Bakı, 16 mart, AZƏRTAC

Mərkəzi Bankda Azərbaycan Banklar Assosiasiyası ilə birgə əməkdaşlıq çərçivəsində 2016-cı ildə keçirilən nağdsız ödənişlər üzrə nominasiya müsabiqəsinin qaliblərinin mükafatlandırılması tədbiri keçirilib.

Azərbaycan Respublikasının Mərkəzi Bankı ölkədə qabaqcıl texnologiyalara və proqram təminatlarına əsaslanan Milli Ödəniş Sisteminin yaradılması, beynəlxalq təcrübənin elektron ödəniş mühitində tətbiqinin genişləndirilməsi, iqtisadiyyatda nağdsız ödənişlərin xüsusi çəkisinin artırılması üzrə aidiyyəti hökumət orqanları və bank sektorunun aktiv iştirakı ilə müxtəlif layihələr və davamlı tədbirlər həyata keçirir. Həyata keçirilən bu layihələr çərçivəsində ödəniş infrastrukturunun əhatə dairəsinin innovativ ödəniş həlləri hesabına daha da genişləndirilməsi, bank sistemində elektron bankçılıq göstəricilərinin yüksəldilməsi, habelə bankların fəaliyyətinin stimullaşdırılması və təşviqi daim diqqət mərkəzində saxlanılır.

2013-cü ildən başlayaraq Mərkəzi Bank illik əsasda maliyyə vasitəçiliyində innovasiyaların tətbiqinin genişləndirilməsi və ölkədə nağdsız hesablaşmaların həcminin artırılması istiqamətində bankların fəaliyyətinin qiymətləndirilməsi və fərqlənmiş bankların mükafatlandırılması üçün nominasiya müsabiqəsi təşkil edir. Nominasiya müsabiqəsi üzrə qalib bankların müəyyən edilməsi üçün Mərkəzi Bankın, Azərbaycan Banklar Assosiasiyasının və xidmət mərkəzləri olan "AzeriCard" MMC və "MilliKart" MMC-nin nümayəndələrindən ibarət Münsiflər Heyəti formalaşdırılıb. Münsiflər Heyəti tərəfindən qaliblər banklar tərəfindən aylıq əsasda Mərkəzi Banka təqdim olunan statistik hesabatlılıq əsasında müəyyən edilir.

2016-cı ildə Mərkəzi Bank tərəfindən 5 nominasiya üzrə müsabiqə elan olunub.

Mərkəzi Bankdan AZƏRTAC-a bildiriblər ki, Azərbaycan Banklar Assosiasiyası ilə birgə təşkil edilən tədbirdə elan edilmiş nominasiyalar üzrə aşağıdakı qalib banklar mükafatlandırılıb:

"Nağdsız ödənişlər üzrə lider bank" nominasiyası üzrə:

I yer "Bank of Baku" ASC;

II yer "Bank Respublika" ASC;

III yer "Accessbank" ASC.

"Elektron bankçılıq xidmətlərində lider bank" nominasiyası üzrə:

I yer "Bank Respublika" ASC;

II yer "Turanbank" ASC;

III yer "Accessbank" ASC.

"Elektron ticarətin inkişafında lider bank" nominasiyası üzrə:

I yer "Unibank" ASC;

II yer "Bank of Baku" ASC;

III yer "Azərbaycan Beynəlxalq Bankı" ASC.

"Təmassız ödəniş kartları üzrə lider bank":

I yer "Dəmirbank" ASC;

II yer "Unibank" ASC;

III yer "Atabank" ASC.

"Təmassız POS-terminal infrastrukturu üzrə lider bank":

I yer "Dəmirbank" ASC;

II yer "Unibank" ASC;

III yer "Azərbaycan Beynəlxalq Bankı" ASC.

Elan edilmiş nominasiyalar üzrə qalib banklarla yanaşı, əldə olunan göstəricilərə görə fərqlənərək ilk beşlikdə olan banklara isə təşəkkür məktubu təqdim edilib.

Azərbaycan Respublikası Prezidentinin Sərəncamı ilə təsdiq edilmiş bir sıra strateji yol xəritələrinin icrası çərçivəsində rəqəmsallaşmış bank sisteminin formalaşdırılması, rəqəmsal ödənişlərin genişləndirilməsi, nağdsız qaydada aparılan kart əməliyyatlarının xüsusi çəkisinin artırılması üzrə qarşıya qoyulan hədəflərin uğurla icrası çərçivəsində Mərkəzi Bank bankların bu istiqamətdə fəaliyyətinin stimullaşdırılması məqsədilə Azərbaycan Banklar Assosiasiyası ilə birgə 2017-ci ildə də nominasiya müsabiqələrini davam etdirəcək.