CƏMİYYƏT


Özünüməşğulluq proqramı üzrə təlim kurslarını bitirmiş şəxslərə sertifikatlar təqdim olunub

A+ A

Bakı, 21 sentyabr, AZƏRTAC

Azərbaycan Respublikasının Prezidenti İlham Əliyevin “Əhalinin özünüməşğulluğunun təmin olunması sahəsində əlavə tədbirlər haqqında” 7 aprel 2016-cı il tarixli Sərəncamının icrası işləri uğurla davam etdirilir. Əmək və Əhalinin Sosial Müdafiəsi Nazirliyi tərəfindən özünüməşğulluq proqramında iştirak etməkdən ötrü müraciət edən şəxslərə biznesin təşkili üzrə təlimləri həyata keçirəcək daha bir qrup şəxs (təlimçi) üçün təşkil edilmiş təlim kursu başa çatıb.

AZƏRTAC xəbər verir ki, kursları başa vuran təlimçilərə sertifikatların təqdim olunması ilə bağlı keçirilən tədbirdə çıxış edən əmək və əhalinin sosial müdafiəsi naziri Səlim Müslümov vurğulayıb ki, Azərbaycan Prezidenti İlham Əliyevin “Əhalinin özünüməşğulluğunun təmin olunması sahəsində əlavə tədbirlər haqqında” Sərəncamı dövlət məşğulluq siyasətinin aktiv əmək bazarı proqramlarının əhəmiyyətli şəkildə genişlənməsinə əsaslanan yeni keyfiyyət mərhələsinə daxil olmasına şərait yaradıb. Qeyd edib ki, ötən dövrdə ayrı-ayrı dünya ölkələrində özünüməşğulluqla bağlı layihələr formatında müəyyən təcrübələr olsa da, ilk dəfə Azərbaycanda məhz dövlət səviyyəsində və bütün ölkəni əhatə edə biləcək şəkildə, geniş formada özünüməşğulluq proqramı icra olunur. Bu proqram ayrı-ayrı fərdlərin, onların timsalında ailələrin özünüməşğulluğuna yönəlsə də, nəticə etibarilə iqtisadiyyatda mühüm faktor olan kiçik və orta sahibkarlığın inkişafının dəstəklənməsi, yeni iş yerlərinin açılması prosesinin daimi olması hədəfinə istiqamətlənib.

Nazir bildirib ki, ölkəmizdə özünüməşğulluq proqramının uğurlu icrasına əminlik yaradan əsaslardan biri də son illərdə bu sahədə pilot layihələr çərçivəsində görülmüş işlərin müsbət nəticələridir: “Belə ki, Göyçay və Şamaxı rayonlarında 32 nəfər şəxsi (o cümlədən 11 nəfər əlilliyi olan şəxsi) əhatə edən iki layihə özünü doğrultdu. Layihələrə cəlb olunan insanlar müəyyən müddətdən sonra heyvandarlıq, quşçuluq, arıçılıq, bağçılıq, tərəvəzçilik (istixana), pərakəndə satış kimi istiqamətlər üzrə uğurlu şəkildə özünməşğulluq fəaliyyəti qurublar. Hətta bu fəaliyyətdən gəlir əldə etməklə fəal vergi və sosial sığorta ödəyicisinə çevriliblər. Onlardan bəziləri yeni işçilər də işə cəlb ediblər”.

S.Müslümov diqqətə çatdırıb ki, dövlət başçısının qeyd edilən Sərəncamı ölkəmizdə bu sahədə təcrübənin xeyli genişlənməsinə imkan yaradıb: “Sənədin yüksək səviyyədə icrası və özünüməşğulluq fəaliyyətinin təşkili ilə əlaqədar müvafiq normativ-hüquqi bazanın formalaşdırılması, ölkənin bölgələrində kiçik və mikro sahibkarlıq fəaliyyəti sahələrinə olan tələbatın öyrənilməsi, hər bir bölgə üzrə özünməşğulluq fəaliyyəti çərçivəsində dayanıqlı və gəlir gətirə bilən biznes sahələrinin müəyyən olunması işləri görülüb. Bu işlər yekunlaşdıqdan sonra Nazirliyin Kollegiyasının müvafiq Qərarı ilə təsdiq edilmiş “İşaxtaran vətəndaşların özünüməşğulluq fəaliyyətinin təşkili Tələbləri” əsasında özünüməşğulluq proqramının praktik icra mərhələsinə keçilib”.

Nazir qeyd edib ki, proqramda iştirak etmək üçün müraciət edən vətəndaşlarda şəxsi bizneslərin təşkili ilə bağlı zəruri bilik və bacarıqların formalaşdırılması, bu məqsədlə onlara təlimlərin keçirilməsi üçün hər bir rayon və şəhər üzrə təlimçilər seçilib: “Təlimçilərin seçilməsi prosesi Beynəlxalq Əmək Təşkilatının (BƏT) müvafiq meyarları əsasında və bu qurumun baş təlimçisi ilə birgə, müsahibə şəraitində aparılıb. Təlimçilərin bir qismi də işsiz və işaxtaran kimi məşğulluq orqanlarında qeydiyyatda olan və uyğun bacarıqlara, keyfiyyətlərə malik şəxslər arasından müəyyən olunub. Cari ilin avqustun 4-dən BƏT-in baş təlimçisi tərəfindən nazirliyin Göyçay rayonundakı Regional Peşə Tədrisi Mərkəzində təlimçilər üçün hər biri bir həftəlik təlim kurslarına başlanılıb. Hər bir kursda 15 nəfər təlimçi əhatə olunur və kursları bitirdikdən sonra onlara sertifikatlar verilir. Hazırda artıq 5-ci təlim kursu yekunlaşıb ki, bu kursu uğurla başa vuranlara sertifikatlar təqdim ediləcək. Təlim kursları davam edir və ümumilikdə ölkə üzrə özünüməşğulluq proqramı ilə bağlı 142 təlimçinin hazırlanması nəzərdə tutulub. Onlardan 75 nəfəri artıq hazırdır. Bu şəxslərlə müvafiq müqavilələr imzalanıb və onlar təlimçi kimi əmək fəaliyyətinə başlayırlar”.

S.Müslümov ötən müddətdə təlim kurslarını bitirərək sertifikat almış təlimçilərin öz rayonlarında müvafiq işlərə başladıqlarını diqqətə çatdırıb: “Təlimçilər tərəfindən artıq 19 rayon (Ağdam, Bərdə, Tərtər, Hacıqabul, Salyan, Ağcabədi, Laçın, Xocavənd, Beyləqan, Göyçay, Şirvan, Füzuli, Yevlax, Neftçala, Saatlı, Biləsuvar, Cəbrayıl, Sabirabad, Kürdəmir) üzrə özünüməşğulluq proqramında iştirak etmək üçün müraciət etmiş 367 nəfər işaxtaran və işsiz vətəndaş üçün hər biri iki aylıq təlimlər həyata keçirilir. Təlimlər zamanı iştirakçılara biznesin təşkili üzrə biliklərin aşılanması və təlim müddətində onlar tərəfindən özünüməşğulluq fəaliyyəti göstərəcəkləri müvafiq istehsal və xidmət sahələri üzrə biznes-planların hazırlanması nəzərdə tutulur. Biznes-planların nazirlikdə yaradılmış müvafiq komissiya tərəfindən qiymətləndirilməsi və müdafiəsi prosesinin nəticəsinə uyğun olaraq onların özünüməşğulluq fəaliyyətinə başlamaları məqsədilə şəxsi ailə təsərrüfatlarını qurmaları üçün mal və materiallarla təminatı həyata keçiriləcək”.

Özünüməşğulluq proqramında iştirak etmək üçün müraciət edənlərin seçimi məsələsinə toxunan nazir bildirib ki, onlar dövlət başçısının müvafiq Sərəncamının imzalandığı vaxta, yəni carı il aprelin 7-dək məşğulluq orqanlarında işaxtaran və işsiz kimi qeydiyyatda olan vətəndaşlar arasından seçilir: “Onların ev təsərrüfatlarına baxış keçirilir, özünüməşğulluq fəaliyyəti üçün potensial imkanları nəzərə alınmaqla bu seçim aparılır. Cari ilin sonunadək özünüməşğulluq proqramında iştirak etmək və bunun üçün təlimlərə cəlb olunmaq üçün ümumilikdə 1500 nəfər seçiləcək. Əgər hər ailədə orta hesabla 5 nəfərədək ailə üzvünün olduğunu nəzərə alsaq, bu proqram 1500 ailə üzrə ümumilikdə 7,5 min nəfərədək insanın rifahında müsbət dəyişikliklərə imkan yaradacaq”.

Tədbirdə Əmək və Əhalinin Sosial Müdafiəsi Nazirliyinin aparatının Məşğulluq siyasəti və demoqrafiya şöbəsinin müdiri Elnur Süleymanov, nazirlik yanında Dövlət Məşğulluq Xidmətinin rəisi Anar Bədəlbəyli və BƏT-in sertifikatlı baş təlimçisi Azad Rəhimov proqramın icrası sahəsində aparılan işlərlə bağlı məlumat veriblər. Onlar təlimçilərin seçilməsi və onlar üçün təlim kurslarının təşkili, kursları bitirənlər tərəfindən özünüməşğulluq proqramında iştirak etmək üçün müraciət edənlərə təlimlərin keçirilməsi prosesinin BƏT-in meyarlarına əsasən aparıldığını diqqətə çatdırıblar.

Daha sonra təlim kursunu başa vurmuş təlimçilərə sertifikatlar təqdim olunub.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.