MƏDƏNİYYƏT


Polad Bülbüloğlu: UNESCO-nun əvvəlki nüfuzunu qaytarmaq, onun səsinin bütün dünyada eşidilməsini istəyirəm

Paris, 15 iyul, AZƏRTAC

Fransanın http://www.huffingtonpost.fr saytında UNESCO-nun baş direktoru vəzifəsinə namizəd, Azərbaycanın Rusiyadakı səfiri Polad Bülbüloğlunun “UNESCO-nun əvvəlki nüfuzunu geri qaytarmaq istəyirəm ki, onun səsi Parisdə və bütün dünyada eşidilsin” adlı məqaləsi dərc olunub.

Məqalədə UNESCO-nun imicinə uyğun gələn humanizm, həmrəylik, qardaşlıq və universallıq kimi dəyərlərin xüsusi olaraq qeyd edilməsi üçün ən yaxşı vaxtın Ramazan bayramı olduğunu diqqətə çatdıran müəllif bildirib ki, BMT-nin 17 qurumundan təhsil, elm və mədəniyyət sahələri üzrə ixtisaslaşan təşkilat kimi UNESCO yarandığı gündən xalqlar və dövlət rəhbərləri ilə əməkdaşlıq edərək ədalətə, hüquqi dövlətə, insan hüquqlarına, əsas azadlıqlara riayət edilməsi istiqamətində fəaliyyət göstərir.

Məqalədə mülki şəxslərin, cəmiyyətin ən zəif təbəqəsi olan uşaqların müharibələrin əzablarına daha çox düçar olduğu bildirilərək, onların müharibə əzablarından qurtulması üçün mədəniyyət, etnik, dil və din müxtəlifliyini, sivilizasiyaların əsasını qoyan ideya və normaların qorunub saxlanılmasının vacibliyi vurğulanır. Universal insanlığı qoruyub saxlamaq və təşviq etmək lazımdır ki, cəmiyyətimizin birliyini, birgə yaşamaq ideyalarını məhv etmək, dağıtmaq istəyən cahillərdən qoruya bilək. Dünyamızın tərəqqisinə mane olmaq istəyən düşmənlərimizə, terrorist təşkilatlara, nihilistlərə qarşı mübarizə aparmalıyıq. Xoşməramlı insanlar, eləcə də diplomatik rəhbərlər kimi belə dəyərlərimizi müdafiə və təşviq etmək ümdə və təcili vəzifəmizdir. Mədəni və tarixi irsimizi məhv edən müharibələrin qarşısı alınmalıdır. UNESCO-dan siyasi alət kimi istifadə olunması təşkilatın əsl missiyasının yerinə yetirilməsinə və fəaliyyətinin səmərəliliyinə mane olur.

UNESCO-nun sülhün qorunub saxlanması istiqamətində mühüm rol oynadığını diqqətə çatdıran P.Bülbüloğlu qurumun maliyyə büdcəsinə yenidən baxılmasının vacibliyinə toxunub. Qeyd edib ki, iqlim dəyişikliyi, terrorizmin mülki şəxslərə və onların həyatına mənfi təsiri, müharibələrin dağıdıcı nəticələri, maddi və qeyri-maddi irsin dağıdılması kimi məsələlərə diqqət çox vacibdir və UNESCO özəl sektorla razılaşaraq bunların həlli ilə məşğul olmalıdır. Maliyyə vəsaitləri və böyük intellektual imkanlar bu işə yönəldilməlidir.

O vurğulayıb ki, BMT-nin digər institutları, eləcə də Parisdə yerləşən, 35 üzv ölkədən ibarət Əməkdaşlıq və İqtisadi İnkişaf Təşkilatı və 84 üzvdən ibarət Fransızdilli Ölkələrin Beynəlxalq Təşkilatı kimi digər hökumətlərarası təşkilatlarla əməkdaşlıq etməklə bu istiqamətdə müvəffəqiyyət qazanmaq olar. Müəllif diqqətə çatdırıb ki, qurumun əvvəlki nüfuzunu qaytarmaq, onun səsinin bütün dünyada eşidilməsinə nail olmaq, İcra Şurasının oktyabr ayında toplaşacaq 202-ci sessiyasına və noyabr ayında UNESCO-nun 39-cu baş konfransına bu ambisiyalarla gedərək təşkilatın 11-ci baş direktoru olmaq istəyir.

Şəhla Ağalarova

AZƏRTAC-ın xüsusi müxbiri

Paris

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.