Paris, 14 may, AZƏRTAC

Mayın 13-də Azərbaycan İqtisadiyyat və Sənaye Nazirliyinin dəstəyi, Avropa-Azərbaycan Cəmiyyətinin və “Business France”nin təşkilatçılığı ilə Parisdə “Şaxələndirilmiş, desentralizasiya olunmuş iqtisadiyyata doğru” mövzusunda ikinci Fransa-Azərbaycan biznes forumu keçirilib.

Forumu açan Avropa-Azərbaycan Cəmiyyətinin Paris bürosunun rəhbəri xanım Mari Laetisiya-Gurdən tədbirin Fransa ilə Azərbaycan arasında əməkdaşlığın inkişafında xüsusi rol oynadığını vurğulayaraq təmsil etdiyi cəmiyyətin əsas məqsədləri barədə məlumat verib. Bildirib ki, Azərbaycan həqiqətlərinin dünyaya çatdırılması, Avropa ölkələri ilə Azərbaycan arasında sıx əlaqələr qurulması cəmiyyətin əsas fəaliyyət istiqamətlərindəndir.

Fransa ilə Azərbaycan arasında əlaqələrin inkişafına toxunan ofis rəhbəri son illərdə bu sahədə nəzərəçarpacaq irəliləyişlərin olduğunu, Fransa Prezidenti Fransua Ollandın iki dəfə ölkəmizə səfər etdiyini xatırladıb.

Avropa-Azərbaycan Cəmiyyətinin ölkəmizin tanıdılması istiqamətindəki fəaliyyətini yüksək qiymətləndirən Azərbaycanın Fransadakı səfiri Elçin Əmirbəyov forumun iki ölkə arasındakı iqtisadi sahədə münasibətlərə yeni töhfələr verəcəyini söyləyib.

Ölkəmizin Fransanın əsas iqtisadi tərəfdaşlarından biri olduğunu bildirən səfir deyib ki, zəngin təbii ehtiyatlara malik Azərbaycanda iqtisadiyyatın şaxələndirilməsi və regionların iqtisadi inkişafı dövlətin əsas prioritetlərindəndir.

Azərbaycanın Fransa ilə iqtisadi, mədəni, idman, turizm və digər sahələrdə əməkdaşlıqda maraqlı olduğunu vurğulayan səfir şəhərlərimiz arasında dostluq xartiyasının imzalandığını, Fransa tərəfinin də buna xüsusi dəstək verdiyini bildirib.

Elçin Əmirbəyov Azərbaycan hökuməti tərəfindən sosial-iqtisadi inkişafla bağlı müxtəlif Dövlət proqramlarının həyata keçirilməsinin regionlarda yeni infrastrukturların yaranmasına xidmət etdiyini, bunun da nəticəsində xarici investorların bölgələrə diqqət yetirməsini və sərmayə yatırmasını, nəticədə bir milyondan artıq yeni iş yerinin açılmasını, kənd təsərrüfatının inkişafı ilə əlaqədar 2015-ci ilin “Kənd təsərrüfatı ili” elan edilməsini xüsusi vurğulayıb.

Səfir sabit və müstəqil ölkə olan Azərbaycanın mühüm enerji layihələrinin təşəbbüskarı və aparıcı qüvvəsi kimi çıxış etdiyini, informasiya və kommunikasiya texnologiyaları ilə bağlı bir sıra layihələri uğurla həyata keçirdiyini, Avropanın enerji təhlükəsizliyi baxımından etibarlı tərəfdaşı olduğunu bildirib.

Son Dünya İqtisadi Forumunda dünya rəqabətlilik reytinqdə Azərbaycanın region ölkələr arasında birinci yerdə olduğunu xatırladan diplomat Cənubi Qafqaz bölgəsində ümumdaxili məhsulun 75 faizinin ölkəmizin payına düşdüyünü qeyd edib və hər il Gəncədə təşkil edilən beynəlxalq şərabçılıq festivalında Fransanın qonaq qismində iştirakını yüksək dəyərləndirib.

Avropa qitəsində ən böyük idman tədbiri olacaq “Bakı-2015” ilk Avropa Oyunlarına sayılı günlər qaldığını xatırladan Elçin Əmirbəyov forum iştirakçılarını bu Oyunlarda iştirak etmək üçün Azərbaycana, xalqımızın zəngin mədəni dəyərləri ilə yaxından tanış olmağa dəvət edib.

Fransanın Azərbaycandakı səfiri Paskal Mönye çıxışında ötən forumla müqayisədə bu il təşkil olunan tədbirdə iştirakçıların sayının çoxluğunu ölkələrimiz arasında əməkdaşlığın yüksək göstəricisi kimi qiymətləndirib.

Azərbaycanın iqtisadi cəhətdən Cənubi Qafqaz və Xəzər dənizi bölgəsində ən inkişaf edən, qabaqcıl Avropa ölkələri arasında layiqli yeri tutan ölkə olduğunu diqqətə çatdıran fransız diplomatı hazırda hökumətin qeyri-neft sektorunun inkişafına xüsusi diqqət yetirdiyini, bununla əlaqədar müxtəlif layihələrin həyata keçirildiyini bildirib.

Ölkələrimiz arasındakı mövcud əlaqələrə toxunan səfir Bakıda Fransız-Azərbaycan Universitetinin yaranmasına dair niyyət məktubunun imzalandığını, hava məkanı üçün yeni Airbüs təyyarələrinin alındığını, şəhər infrastrukturlarının inkişafında Fransanın yaxından iştirak etdiyini diqqətə çatdırıb.

Fransanın və Azərbaycanın müxtəlif şirkətlərinin nümayəndələrinin forumdakı “Azərbaycan Fransa və Avropa İttifaqının strateji iqtisadi tərəfdaşıdır”, “Xarici investorlar üçün Azərbaycanın cəlbediciliyi, bazarın vəziyyəti islahatlar və perspektivlər”, “Prioritet qismində iqtisadiyyatın şaxələnməsi - Azərbaycan Cənubi Qafqazın qabaqcıl bazarı rolunda” və digər mövzularda çıxışlarında Azərbaycanla Avropa İttifaqı arasında əməkdaşlıqdan bəhs olunub, Avropa İttifaqının qonşuluq siyasəti və Şərq tərəfdaşlığı çərçivəsində Azərbaycanla iqtisadi, elm, təhsil və digər sahələrdə layihələrin uğurla həyata keçirildiyi vurğulanıb, ölkəmizin Dünya Ticarət Təşkilatına üzv olması istiqamətində danışıqlar aparıldığı qeyd edilib.

Forum çərçivəsində “Bakı-2015” ilk Avropa Oyunlarının təqdimatı keçirilib. Qeyd olunub ki, Avropa Oyunları ilə bağlı hazırlıq işləri başa çatıb. Müasir üslubda inşa olunan yeni stadion artıq hazırdır. Sağlam rəqabət şəraitində keçiriləcək yarışlarda 16 olimpiyada və 4 qeyri olimpiada idman növündə 6 min idmançı öz qüvvəsini sınayacaq. Oyunlar, həmçinin Fransanın “L’Equipe” televiziya kanalı vasitəsilə də yayımlanacaq. Oyunların gedişatını minə yaxın jurnalist işıqlandıracaq.

Sonda Avropa Oyunları ilə bağlı videoçarx göstərilib. Forum iştirakçıları bu mühüm idman tədbirinə həsr olunan fotosərgi ilə tanış olublar.

Əsgər Əliyev

AZƏRTAC-ın xüsusi müxbiri

Paris