Prezident İlham Əliyev: Azərbaycan bölgədə çox önəmli nəqliyyat mərkəzinə çevrilir
Bakı, 21 dekabr, AZƏRTAC
Azərbaycan bölgədə çox önəmli nəqliyyat mərkəzinə çevrilir. İki ay bundan əvvəl istifadəyə verilən Bakı-Tbilisi-Qars dəmir yolu qitələri - Asiyanı Avropa ilə ən qısa yolla birləşdirdi. Hazırda biz “Şimal-Cənub” nəqliyyat dəhlizi üzərində işləyirik. Bu istiqamətdə də çox önəmli nəticələr var.
AZƏRTAC xəbər verir ki, bu fikirləri Prezident İlham Əliyev “2017-İslam Həmrəyliyi İli: Dinlər və mədəniyyətlərarası dialoq” mövzusunda beynəlxalq konfransda söyləyib.
“Biz ilin sonuna qədər növbəti nəticələri gözləyirik ki, qısa müddətdə - bəlkə də iki-üç il ərzində bu yolu da biz qonşu ölkələrlə birlikdə istifadəyə verək. Beləliklə, bundan sonra həm Şərqdən Qərbə və əks istiqamətə, həm də Şimaldan Cənuba və əks istiqamətə dəmir yolları Azərbaycan ərazisindən keçəcəkdir. Bu, bizə əlavə iqtisadi mənfəət və əlbəttə ki, siyasi dividendlər gətirəcək. Bu, regional əməkdaşlığa da çox ciddi müsbət təsir göstərəcək”, - deyə dövlətimizin başçısı qeyd edib.
Prezident İlham Əliyev vurğulayıb ki, millətlərarası, dinlərarası, mədəniyyətlərarası dialoqun aparılması üçün sadəcə olaraq, söz danışmaq kifayət deyil. Konkret layihələr, konkret maraqlar olmalıdır, maraqların uzlaşması, balansı və qarşılıqlı asılılıq olmalıdır. “Bizim regionda icra etdiyimiz layihələr bu qarşılıqlı maraqları təmin edir”, - deyə Azərbaycan Prezidenti bildirib.
Bölmənin digər xəbərləri
