REGİONLAR
PAYTAXTIN RAYONLARINDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
AZƏRTAC xəbər verir ki, avqustun 25-də Bakı şəhərinin 7 rayonunda əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Paytaxt sakinlərinə 500 tondan artıq məhsul təklif olunmuşdur.
Nəsimi rayonunda yerləşən “Təzə bazar” MMC-nin həyətindəki yarmarkada satışa Sabirabad, Hacıqabul, Gədəbəy, Salyan və Tovuz rayonlarından 100 tondan yuxarı məhsul çıxarılmışdı. Kənd Təsərrüfatı Nazirliyinin, Nəsimi Rayon İcra Hakimiyyətinin nümayəndələri və “Təzə bazar” MMC-nin rəhbərliyi meyvə-tərəvəzin, bostan və süd məhsullarının münasib qiymətə satılması üçün lazımi şərait yaratmışdılar. Bu məhsulların qiymətinin bazarlardakı ilə müqayisədə 20-25 faiz ucuz olması alıcıları, yaradılan şərait isə satıcıları razı salırdı. Burada satışa nəzarət edilir, alıcıların arzu və təklifləri dinlənilir, fermerlərin rəyləri öyrənilirdi.
Suraxanıda “Günəş” ticarət mərkəzindəki yarmarkada Kənd Təsərrüfatı Nazirliyinin nümayəndəsi Sabir Əhədov bildirdi ki, Lənkəran, Şəki, Balakən, Samux və Qobustan rayonlarından 30,3 ton müxtəlif çeşiddə kənd təsərrüfatı məhsulları gətirilmişdir.
Burada lənkəranlı fermer Firdovsi Bəndiyev satışa 2 ton pomidor, 500 kiloqram xiyar, 300 kiloqram soğan, 150 kiloqram badımcan çıxarmışdı. Alıcılara badımcanın kiloqramı 10-15, soğanın kiloqramı 30, xiyarın kiloqramı 30-40, qarpızın kiloqramı 10, pomidorun kiloqramı 20-30 qəpiyə, mal ətinin kiloqramı 3 manat 60 qəpiyə təklif edilirdi.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə cəlilabadlı fermerlər satışa 6,2 ton keyfiyyətli meyvə-tərəvəz çıxarmışdılar.
Metronun “Əhmədli” stansiyasının yaxınlığında, “Azər” ticarət mərkəzindəki yarmarkaya Ağcabədi, Quba, Qəbələ, Biləsuvar, Ucar, Şəmkir, Salyan, Kürdəmir və Sabirabad rayonlarından müxtəlif kənd təsərrüfatı məhsulları gətirilmişdi. Kənd Təsərrüfatı Nazirliyinin nümayəndəsi Mustafa Rüstəmov bildirdi ki, bu gün rayon ərazisində fəaliyyət göstərən iki yarmarkaya (ikinci yarmarka General Şıxlinski küçəsi, 37, metronun “Həzi Aslanov” stansiyasının yaxınlığındakı “Ordubad” kiçik müəssisəsinin ticarət mərkəzində fəaliyyət göstərir) ümumilikdə 211 tondan çox məhsul gətirilmişdir. Satışa daha çox üzüm, qarpız, kartof çıxarılmışdır.
Metronun “İnşaatçılar” stansiyasının yaxınlığındakı yarmarkada paytaxt sakinlərinə Qusar, Salyan, Dəvəçi, Sabirabad, Xaçmaz və Beyləqan rayonlarından gətirilmiş 82 tondan çox müxtəlif çeşidli kənd təsərrüfatı məhsulları təklif olunurdu. Yarmarkaya möhtəkirlərin müdaxilə etməməsi üçün ciddi tədbirlər görülmüşdü. Alıcılardan Nicat Hüseynov, Fazil Bəkirov və başqaları yarmarkaların təşkilatçılarına təşəkkür edir, bu işin davamlı olmasını arzulayırdılar.
Səbail rayonunun Badamdar qəsəbəsindəki yarmarkaya Ağdaş, Salyan, Saatlı, Masallı və digər rayonlardan 23 tondan çox məhsul gətirilmişdi.
Nərimanov rayonundakı Keşlə Ticarət Mərkəzində təşkil olunmuş yarmarkaya Xaçmaz Rayon İcra Hakimiyyəti başçısının nümayəndəsi Salmanşah Pənahov bildirmişdir ki, satışa təmsil etdiyi rayondan 21 ton tərəvəz, 9 ton meyvə gətirilmişdir. Bundan əlavə, satışa, İmişli və Tovuz rayonlarından 1,3 ton ağartı, 300 kiloqram bal, 6,5 ton kartof, Astaradan 3,1 ton soğan və digər tərəvəz məhsulları, Salyan və Neftçaladan 1,5 ton balıq, 0,5 ton konserv, 4 ton yemiş-qarpız, Oğuz və Qobustandan 3 ton mal və qoyun əti, Giləzi broyler fabrikindən 500 kiloqram toyuq əti, 25 min ədəd yumurta və s. çıxarılmışdı.
Regionların sosial-iqtisadi inkişafı Dövlət Proqramına uyğun keçirilən belə tədbirlər əhalinin sosial rifahını yaxşılaşdırmaq məqsədi daşımaqla yanaşı, bazarlarda qiymətlərin süni surətdə qaldırılmasının da qarşısını alır.