Bakı, 10 fevral, AZƏRTAC

Fevralın 10-da müdafiə sənayesi naziri Yavər Camalov Şirvan şəhərində ictimaiyyət nümayəndələri ilə görüşüb. Görüşdə Prezident İlham Əliyevin “Azərbaycan Respublikasında regionların 2014-2018-ci illərdə sosial-iqtisadi inkişafı Dövlət Proqramı”nın icrasının ikinci ilinin yekunlarına həsr olunmuş konfransdakı nitqindən irəli gələn vəzifələr müzakirə olunub.

Yerli icra hakimiyyəti orqanlarının, bələdiyyələrin, idarə, müəssisə və təşkilatların rəhbərlərinin, sahibkarların və rayon ziyalılarının iştirakı ilə keçirilən görüşdə əhalinin məşğulluğunun təmin edilməsi, sosial müdafiəsinin gücləndirilməsi, dinamik iqtisadi inkişaf və regionların potensial imkanlarının hərəkətə gətirilməsi ilə bağlı geniş fikir mübadiləsi aparılıb.

Müdafiə Sənayesi Nazirliyinin mətbuat xidmətindən AZƏRTAC-a bildiriblər ki, Şirvan Şəhər İcra Hakimiyyətinin başçısı Mərdan Camalov çıxış edərək Prezident İlham Əliyevin regionların hərtərəfli inkişafına göstərdiyi diqqət və qayğı nəticəsində şəhərin sosial-iqtisadi həyatında mühüm irəliləyişlər baş verdiyini və qazanılan uğurların ötən il də davam etdirildiyini vurğulayıb. Bildirilib ki, digər bölgələr kimi, Şirvanda da sənayenin, sahibkarlığın inkişafı, sosial problemlərin həlli, məşğulluğun təmin olunması istiqamətində ardıcıl tədbirlər həyata keçirilib. Hazırda bütün səylər regionların sosial-iqtisadi inkişafı ilə bağlı Prezident İlham Əliyevin verdiyi tapşırıqların uğurlu icrasına yönəldilib.

Görüşdə çıxış edən müdafiə sənayesi naziri Yavər Camalov respublikada əldə edilən uğurlardan danışıb və Prezidenti İlham Əliyevin regionların 2014-2018-ci illərdə sosial-iqtisadi inkişafı Dövlət Proqramının icrasının ikinci ilinin yekunlarına həsr olunmuş konfransda verdiyi tapşırıqları və qarşıda duran vəzifələri diqqətə çatdırıb.

Müstəqil Azərbaycanın son illər həyatın bütün sahələrində əldə etdiyi uğurlar konkret məqsədlərə yönəlmiş çevik iqtisadi siyasətin nəticəsidir. Bu haqda danışan Y.Camalov son 12 ildə qazanılan uğurları xatırladıb. Bildirib ki, həmin müddətdə ölkə üzrə ümumi daxili məhsul 3,2 dəfə, qeyri-neft sektoru 2,6 dəfə artıb, orta illik iqtisadi artım 12,9 faiz təşkil edib. Strateji valyuta ehtiyatları 31, xarici ticarət dövriyyəsi 6,6, qeyri-neft ixracı 4,7 dəfə artıb. Bu müddətdə dövlət büdcəsinin gəlirləri 16 dəfə, orta aylıq əməkhaqqı 5 dəfə, pensiyalar 7 dəfə, əhalinin əmanətləri 27 dəfə artıb. Yoxsulluğun səviyyəsi 44,7 faizdən 5 faizə, işsizliyin səviyyəsi isə 4,8 faizə enib. Yeni iş yerlərinin yaradılması istiqamətində görülmüş tədbirlər nəticəsində 1 milyon 500 min iş yeri açılıb.

2004-cü ildən başlayaraq regionların sosial-iqtisadi inkişafına dair 3 dövlət proqramı qəbul edilib. Həmin proqramların icrası məqsədi ilə ölkədə irimiqyaslı sosial layihələr yerinə yetirilib. Ölkə ərazisinin 90 faizi qazlaşdırılıb, 10 min kilometrdən çox yol çəkilib. Bir çox yerlərdə içməli su layihələri icra edilib. Son 12 ildə 25 elektrik stansiyası, 3 min məktəb, 600-ə yaxın xəstəxana tikilib və ya əsaslı təmir edilib. Həmin müddətdə məcburi köçkünlər üçün 89 qəsəbə salınıb, 225 min vətəndaş yeni mənzillərə köçürülüb. Sahibkarlara güzəştli şərtlərlə 1 milyard 700 milyon manat kredit verilib. Ölkəyə 200 milyard dollar sərmayə qoyulub ki, bunun da 100 milyard dolları xarici sərmayədir.

Ötən dövr ərzində respublikamızda beynəlxalq səviyyəli onlarla forum, konfrans, sərgi, birinci Avropa Oyunları, həmçinin idmanın əsas növləri üzrə qitə və dünya çempionatları və digər mühüm tədbirlər keçirilib.

İqtisadiyyatın sürətli inkişafı, uğurlu islahatlar insanların real həyatına da öz müsbət təsirini göstərib. Nazir son bir ayda dövlətimizin başçısı İlham Əliyev tərəfindən maaş, pensiya və sosial müavinətlərin artırılmasına dair 6 fərman və 19 sərəncam imzalanmasının buna parlaq misal olduğunu vurğulayıb.

Bildirilib ki, Prezident İlham Əliyevin müstəqillik dövründə həyata keçirdiyi mühüm tədbirlərdən biri də, ölkənin müdafiəsini təmin edən ordunun hərbi-texniki bazasının gücləndirilməsi və xaricdən asılılığın azaldılması məqsədilə Müdafiə Sənayesi Nazirliyinin yaradılması və inkişafı olub. Nazirliyin qarşısına müəssisələrdə bərpa və yenidənqurma işlərinin aparılması, müasir növ silah, döyüş sursatlarının istehsalının mənimsənilməsi və onların seriyalı istehsalını təmin etmək üçün yeni sahələrin yaradılması əsas vəzifə kimi qoyulub. Qısa müddət ərzində nazirliyin müəssisələrində 50-dən çox yeni istehsal sahələri yaradılıb və istehsalı mənimsənilmiş müdafiə təyinatlı məmulatların çeşidlərinin sayı 1070-i ötüb.

Y.Camalov Şirvan şəhərində yerləşən “Telemexanika” və “Araz” zavodlarının 10-12 il bundan əvvəlki vəziyyətini xatırladaraq bildirib ki, həmin zavodlar Müdafiə Sənayesi Nazirliyinin tabeliyinə verildikdən sonra orada əsaslı bərpa və yenidənqurma işləri aparılıb. Qısa müddət ərzində bu müəssisələrdə yeni istehsal sahələri yaradılıb, müxtəlif növ müdafiə təyinatlı məmulatlar istehsal edilərək Azərbaycan Silahlı Qüvvələri döyüş sursatları ilə təmin olunub. Hazırda həmin müəssisələrdə 15 yeni istehsal sahəsi fəaliyyət göstərir və yaxın illərdə onların sayı daha da artırılacaq. Bu gün “Telemexanika” zavodunda orta hesabla 517 nəfər, “Araz” zavodunda isə 193 nəfər işləyir. Zavodlarda orta aylıq əməkhaqqı 520 manatdır.

Nazir dünyada hökm sürən iqtisadi böhrana toxunaraq qeyd edib ki, son illər baş verən bu proseslər Azərbaycana da təsirsiz ötüşməyib. Dünya bazarında neftin qiymətinin 4 dəfə aşağı düşməsi Azərbaycanın milli valyutası olan manatın devalvasiyası ilə nəticələnib. Yaranmış maliyyə çətinliklərinə baxmayaraq, Azərbaycan inkişaf etməkdədir, qarşıya qoyulmuş bütün vəzifələr, sosial proqramlar icra olunur. 2015-ci ildə ümumi daxili məhsulda 1 faizdən çox, sənaye istehsalında 2,4, qeyri-neft sektorunda isə 8,4 faiz artım olub. Ötən il ölkə iqtisadiyyatına 20 milyard dollara yaxın sərmayə qoyulub. Regionların inkişafı daha da sürətlənib.

Yavər Camalov ötən il dünya bazarında neftin qiymətinin kəskin ucuzlaşmasının əsasən siyasi amillərlə bağlı olduğunu diqqətə çatdırıb. Bildirib ki, Azərbaycan dünya iqtisadiyyatına inteqrasiya olunduğundan baş verən proseslərdən kənarda qala bilməzdi. Lakin Prezident İlham Əliyevin apardığı uğurlu siyasət nəticəsində iqtisadiyyatın inkişafı və ictimai-siyasi sabitliyin qorunması təmin edilib. Dövlətimizin başçısının uzaqgörənliyi sayəsində görülmüş uzunmüddətli və qabaqlayıcı tədbirlər öz bəhrəsini verib. Belə ki, dünyanın inkişaf etmiş dövlətləri illərdir bu böhrandan əziyyət çəksələr də, Azərbaycanda bu təsirin minimuma endirilməsinə nail olunub.

Y.Camalov Nazirlər Kabinetinin 2015-ci ilin yekunlarına həsr olunmuş iclasında, eləcə də regionların 2014-2018-ci illərdə sosial-iqtisadi inkişafı Dövlət Proqramının icrasının ikinci ilinin yekunlarına həsr olunmuş konfransda Prezident İlham Əliyevin qarşıya yeni vəzifələr qoyduğunu diqqətə çatdırıb. Bildirib ki, bu vəzifələrə uyğun olaraq Şirvan şəhərində də sosial-iqtisadi inkişafın sürətləndirilməsi, yeni iş yerlərinin yaradılması, biznes mühitinin yaxşılaşdırılması, əhalinin sosial müdafiəsinin gücləndirilməsi və digər istiqamətlərdə təxirəsalınmaz tədbirlər görülməlidir.

Görüşdə Y.Camalov vətəndaşların müraciətlərini dinləyib, onlardan 30 nəfərin Müdafiə Sənayesi Nazirliyinin Şirvan şəhərində yerləşən müəssisələrində, 20 nəfərin isə digər müəssisələrdə işlə təmin edilməsinə dair göstərişlər verib.

Tədbirdə iştirak edən Milli Məclisin deputatı Rafael Cəbrayılov Prezident İlham Əliyevin rəhbərliyi ilə həyata keçirilən tədbirlərin digər bölgələrlə yanaşı, Şirvanın da inkişafına böyük imkanlar yaratdığını söyləyib.

Görüşdə bir sıra təkliflər səsləndirilib, qaldırılan problemlərin bir qismi yerindəcə həll olunub, bəziləri ilə bağlı müvafiq struktur rəhbərlərinə tapşırıqlar verilib.

Çıxış edən sahibkarlar və ictimaiyyət nümayəndələri göstərilən diqqət və qayğıya görə dövlətimizin başçısı İlham Əliyevə minnətdarlıqlarını bildiriblər.