CƏMİYYƏT


Özünüməşğulluq proqramı üzrə artıq 362 nəfər işaxtaran və işsiz vətəndaşın biznes-planı müsbət qiymətləndirilib

A+ A

Bakı, 29 noyabr, AZƏRTAC

Azərbaycan Prezidenti İlham Əliyevin 7 aprel 2016-cı il tarixli Sərəncamına uyğun olaraq, əhalinin özünüməşğulluğunun təmin olunması üzrə proqramın icrası işləri davam etdirilir. Əmək və Əhalinin Sosial Müdafiəsi Nazirliyi özünüməşğulluq proqramı üzrə təlim kurslarını bitirmiş işaxtaran və işsiz vətəndaşların biznes-planlarının növbəti qiymətləndirilməsini həyata keçirib.

Nazirlikdən AZƏRTAC-a bildiriblər ki, iki gün davam edən qiymətləndirməyə 8 rayon və şəhər (Saatlı, Göyçay, Kürdəmir, Lerik, Astara, Masallı, Yardımlı, Mingəçevir) üzrə təlim kurslarını yekunlaşdırmış 141 nəfər tərəfindən biznes-planlar təqdim olunub. Biznes ideyasının reallaşdırılmasına hazırlıq, peşəkarlıq və təcrübə, motivasiya meyarları əsasında, obyektiv və şəffaf şəraitdə aparılan qiymətləndirmə nəticəsində həmin şəxslərdən 118 nəfərinin biznes-planları müsbət dəyərləndirilib. Biznes-planlar əsasən kənd təsərrüfatı, xidmət, istehsal və ticarət sahələrinə aid olub.

Özünüməşğulluq proqramı üzrə təlim kurslarını bitirmiş vətəndaşların özünüməşğulluq fəaliyyəti üzrə biznes-planlarının qiymətləndirilməsi prosesinə bu ayın əvvəllərində başlanılıb. Kursları yekunlaşdırmış 532 nəfərdən bu günədək artıq 441 nəfəri biznes-planların müdafiəsi prosesində iştirak edib. Onlardan 24 rayon üzrə 362 nəfərinin biznes-planları uğurlu hesab edilib.

Təlim kurslarını bitirmiş digər şəxslərin də özünüməşğulluq fəaliyyəti üzrə biznes-planlarının qiymətləndirilməsi müvafiq qrafik əsasında qarşıdakı dövrdə həyata keçiriləcək.

Xatırladaq ki, Azərbaycan Prezidenti İlham Əliyevin 7 aprel 2016-cı il tarixli Sərəncamına əsasən icra olunan özünüməşğulluq proqramına 1500 nəfər işaxtaran və işsiz vətəndaşın cəlb edilməsi, onların ailə bizneslərinin yaradılması nəzərdə tutulur.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.