İQTİSADİYYAT


Özəl şirkətlər də SOCAR istiqrazlarına maraq göstərirlər

Bakı, 23 iyun, AZƏRTAC

Özəl sektorda çalışan şirkətlər son dövrlər maliyyə aləti kimi daha çox istiqrazlara yatırım etməkdə maraqlıdırlar. Ekspertlər deyirlər ki, bazarda daha çevik iştirakçı olan hüquqi şəxslər istiqraza yatırım etməklə həm yüksək gəlir əldə edə, həm də biznes fəaliyyətində istifadə etdiyi vəsaitlərini daha etibarlı və risksiz idarə edə bilərlər.

İqtisadçı ekspert Rəşad Həsənov AZƏRTAC-a bildirib ki, 2016-cı ilin sentyabrından bazara daxil olan SOCAR istiqrazları artıq risksiz maliyyə aləti kimi tanınır. Doğrudur, qiymətli kağızlar bazarı barədə məlumatsız olan vətəndaşların bir qismi, ənənəvi alətlərə, o cümlədən daşınmaz əmlaka yatırım etməyə üstünlük verir. R.Həsənovun sözlərinə görə isə, bu uğurlu addım deyil, ehtiyac yarandıqda daşınmaz əmlakın pula çevrilməsi, yəni satılması daha çox vaxt aparır: “Satışı sürətləndirmək istəyən investor əmlakı dəyərindən ucuz qiymətə təklif etməlidir ki, bu da onun zərərlə üzləşməsinə səbəb ola bilər. SOCAR istiqrazlarında isə belə bir risk yoxdur. Bu maliyyə alətini istənilən vaxtda yüksək qiymətə satıb nağdlaşdırmaq mümkündür”.

Ekspertin sözlərinə görə, Azərbaycanda səhm bazarı daha az inkişaf etdiyi üçün yerli bazarda səhmlərə yatırım etmək investorlar üçün maraqlı deyil. Xarici səhmlərə investisiya yatırmaq üçün isə davamlı olaraq həmin şirkətin fəaliyyəti və hesabatlarının şəffaflığı izlənilməlidir. Səhm bazarı və FOREX kimi alətləri riskli fəaliyyət növü adlandıran Rəşad Həsənov deyir ki, burada investorların itki ilə üzləşmək ehtimalı böyükdür.

FOREX bazarı çox riskli, qlobal bazardır. Bazardakı çox böyük spekulyatorlar və alıcılar bundan istifadə edirlər. Ona görə də investorlar itki ilə üzləşə bilərlər. İstiqrazların isə müsbət tərəfi ondan ibarətdir ki, itkisi yoxdur, investor faizləri əvvəlcədən müəyyənləşdirilmiş məbləğdə və vaxtda alır. Onları istənilən vaxt alıb-satmaq, pula çevirmək mümkündür.

SOCAR istiqrazlarının satışına 2016-cı il sentyabrın 20-dən başlanılıb. 5 illik zəmanətlə verilən istiqrazların ümumi həcmi 100 milyon, nominal dəyəri isə 1000 dollardır. İllik gəliri 5 faiz olan istiqrazlar üzrə faiz ödənişləri hər üç aydan bir, hər istiqraza görə 12,5 dollar olmaqla həyata keçirilir və əldə olunan gəlirdən vergi tutulmur. İndiyədək istiqraz üzrə 2 dəfə faiz ödənişi olub, investorlara 2,5 milyon dollar ödənilib. Növbəti faiz ödənişi iyulun 17-də həyata keçiriləcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.