 576 hektarını kartof, 282 hektarını bostan bitkiləri, 579 hektarını yem bitkiləri təşkil edib.
İl ərzində rayonda 126 min ton tərəvəz, 101 ton yaşıl çay yarpağı, 3124 ton taxıl məhsulları, 343 ton çəltik, 5115 ton kartof və 2548 ton bostan məhsulları istehsal edilib, meyvə bağlarından 17272 ton məhsul yığılıb.
Hesabat ilində rayonda heyvandarlıq məhsullarının istehsalı sahəsində də artım qeydə alınıb, 6451 ton ət, 32885 ton süd, 38,6 ton yun, 15,6 milyon ədəd yumurta istehsal edilib.
Bildirilib ki, ötən il rayonda sosial məsələlərin də həllinə diqqət artırılıb, bir sıra yeni obyektlər tikilərək istifadəyə verilib. Lənkəran şəhərində 29 çoxmərtəbəli yaşayış binasının dam örtüyü əsaslı təmir edilib, 14 binanın fasadı yenilənib.
Doqquz yaşayış məntəqəsini birləşdirən 11,2 kilometr uzunluğunda Aşağı-Nüvədi-Kənarmeşə-Şürük avtomobil yolu Azərbaycan Respublikası Prezidentinin müvafiq Sərəncamı ilə ayrılmış 3,2 milyon manat vəsait hesabına əsaslı təmir olunaraq asfaltlanıb. Eyni zamanda, digər Sərəncama əsasən ayrılmış 5,6 milyon manat vəsait hesabına 18,8 kilometrlik Liman-Nərimanabad-Balıqçılar avtomobil yoluna asfalt döşənib.
Diqqətə çatdırılıb ki, rayonun yaşayış məntəqələrində 42117 abonent təbii qazla təmin olunub. Bu, ümumi abonentlərin 87 faizini təşkil edir. Ötən il rayonun Darquba kəndində yeni məktəb binası, Lənkəran şəhərində 120 yerli uşaq bağçası tikilərək istifadəyə verilib.
Hesabat yığıncağında çıxış edənlər ötən il rayonda sosial-iqtisadi inkişaf sahəsində qazanılmış uğurlardan danışaraq, mövcud problemlərlə bağlı təkliflərini bildiriblər.
Tədbirdə Prezident Administrasiyasının məsul işçisi Habil Əzənmədov, Milli Məclisin deputatları Hadı Rəcəbli və Rüfət Quliyev iştirak ediblər.
Sonda iştirakçılar adından Prezident İlham Əliyevə müraciət qəbul olunub.