Zərdab, 2 dekabr, AZƏRTAC

Dekabrın 2-də Azərbaycan Respublikasının Prezidenti İlham Əliyev və xanımı Mehriban Əliyeva Zərdab Mərkəzi Rayon Xəstəxanasının əsaslı təmirdən sonra istifadəyə verilən yeni binasında yaradılan şəraitlə tanış olublar.

AZƏRTAC xəbər verir ki, Zərdab Mərkəzi Rayon Xəstəxanasının binası 1988-ci ildə inşa edilib. Uzun müddət baxımsız vəziyyətdə qalan binada 2013-cü ildə əsaslı təmir işlərinə başlanıb. Görülən işlər nəticəsində xəstəxananın binası müasir görkəm alıb, zəruri avadanlıqla təchiz olunub.

Səhiyyə naziri Oqtay Şirəliyev dövlətimizin başçısına və xanımına məlumat verdi ki, xəstəxana əsaslı təmir və yenidənqurmadan sonra 125 çarpayılıq tibb müəssisəsi kimi fəaliyyət göstərəcək. Hazırda xəstəxanada 530 işçi çalışır ki, onlardan 57-si həkim, qalanları isə orta tibb işçiləridir.

İki korpusdan və doqquz yardımçı binadan ibarət olan xəstəxananın əsas korpusunda cərrahiyyə, ginekologiya, doğum, terapiya, dializ, şüa-diaqnostika, intensiv terapiya, poliklinika və digər şöbələr fəaliyyət göstərəcək. Digər korpusda isə yoluxucu xəstəliklər bölməsi fəaliyyət göstərəcək.

Müasir tibbi avadanlıq və ləvazimatlarla təmin olunan Zərdab Mərkəzi Rayon Xəstəxanasında ətraf rayonlardan gələnlərə də tibbi xidmət göstəriləcək. Xəstəxananın laboratoriyası analizlərin dəqiq aparılması üçün zəruri avadanlıqla təchiz edilib.

Xəstəxananın müasir reanimasyon və kardioloji avadanlığı, həmçinin əməliyyatxana üçün səyyar rentgen aparatı vətəndaşlara yüksək səviyyədə tibbi xidmət göstərməyə imkan verir. Bütün bunlar bir daha göstərir ki, müasir Azərbaycanı modern texnologiyaların tətbiq olunduğu məkana çevirmək məqsədini qarşıya qoyan Prezident İlham Əliyevin diqqət və qayğısı sayəsində ölkəmizdə yenidən qurulan səhiyyə müəssisələri regionlarda ilk dəfə açıq ürək əməliyyatı və qaraciyərin köçürülməsi kimi mühüm nailiyyətlərə imza atıb. Ötən illər ərzində regionlarda yüzlərlə tibb ocağının, müalicə-diaqnostika mərkəzinin inşası və ya yenidən qurulması səhiyyə sisteminin köklü şəkildə inkişafından xəbər verir.

Zərdab Mərkəzi Rayon Xəstəxanasında yaradılan şəraitlə tanışlıqdan sonra dövlətimizin başçısı və xanımı tibb ocağının kollektivi və rayon ictimaiyyətinin nümayəndələri ilə görüşdülər.

Görüşdə çıxış edən Prezident İlham ƏLİYEV dedi:

-Sizi ürəkdən salamlayıram. Zərdab rayonunda yenidən olmağıma çox məmnunam. Bu gün Zərdab rayonunun həyatında çox əlamətdar bir gündür. Uzun fasilədən sonra Mərkəzi Rayon Xəstəxanası artıq vətəndaşların sərəncamına verilir. Çox gözəl işlər görülüb, əsaslı təmir aparılıb. İndi bu xəstəxana ən yüksək standartlara cavab verir. Həm artıq burada bütün abadlıq işləri görülüb və həm də xəstəxana gözəl, müasir avadanlıqla təmin edilib. Əminəm ki, burada göstəriləcək tibbi xidmət də yüksək səviyyədə olacaq.

Mərkəzi Rayon Xəstəxanasının istifadəyə verilməsi onu göstərir ki, biz sosial siyasətimizi bu gün də uğurla həyata keçiririk. Sosial siyasət bizim əsas istiqamətimizdir. İnsanların sağlamlığı, onların ömrünün uzunluğu, sağlam həyat tərzi – bütün bunlar bizim üçün prioritetdir. Azərbaycan vətəndaşları bu gün ən müasir tibbi xidmətə layiqdirlər və bunu görürlər. Son illərdə Azərbaycanda 600-dən çox müasir tibb ocağı tikilib və ya əsaslı təmir edilib. Ölkəmizdə pulsuz müayinədən keçmə siyasəti aparılır. Hər il milyonlarla insan yeni yaradılmış tibb ocaqlarında diaqnostikadan keçir, onlara lazımi xidmət göstərilir və beləliklə, insanlarımız dövlət hesabına öz sağlamlığını qoruyurlar.

Mən əvvəlki illərdə xəstəxanaların açılışlarında dəfələrlə bildirmişdim ki, hər bir insan hər il müayinədən keçməlidir. Artıq biz buna nail olmuşuq. Bu il ölkə üzrə dörd milyondan çox insan müasir xəstəxanalarda müayinədən keçib.

Zərdab rayonunda insanların sağlamlığı üçün digər tədbirlər də görülmüşdür. Dörd il bundan əvvəl mənim iştirakımla Zərdab şəhərinə içməli suyun verilməsini qeyd etmişik. Ondan əvvəlki dövrdə içməli su qrafik üzrə verilirdi - gündə 4-5 saat, keyfiyyət də o qədər yaxşı deyildi. Ancaq artıq dörd ildir ki, fasiləsiz, Dünya Səhiyyə Təşkilatının standartlarına uyğun içməli su verilir. Bu da çox böyük infrastruktur və sosial layihə idi. Bu layihənin məqsədi insanlara xidmət etmək, insanların sağlamlığını qorumaqdır. Burada iştirak edən həkimlər yaxşı bilirlər ki, su insan orqanizmi üçün çox əhəmiyyətli məsələdir və təmiz içməli su insanların sağlamlığına bilavasitə müsbət təsir göstərir.

Zərdab rayonunda digər layihələr də icra edilib. Kənd yolları layihələri. Bir çox məktəblər tikilib. Zərdab rayonunda sosial obyektlər yaradılır, iş yerləri açılır. Biz indiki şəraitdə sahibkarlığın inkişafına xüsusilə daha böyük diqqət göstəririk. Kənd təsərrüfatının inkişafı uğurla gedir. Bu il bu istiqamətdə dövlət proqramlarının icrası ilə bağlı çox önəmli addımlar atılmışdır. Hazırda kənd təsərrüfatının müxtəlif sahələri - pambıqçılıq, baramaçılıq inkişaf edir. İl ərzində bu istiqamətlərdə çox böyük irəliləyiş var. İnsanlar yaxşı pul qazanırlar.

Bizim gələn il üçün çox böyük proqramlarımız var. Mənə verilən məlumata görə, uzun fasilədən sonra bu il Zərdabda 6 tona yaxın barama tədarük edilmişdir, gələn il ən azı 3 dəfə artmalıdır. Uzun fasilədən sonra min hektara yaxın pambıq əkilmişdir və yığım hələ davam edir. Gələn il 3 min hektarda pambıq əkiləcək. Hazırda Zərdab rayonunda yeni əkin sahələrinin suvarılması üçün çox böyük layihə icra edilir. Bu, respublika üzrə hazırda ən mühüm layihələrdən biridir. Biz gələn il on minlərlə, bəlkə də 100 min, 150 min hektardan çox yeni əkin sahələrini su ilə təmin edəcəyik. Onların arasında birinci layihə Zərdab rayonunda icra edilir. Bu da öz növbəsində yeni iş yerlərinin yaradılmasına gətirib çıxaracaq, insanlar işlə təmin olunacaqlar, yaxşı pul qazanacaqlar və daha da yaxşı yaşayacaqlar.

Azərbaycanda iş yerlərinin yaradılması daimi prosesdir. Çünki bəzi başqa ölkələrdən fərqli olaraq bizdə əhali artır. Bu da iqtisadi inkişafın təzahürüdür. Hər il Azərbaycanda əhalinin sayı 100 mindən çox artır. Buna görə də iş yerlərinin yaradılması daimi proses olmalıdır. Bax, bu xəstəxanada 500-dən çox iş yeri yaradılıb. Biz bundan sonra da çalışacağıq ki, işsizliyi ən aşağı səviyyədə saxlayaq.

Ölkəmizin hərtərəfli inkişafı davam edir. Son illərlə müqayisədə 2016-cı il ölkə iqtisadiyyatı üçün obyektiv səbəblər üzündən ən ağır il olmuşdur. Buna baxmayaraq, biz çox ciddi tədbirlər görərək dünya böhranının mənfi fəsadlarını azaltmağa çalışmışıq və buna nail ola bilmişik. Biz ili yaxşı göstəricilərlə başa vururuq. Qeyri-neft sənayesinin, kənd təsərrüfatının artımı, əlbəttə ki, görülmüş işlərin nəticəsidir. Biz valyuta ehtiyatlarımızı qoruya bilmişik. Bu da çox vacib məsələdir. Çünki neftlə zəngin olan ölkələrin əksəriyyətində valyuta ehtiyatları tükənir, ya da azalır. Biz isə qoruyuruq, çünki bu, dövlətimiz, xalqımız üçün lazımdır. Bu, bizə əminlik və imkan verir ki, gələcəyə nikbinliklə baxaq.

Sosial məsələlərin həlli bundan sonra da prioritet olacaq. Neftin qiymətinin 3-4 dəfə düşməsinə baxmayaraq, Azərbaycanda belə gözəl tibb ocaqları yaradılır. Ehtiyac meyarı artırılacaq, digər sosial proqramlar gələn il də artıqlaması ilə icra ediləcək.

Yeni iş yerlərinin yaradılması istiqamətində çox ciddi tədbirlər görülür. Bu gün bütün bölgələrimizdə çox böyük canlanma gedir. İnsanlar kənd təsərrüfatı ilə çox həvəslə məşğul olurlar, dövlət öz dəstəyini göstərir, subsidiyalar, güzəştli şərtlərlə gübrələr, yanacaq, texnika verilir. Yəni, hər şey etməyə çalışırıq ki, insanlar daha da rahat yaşasınlar və dünya böhranının mənfi təsirindən özlərini qoruya bilsinlər.

Bizim atdığımız bütün addımlar sosial xarakter daşıyır və sosial ədaləti tərənnüm edir. Çünki yaxşı yaşayan dövlətə daha çox töhfə verməlidir, daha çox vergi ödəməlidir, daha çox kommunal xərcləri olmalıdır. Ancaq aztəminatlı təbəqə, orta təbəqə dövlət tərəfindən qorunmalıdır və qorunur. Bu, sosial ədalət prinsipidir. Biz bu yolla gedirik. Biz bazar iqtisadiyyatı prinsipi əsasında yaşayırıq, eyni zamanda, vətəndaşların sosial təminatı da daim diqqət mərkəzindədir. Beləliklə, biz həm sosial məsələlərin həlli, həm də iqtisadi inkişaf ilə bağlı siyasətimizi gələn illərdə də davam etdirəcəyik.

Zərdab rayonunun uğurlu inkişafı ilə bağlı bundan sonra da addımlar atılacaq. Burada yeni kənd yolları layihələri icra ediləcək, binaların, xüsusilə çoxmərtəbəli binaların təmiri ilə bağlı addımlar atılacaq, qeyd etdiyim kimi, kənd təsərrüfatını, sahibkarlığı stimullaşdırmaq üçün çox ciddi tədbirlər görüləcək.

Sizi bir daha salamlayıram və bu gözəl hadisə münasibətilə təbrik edirəm.

X X X

Xəstəxananın kollektivi adından dövlətimizin başçısına minnətdarlığını bildirən həkim Esmira TAĞIYEVA dedi:

-Möhtərəm cənab Prezident. Sizi rayonun tibb işçiləri adından salamlayıram. Zərdaba xoş gəlmisiniz.

Bizim xəstəxananın binası ötən əsrin 80-ci illərində inşa edilib. Öz dövrünə görə ən gözəl binalardan biri hesab olunurdu. Ancaq illər ötdükcə fiziki aşınmaya məruz qaldığı üçün ciddi təmirə ehtiyac yarandı. Sizin sayənizdə xəstəxanamız belə gözəl, yüksək səviyyədə təmir edildi və ən müasir tibbi avadanlıqla təchiz olundu. Bütün bunlara görə rayon ictimaiyyəti adından Sizə dərin minnətdarlığımızı bildiririk. Sizi əmin edirik ki, bundan sonra bu gözəl şəraitdə daha yaxşı işləyəcək, insanların etimadını doğrultmağa çalışacağıq.

Hörmətli cənab Prezident, belə gözəl bir gündə belə bir gözəl xəstəxananı, belə bir gözəl hədiyyəni bizə bəxş etdiyiniz üçün Sizə və bu işlərdə Sizin ən yaxın köməkçiniz olan Mehriban xanıma dərin minnətdarlığımızı bildiririk. Sağ olun, var olun, Allah Sizi qorusun!

Prezident İlham Əliyev: Mehriban xanım da sizin həmkarınızdır.

Esmira Tağıyeva: Bəli, mən də oftalmoloqam, cənab Prezident.

Prezident İlham Əliyev: Çox yaxşı.

X X X

Zərdabın inkişafına göstərdiyi diqqət və qayğıya görə Azərbaycan Prezidentinə minnətdarlıq edən rayon sakini Fiqurə ABBASOVA dedi:

-Cənab Prezident, Sizin Zərdaba gəlişiniz rayonumuzun bütün əhalisinə hədsiz dərəcədə sevinc bəxş edib. Yaxşı yadımdadır, 1978-ci ildə Ulu Öndər bizim rayona gəlmişdi. O vaxt mən komsomol idim. Ulu Öndəri qarşılayanlar arasında mən də var idim. Mən bu gün bizim Zərdab əhalisinin keçirdiyi sevinc hissini görəndə, sanki həmin günləri yaşadım. Bizə belə sevincli günlər bəxş etdiyinizə görə Sizə minnətdaram.

Bizim Zərdab camaatı ta qədimdən əkinçidir. Kənd təsərrüfatını inkişaf etdirmək barədə Sizin verdiyiniz sərəncamlar camaatımızı çox ruhlandırıb. Onlar həvəslə işə girişiblər. Bu, mənə həmin dövrü xatırladır. Şəxsən biz kənd adamları elə bilirdik ki, kənarda qalmışıq. Kənd təsərrüfatının inkişafı ilə bağlı verdiyiniz sərəncamlar sayəsində indi bizim üçün iş yerləri açılıb. İndi bizim öz zəhmətimizlə qazanmaq, dolanmaq imkanımız var. Eyni zamanda, Siz kənd adamlarını torpağı əkib-becərməyə qaytarmısınız. Bunun üçün çox sağ olun. Rayonumuzun camaatında belə əhvali-ruhiyyə yarandığına görə Sizə təşəkkür edirik.

Zərdabın kənd təsərrüfatı sahəsində çox böyük ənənələri olub. Biz barama, pambıq istehsalı sahəsində ənənələrimizi davam etdirməliyik. Biz gələn il məhsul istehsalını iki-üç dəfə artırmağı qarşımıza məqsəd qoymuşuq. Bizim nəyimiz yoxdur ki? Sizin sayənizdə bizim ən ucqar kəndlərimizə qaz çəkilir, yollar abadlaşır, hər cür imkanımız var. İndi insanlar xəyallarında qurduqları, arzuladıqları həyatı yaşayırlar. Buna görə Sizə minnətdarıq. Sizin zəhmətiniz çoxdur, cənab Prezident.

Biz televizora, internetə baxır, xəbərlərdən görürük ki, dünyada fəlakətlər artır, qaçqınlar, ölümlər çoxalır. Biz isə çox sabit dövlətdə yaşayırıq. Bizi göydə Tanrımız, yerdə isə qayğımıza qalan Sizin kimi möhtərəm insan qoruyur. Çox sağ olun, cənab Prezident. Allah Sizi, Mehriban xanımı, ailə üzvlərinizi qorusun!

X X X

Prezident İlham Əliyev:

-Çox sağ olun. Siz bayaq düz qeyd etdiniz, Zərdab rayon sakinləri zəhmətkeşdirlər və çox fəaldırlar. Təsadüfi deyil ki, sizin böyük həmyerliniz Həsən bəy Zərdabi təsis etdiyi, qurduğu qəzetə də “Əkinçi” adı vermişdir.

Əkinçiliyin burada çox böyük ənənələri var. Şadam ki, bu gün də Zərdab rayonunun sürətli inkişafı üçün çox ciddi addımlar atılır. Siz rayonun qazlaşdırılmasını qeyd etdiniz. Yaxşı xatırlayırsınız ki, əvvəlki illərdə burada heç rayon mərkəzində qaz yox idi. Ancaq bu gün Zərdab rayonunun qazlaşdırılması 81 faizdir və daha bir neçə kəndə qaz çəkilir, artıq 92 faizə çatacaq və yəqin ki, yaxın gələcəkdə 100 faiz olacaq.

Nəinki Zərdabda, bütün ölkə üzrə su problemi həmişə ən kəskin problem idi. Bu gün Zərdab şəhərinin sakinlərinə təmiz içməli su verilir.

Digər layihələr icra olunur. Bunun əsas məqsədi insanlara xidmət etməkdir. İnsanlara daha da yaxşı şərait yaratmalıyıq. Əvvəllər Zərdabda baramaçılığın böyük ənənələri olub. Sonra bu ənənələr itib. Nəyə görə? Çünki dövlət lazımi səviyyədə diqqət göstərmirdi. Bəziləri hesab edirdilər ki, bazar iqtisadiyyatı hər şeyi özü tənzimləyəcək. Amma belə deyil. Görəndə ki, biz bu sahəni itiririk, dərhal tədbirlər görüldü, altı tona yaxın barama tədarük edildi, yüzlərlə insan yaxşı pul qazandı. Bəzi ailələr 30-40 gün ərzində böyük məbləğdə pul qazanırlar. Gələn il 15 ton barama tədarük ediləcək. İndi xaricdən tinglər gətirilir, biz onları alırıq. Yaxşı yarpaq verən, xüsusi növ ağaclar gətirilir ki, baramaçılıq kütləvi xarakter alsın. Hər cür imkanı, həyətyanı sahəsi, torpağı olan vətəndaşa məsləhət görürəm ki, baramaçılıqla məşğul olsun. Çünki qısa müddət ərzində, o qədər də böyük əziyyət çəkmədən yaxşı pul qazanacaqlar. Dövlət də onu alacaq. İndi Şəki ipək kombinatı işləyir, biz onu işə salmışıq. Artıq biz ipəkçiliyi də bərpa edirik.

Pambıqçılıq da həmçinin. Ulu Öndərin dövründə burada böyük pambıq sahələri olub. Sonra bu sahə tənəzzülə uğrayıb. Statistikaya baxsaq görərik ki, keçən il ölkə üzrə cəmi 18 min hektarda pambıq əkilmişdi. Biz bu il bu rəqəmi 52 min hektara çatdırmışıq. Gələn il 130 minə çatdıracağıq.

Gələn il ancaq Zərdab rayonunda ən azı 3 min hektarda pambıq əkiləcək. Yeni suvarılacaq 10 min hektar torpaqda rayon sakinləri işləyəcəklər, pul qazanacaqlar, həm öz həyatlarını yaxşılaşdıracaqlar, həm də ümumi işimizə töhfə verəcəklər. Bu proses artıq kütləvi xarakter alıb. Hər bir rayonda böyük canlanma, kənd təsərrüfatının inkişafı ilə bağlı nikbinlik, böyük ümidlər var. Kənd təsərrüfatı təkcə iqtisadi sahə deyil, həm də sosial sahədir. Çünki əhalimizin yarısı bölgələrdə yaşayır.

Mən sizi bir daha salamlayıram, uğurlar arzulayıram. Gələn il gərək hamımız fəal işləyək ki, ölkəmizi daha da gücləndirək.

Sakinlər: Sağ olun, Allah Sizi qorusun.

Prezident İlham Əliyev: Sağ olun.

X X X

Sonda xatirə şəkli çəkdirildi.