Parisdə BMT-nin iqlim dəyişikliyi ilə bağlı COP 21 konfransı işə başlayıb
Paris, 30 noyabr, AZƏRTAC
Noyabrın 30-da Parisdə BMT-nin iqlim dəyişikliyi ilə bağlı COP 21 konfransı öz işinə başlayıb.
Konfransda 150-dək ölkənin dövlət və hökumət başçıları iştirak edirlər.
Tədbirin məqsədi Planetin orta temperatur artımının selsi cədvəli üzrə 2 dərəcədən aşağı səviyyədə saxlanılmasına dair beynəlxalq sazişin imzalanmasıdır.
Azərbaycanı konfransda Xarici İşlər, Ekologiya və Təbii Sərvətlər, İqtisadiyyat və Sənaye, Nəqliyyat nazirliklərinin, SOCAR-ın, Alternativ və Bərpa Olunan Enerji Mənbələri üzrə Dövlət Agentliyinin, ölkəmizin Fransadakı səfirliyinin nümayəndələri təmsil edirlər.
Tədbir Parisdə törədilmiş terror aktı qurbanlarının xatirəsinin bir dəqiqəlik sükutla yad edilməsi ilə başlayıb.
Konfransın açılış sessiyasından sonra iştirakçı ölkələrin prezidentlərinin iclası başlayıb.
Günün birinci yarısında keçirilən plenar iclasa Fransa Prezidenti Fransua Olland, ikinci yarısındakı iclasa isə Meksika Prezidenti Enrike Penya Nieto sədrlik edib.
İclaslarda çıxış edən dövlət başçıları bəşəriyyəti narahat edən iqlim dəyişikliyi ilə bağlı qarşıda duran vəzifələrdən danışıblar.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
