Bakı, 30 sentyabr (AZƏRTAC). Xalqımızın ümummilli lideri Heydər Əliyevin əsasını qoyduğu, dövlətimizin başçısı İlham Əliyev tərəfindən müvəffəqiyyətlə davam etdirilən və gənclərin ölkə həyatının bütün sahələrində fəal iştirakına yönəlmiş dövlət gənclər siyasətinin həyata keçirilməsi sahəsində prokurorluq orqanlarında həyata keçirilmiş tədbirlər prokurorluğun şəxsi heyətinin gəncləşdirilməsi işində mühüm nailiyyətlərin qazanılmasını şərtləndirib. 2002-ci ildən etibarən işə qəbulla bağlı keçirilən müsabiqələr, o cümlədən cari ildə başa çatan sayca 13-cü müsabiqə nəticəsində qulluğa qəbul edilən 71 gənc hüquqşünas da nəzərə alınmaqla, hazırda prokurorluqda qulluq keçən şəxslərin 58 faizini müsabiqə yolu ilə işə qəbul olunmuş gənclər təşkil edir.

Dövlət gənclər siyasətinin reallaşdırılması istiqamətində fəaliyyətini daha da gücləndirməyi əsas prioritetlərdən hesab edən Respublika Baş Prokurorluğu tərəfindən Azərbaycan Prezidentinin 2001-ci il 19 iyul tarixli Fərmanı ilə təsdiq edilmiş “Prokurorluğa işə qəbul olunmaq üçün namizədlərlə müsabiqə keçirilməsi qaydaları haqqında Əsasnamə”yə və “Prokurorluğa işə qəbul olunmaq üçün namizədlərlə müsabiqənin keçirilməsi Qaydaları”na müvafiq olaraq prokurorluq orqanlarında qulluğa qəbul olunmaq istəyən şəxslər üçün 100 ştat vahidi üzrə növbəti müsabiqə elan edilir.

Baş Prokurorluğun mətbuat xidmətindən AZƏRTAC-a bildiriblər ki, qanunvericiliklə müəyyən edilmiş tələblərə cavab verən və prokurorluq orqanlarında qulluğa qəbul olunmaq istəyən şəxslər Baş Prokurorluq tərəfindən müəyyən olunmuş formada ərizə, şəxsiyyət vəsiqəsinin əsli və notarial qaydada təsdiq edilmiş surəti, tərcümeyi-hal və kadrların uçotuna dair anket (blanklar prokurorluqda verilir), 3x4 və 4x6 sm ölçülərdə, hər birindən 4 ədəd ağ fonda rəngli fotoşəkil, ali təhsil haqqında (hüquqşünaslıq və ya beynəlxalq hüquq ixtisası üzrə) diplomun, diploma əlavə olunan qiymət cədvəlinin əsilləri və notarial qaydada təsdiq edilmiş surətləri, əmək kitabçasının notarial qaydada və yaxud iş yeri üzrə təsdiq olunmuş surəti, yaşadığı ünvan üzrə poliklinikadan (forma № 086) və ruhi-əsəb dispanserindən sağlamlıq barədə, narkoloji dispanserdən qeydiyyatda olub-olmaması barədə arayışlar, yaşadığı ünvan və ailə tərkibi haqqında arayış, həmin ünvan üzrə Səfərbərlik və Hərbi Xidmətə Çağırış üzrə Dövlət Xidmətinin yerli qurumlarında qeydiyyatda olması və həqiqi hərbi xidmət keçməsi barədə arayış, hərbi biletin əsli və notarial qaydada təsdiq olunmuş surətini təqdim etməklə Baş Prokurorluğa müraciət edə bilərlər.

Sənədlər Baş Prokurorluğun inzibati binasının qəbul otağında (Bakı şəhəri, N.Rəfibəyli küçəsi, 7) cari il oktyabrın 15-dən hər gün (şənbə, bazar və bayram günləri istisna olmaqla) saat 10:00-dan 17:30-dək qəbul olunacaq.

Prokurorluğa işə qəbul olunmaq istəyən hər bir namizədin hazırlığının, bilik səviyyəsinin, ümumi dünyagörüşünün, prokuror və ya müstəntiq vəzifəsinə yararlılığı və layiqliliyinin müəyyən edilməsi məqsədilə tam aşkarlıq şəraitində, şəffaf üsullarla və beynəlxalq tələblərə uyğun keçirilən ixtisas imtahanları (test və yazılı imtahanlar) və müsahibədən ibarət müsabiqə təşkil ediləcək. Müsabiqədə bərabər nəticələr əldə etmiş şəxslərdən xarici dilləri bilənlərə üstünlük veriləcək.

Müsabiqədə iştirak etmək üçün sənədlərini təqdim etmək istəyənlərin nəzərinə çatdırılır ki, namizədlərin ali hüquq təhsili Azərbaycan Respublikası ərazisində müvafiq qaydada tanınan diplomla təsdiq edilməli, onlar Azərbaycan Respublikasının dövlət dilini sərbəst bilməli və seçkilərdə iştirak etmək hüququna malik olmalıdır. Prokurorluğa işə 30 yaşınadək olan Azərbaycan Respublikası vətəndaşları qəbul olunurlar.

“Prokurorluq haqqında” Qanuna əsasən aşağıdakılar ikili vətəndaşlığı və digər dövlətlər qarşısında öhdəlikləri olanlar, din xadimləri, məhkəmə tərəfindən fəaliyyət qabiliyyəti olmayan və ya məhdud fəaliyyət qabiliyyətli hesab edilmiş, tibbi rəyə əsasən fiziki və ya əqli qüsurlarına görə prokuror və ya prokurorluğun müstəntiqi vəzifələrini yerinə yetirməyə qadir olmayan, alkoqolizm, narkomaniya, toksikomaniya və digər ağır xəstəliklərə tutulmuş (bu barədə həkim rəyi olduqda), əvvəllər məhkum olunmuş, habelə bəraətverici əsaslar olmadan barəsində cinayət işinin icraatına xitam verilmiş, əvvəllər yol verdiyi kobud nöqsanlara və ya prokuror və müstəntiq adı ilə bir araya sığmayan hərəkətlərə görə vəzifədən azad edilmiş şəxslər və qanunla müəyyən olunmuş müddətli həqiqi hərbi xidmət keçməmiş (qanuni əsaslarla müddətli həqiqi hərbi xidmətə çağırışdan möhlət hüququ olanlar və ya müddətli həqiqi hərbi xidmətə çağırışdan azad edilənlər istisna olmaqla) çağırış yaşlı vətəndaşlar prokurorluğa işə qəbul edilmirlər.

Müsabiqənin test imtahanının yekunlarına görə 70 və daha artıq bal toplamış namizədlər yazılı imtahana buraxılırlar.

Test imtahanının vaxtı, yeri, imtahan suallarının hazırlanmasında istifadə edilmiş normativ sənədlərin siyahısı və müsabiqə ilə bağlı digər məsələlər barədə kütləvi informasiya vasitələrində, o cümlədən Baş Prokurorluğun internet saytında (www.genprosecutor.gov.az, www.prokurorluq.gov.az) və qəbul otağında yerləşdirilmiş lövhədə əlavə məlumat veriləcək.

Əlavə məlumat almaq üçün 437-28-56, 492-62-23, 492-74-32, 492-63-62 nömrəli telefonlar vasitəsilə müraciət etmək olar.